ធនាគារជាតិនៃកម្ពុជានឹងដាក់ឱ្យដំណើការកម្មវិធីទូរស័ព្ទ«បាគងសម្រាប់ទេសចរ» ឆាប់ៗនេះ

ជាកិច្ចខិតខំប្រឹងប្រែងក្នុងការសម្រួលការទូទាត់ដល់ភ្ញៀវទេចរ ធនាគារជាតិនៃកម្ពុជា(NBC)កំពុងអភិវឌ្ឍន៍កម្មវិធីទូរស័ព្ទ បាគងសម្រាប់ទេសចរ (Bakong Tourists App) ដែលគ្រោងនឹងដាក់ដំណើការនាពេលដ៏ខ្លីខាងមុខនេះ។

ផែនការនៃការអភិវឌ្ឍកម្មវិធីទូរស័ព្ទនេះ លោកស្រីបណ្ឌិត ជា សិរី ទេសាភិបាលនៃ NBC  កាលពីរសៀលថ្ងៃពុធ ទី២៤ ខែកក្កដា ឆ្នាំ២០២៤បានជួបពិភាក្សាក្រុមធុរជនក្នុងវិស័យទេសចរណ៍ និងតំណាងមកពីក្រសួង-ស្ថាប័នពាក់ព័ន្ធ នារសៀលថ្ងៃពុធ ទី២៤ ខែកក្កដា ឆ្នាំ២០២៤ ដើម្បីប្រមូលធាតុចូល និងស្វែងរកកិច្ចសហការដើម្បីអភិវឌ្ឍន៍កម្មវិធីទូរស័ព្ទបាគងសម្រាប់ទេសចរ សំដៅរួមចំណែកជំរុញវិស័យទេសចរណ៍នៅកម្ពុជា តាមរយៈការជួយសម្រួលឱ្យភ្ញៀវអន្តរជាតិអាចធ្វើប្រតិបត្តិការទូទាត់ឌីជីថលបានកាន់តែងាយស្រួល។

លោកស្រីបណ្ឌិត ជា សិរិ បានមានប្រសាសន៍ថា៖« កម្មវិធីទូរស័ព្ទបាគងសម្រាប់ទេសចរ ដោយរំពឹងថានឹងក្លាយជាផលិតផលទេសចរថ្មីមួយទៀតដើម្បីបង្កើនភាពទាក់ទាញដល់ភ្ញៀវអន្តរជាតិមកទស្សនាកម្ពុជា បន្ថែមពីផលិតផលទេសចរវប្បធម៌ ប្រពៃណី ប្រវត្តិសាស្ត្រ និងធម្មជាតិ ដែលមានស្រាប់»។

«កម្មវិធីថ្មីនេះក៏នឹងជួយលើកកម្ពស់កិត្យានុភាពជាតិមួយកម្រិតទៀតផងដែរ តាមរយៈការផ្តល់ឱ្យភ្ញៀវអន្តរជាតិនូវបទពិសោធន៍នៃការទូទាត់តាមឌីជីថលថ្មី ទំនើប និងជឿនលឿន»។ នេះបើយោងតាមលោកស្រីបណ្ឌិត ជា សិរី។

លោក ធួន ស៊ីណាន ប្រធានសមាគមទេសចរណ៍អាស៊ី បាស៊ីហ្វិក(PATA) បានសាទរចំពោះ​គំនិតផ្តួចផ្តើមនេះ ដែលកម្មវិធី Bakong Tourists App នឹងកាន់តែជួយ​សម្រួលដល់ការទូទាត់​របស់ភ្ញៀវទេចរអន្តរជាតិដោយពុំចាំបាច់កាន់ក្រដាសប្រាក់នៅ​ពេល​ដែលពួកគេទៅទស្សនា​រមណីដ្ឋាននានានៅទូទាំងប្រទេសកម្ពុជា។​

លោកបានមានប្រសាសន៍ថា៖«វាពិតជាមានសារៈសំខាន់ខ្លាំងណាស់សម្រាប់សម្រួលដល់ការចាយវាយរបស់ភ្ញៀវទេចរអន្តរជាតិដោយសារតែពួកគាត់ពុំចាំបាច់ខ្វាយខ្វល់លើការកានក្រដាសប្រាក់ដើម្បីចំណាយ ឬមិនលំបាកនៅពេលដែលពួកគាត់ទទួលលុយអាប់មកវិញ​ដែល​មានសភាពចាស់ឬរហែកដែលបង្ករការលំបាកដល់ពួកគាត់នៅពេលយកទៅចំណាយបន្ត ហើយបែរជាអ្នកលក់បដិសេដមិនទទួល»។

នៅក្នុងឆមាសទី១ ឆ្នាំ ២០២៤ នេះ កម្ពុជាទទួលបានភ្ញៀវអន្តរជាតិសរុបចំនួនជាង ៣,១៦ លាន​​​នាក់ (៣ ១៦៦ ៤៩៧) មានការកើនឡើង ២២,៧% ធៀបនឹង​រយៈពេល​ដូច​គ្នានៅឆ្នាំ​២០២៣។ នេះបើយោង​តាម​របាយ​​ការណ៍​របស់​ក្រសួងទេសចរណ៍។

ក្នុងចំណោមទេសចរជាង ៣,១៦ លាននាក់ទេសចរថៃឈរនៅ​លំដាប់​លេខរៀងទី ១ មានចំនួន ៩៥៥ ២៥០ នាក់ កើន ៩,៧%; វៀតណាមចំនួន ៦៣៩ ៥៤៩ នាក់ កើន ៣៨% ;ចិន ៣៨៩ ៣៦០ នាក់ កើន ៤៥,២%; ឡាវ ១៨៨ ៧២៦ កើន​៣៤,៤%; អាមេរិក ១១២ ០៤៣ កើន ១៥,៧% កូរ៉េ ១០១ ៤៣៥ កើន ១៦,៧%។

បើ​តាមរបាយការណ៍របស់គ្រឹះស្ថានអង្គរ ​នៅក្នុងឆមាស​ទី០១ ឆ្នាំ ២០២៤ (គិតចាប់ពីខែមករា-មិថុនា) ​មានភ្ញៀវទេសចរបរទេសចំនួន ៥២១ ៩៥០ នាក់ បាន​ទិញ​សំ​​បុត្រ​ចូល​ទស្សនា​រមណីយដ្ឋាន​អង្គរ មានការកើនឡើង ៣៥,៣០ ភាគរយ ខណៈប្រាក់ចំណូល​ទទួល​បានពីការលក់សំបុត្រចំនួន ២៤ ៣៥៧ ៦៩៥ដុល្លារ កើន ៣៦,២៥ ភាគរយ។

នៅក្នុងឆ្នាំ ២០២៣ កម្ពុជា​ទទួលបាន​ភ្ញៀវទេសអន្តរជាតិចំនួន ៥,៤៥​ លាននាក់ កើន ១៣៩,៥ ភាគរយ ចំណែកឯ​ថវិកា​​​ប្រមាណ ៣,០៨​ ពាន់​លាន​ដុល្លារ កើន ៨៧,៥ ភាគរយ៕

​