«រដ្ឋ» ដាក់ផែនការប្រែក្លាយចម្ការកៅស៊ូ ចំណាស់មួយនៅខេត្តត្បូងឃ្មុំ ទៅជាសួនកៅស៊ូ ទាក់ទាញទេសចរ

រាជរដ្ឋាភិបាលកម្ពុជា មានផែនការប្រែក្លាយចម្ការកៅស៊ូចំណាស់​មួយ ស្ថិតនៅក្នុងខេត្តត្បូងឃ្មុំទៅជាសួនកៅស៊ូទាក់ទាញទេសចរ និងជាកន្លែងសារៈ​មន្ទី​កៅស៊ូ។

ចម្ការកៅស៊ូចំណាស់ជាងគេនេះ ស្ថិតនៅភូមិជប់ ឃុំថ្មពេជ្រ ស្រុកត្បូង​ឃ្មុំ ខេត្តត្បូងឃ្មុំ ដែលបានចាប់ផ្ដើម​ដាំដំបូង​នៅក្នុងឆ្នាំ ១៩២៤ សម័យអាណានិគមបារាំង រហូតមកដល់បច្ចុប្បន្ននៅសល់ដើមកៅស៊ូចំនួន ៤៤៨ ដើម លើទំហំដីជាង ៩ ហិកតា។

លោក ឃុន កក្កដា អគ្គនាយករង នៃអគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា៖ «ជាផែនការទី១ ប្រែក្លាយតំបន់នេះឱ្យមានរចនាសម្ព័ន្ធត្រឹមត្រូវ តាម​អនុសាសន៍របស់ឯកឧត្តម រដ្ឋមន្ត្រី ឌិត ទីណា ប្រែក្លាយទៅជាសួនកៅស៊ូ គោលបំណងសំខាន់គឺ ទាក់ទាញទេសចរឱ្យមកស្គាល់ទីនេះ ទី២ ការសិក្សាស្រាវជ្រាវពី Genetics កៅស៊ូ ដោយយើងបង្កើតបានពីររួចហើយ»។

ដំណាំកៅស៊ូ ចាប់ផ្ដើមមានវត្តមាននៅកម្ពុជា ចាប់តាំងពីឆ្នាំ១៩១០ ដោយជនជាតិ​បារាំងម្នាក់​ឈ្មោះ​លោក Boulliard បាននាំដំណាំកៅស៊ូនេះ មកដាំដុះសាកល្បង​ក្នុងភូមិសាស្ត្រស្រុកព្រៃនប់ ខេត្តកំពត (បច្ចុប្បន្ន ខេត្តព្រះសីហនុ)។ ដោយសារសណ្ឋានដីពុំអំណោយផល ជំនាញ​ការ​បា​រាំង​បានស្វែងរកដីដែលមានក្សេតបរិស្ថានសមស្របសម្រាប់ដំណាំកៅស៊ូ ហើយចាប់ផ្ដើម​ដាំដុះជា​លក្ខណៈ​​​​​ទ្រង់ទ្រាយធំ នៅក្នុងខេត្តចំនួន ៥ ដែលមានដីក្រហមបាសាល់។

ក្រោយមក ចម្ការ​កៅស៊ូមានលក្ខណៈ​ឧស្សាហកម្ម​​ទ្រង់​​ទ្រាយធំបានបង្កើត​​​ឡើងដោយ​ក្រុមហ៊ុន​វិនិយោគ​​​របស់​បារាំង​​​ធំៗចំនួន៥ នៅលើខេត្តដែលមានដី​ក្រហម​​​បាសាល់ រួមមាន ខេត្ត​កំពង់ចាម ខេត្ត​ក្រចេះ និង​ខេត្ត​រតនគិរី។

ជាង ១០០ឆ្នាំកន្លងមកនេះ ដំណាំកៅស៊ូ និងឧស្សាហកម្មកៅស៊ូ បាននៅជាប់ជាមួយប្រទេស​កម្ពុជា​ជានិច្ច បើទោះបីជាកម្ពុជាបានផ្លាស់ប្ដូររបប​ដឹកនាំជាច្រើន​លើកច្រើន​សារក៏ដោយ។

យោងតាម អគ្គនាយកដ្ឋានកៅស៊ូ ក្នុងរយៈពេល៨ខែឆ្នាំ២០២៤ កម្ពុជាបាននាំចេញជ័រកៅស៊ូ​ចំនួន​២០៩,៧៣៣តោន កើនឡើង ២% បើធៀបនឹងរៈពេលដូចគ្នានៅឆ្នាំ ២០២៣ ដោយទទួល​ចំណូល​បានចំនួន ៣២៨,៣១ លានដុល្លារ។

គិតមកទល់ពេលនេះ កម្ពុជាមានផ្ទៃដីដាំកៅស៊ូចំនួនជាង ៤០ ម៉ឺន ហិកតា (៤០៧១៧២) ក្នុងនោះផ្ទៃដីចៀរជ័រ ៣២ ម៉ឺនហិកតា ស្មើ៧៨ភាគរយ និងផ្ទៃដីថែទាំ៨៦,៩៨៨​ហិកតាស្មើ២១​ភាគរយ៕

វីដេអូខាងក្រោម៖

អត្ថបទ៖ ឡេង ដេត