កម្ពុជាស្នើឱ្យចិន រៀបកញ្ចប់ទស្សនកិច្ច ដើម្បីទាក់ទាញទេសចរចិនមកកម្ពុជា

លោក ហួត ហាក់ រដ្ឋមន្ត្រីក្រសួងទេសចរណ៍ បានស្នើឱ្យក្រុមហ៊ុនទេសចរណ៍ចិន រៀបចំកញ្ចប់ទស្សនកិច្ចដើម្បីទាក់ទាញភ្ញៀវទេសចរចិន មកទស្សនាកម្ពុជាឱ្យបានកាន់តែច្រើន និងជួយផ្សព្វផ្សាយពីគោលដៅទេសចណ៍កម្ពុជាឱ្យបានកាន់តែទូលំទូលាយ។

លោករដ្ឋមន្ត្រីលើកឡើងក្នុងពេលជួបពិភាក្សាការងរជាមួយលោក An Xin ប្រធានក្រុមហ៊ុន Tianhe International Travel Service Co., LTD នៅថ្ងៃទី ២៥ ខែកញ្ញា ឆ្នាំ ២០២៤ ក្នុងឱកាសព្រឹត្តិការណ៍ពិព័រណ៌ទេសចរណ៍អាស៊ាន-ចិន លើកទី១០ ដែលកំពុងប្រព្រឹត្តទៅនៅទីក្រុងគួយលីន ខេត្តក្វាងស៊ី សាធារណរដ្ឋប្រជាមានិតចិន។

លោក ហួត ហាក់ ក៏ស្នើឱ្យលោកនាយកក្រុមហ៊ុន ភ្ជាប់ទំនាក់ទំនងជាមួយក្រុមហ៊ុនឯកជនរបស់ប្រទេសកម្ពុជា ដែលចូលរួមព្រឹត្តិការណ៍ពិព័រណ៌ទេសចរណ៍អាស៊ាន-ចិន លើកទី១០ ដែលយើងមានក្រុមហ៊ុនចំនួន ១៧ ធ្វើដំណើរដោយផ្ទាល់មកពីកម្ពុជាចូលរួមព្រឹត្តិការណ៍នេះ និងបានអញ្ជើញ លោកប្រធានក្រុមហ៊ុន និងសហការី អញ្ជើញទៅទស្សនកិច្ចនៅប្រទេសកម្ពុជា ដើម្បីស្វែងយល់ពីសក្តានុពលទេសចរណ៍ និងវិនិយោគកម្ពុជាបន្ថែមទៀត ជាពិសេស ឯកឧត្តមរដ្ឋមន្ត្រី ស្នើឱ្យលោកប្រធាន ជំរុញប្រជាជនចិនចូលរួមឱ្យបានច្រើនកុះករក្នុងព្រឹត្តការណ៍ធំៗ ៣ នៅកម្ពុជា នៅអំឡុងត្រីមាសទី៤ នៅក្នុងក្របខណ្ឌនៃ “ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន ២០២៤”។

យោងតាមក្រសួងទេសចរណ៍ គិតត្រឹមរយៈពេល ៧ ខែឆ្នាំ ២០២៤ កម្ពុជាទទួលបានទេសចរចិនចំនួន ៤៦៣ ៩៨០ នាក់ កើនពី ៣១៨ ៤៩៨ នៅឆ្នាំ ២០២៣ ស្មើនឹង ៤៥,៧ ភាគរយ ធៀបនឹងរយៈពេលដូចគ្នា។

គិតចាប់ពីខែមករា ដល់ខែកក្កដា ឆ្នាំ ២០២៤ កម្ពុជា​ទទួល​បាន​ភ្ញៀវ​បរទេសជាង ៣,៧៤ លាន​នាក់ កើន​ឡើង ២៣,២​ ភាគ​រយ​​ធៀបនឹង​​រយៈ​ពេល​ដូច​គ្នា​ឆ្នាំ​ ២០២៣ដែល​មាន​ចំនួន ៣,០៣ លាននាក់។

ក្នុងចំណោមទេសចរជាង ៣,៧៤ លាននាក់ទេសចរថៃឈរនៅ​លំដាប់​លេខរៀងទី ១ មានចំនួន ១ ១៤៧ ៥៣៤ នាក់ កើន ១១,៦% វៀតណាមចំនួន ៧៥៧ ៤៣៧ កើន ៣៧,៤% ចិន ៤៦៣ ៩៨០ នាក់ កើន ៤៥,៧% ឡាវ ២២៤ ៨៧១ កើន ២៩,៣% អាមេរិក ១១៧ ២២៣ នាក់ កើន ១៧%៕

អត្ថបទ៖ ឡេង ដេត