អាជីវកម្មសំបុកត្រចៀកកាំ ចាយដើមទុនចាប់ពី ៣ ម៉ឺនដុល្លារ

ក្នុងរយៈពេល ១០ ឆ្នាំចុងក្រោយ ការសាងសង់អភិរក្សសំបុកត្រចៀកកាំនៅកម្ពុជាមានកំណើនគួរឱ្យកត់សម្គាល់ ដោយសារតែតម្រូវការមានការកើនឡើង។​

លោក ​ស៊ុយ ​កុកធាន ​ប្រធាន​សមាគម​ត្រ​ចៀក​កាំខ្មែរបានឱ្យដឹងថា ការអភិរក្សសំបុកត្រចៀក​កាំមានលក្ខណៈល្អ សម្រាប់​​ប្រជាកសិករខ្មែរ ដែលមិនសូវមានពេល គាត់ចិញ្ចឹមត្រចៀកកាំគឺល្អ ពីព្រោះត្រចៀកកាំមិនត្រូវការថែទាំច្រើន ខណៈការចំណាយទៅលើប្រតិបត្តិការក៏តិច ដែលជា​ចំណូល​បន្ថែម។

លោក ​ស៊ុយ ​កុកធាន បញ្ជាក់ថា៖ «ការចំណាយដើមទុនមានតូច មានធំ ចាប់ពី ៣ ម៉ឺនដុល្លារ​ឡើង​ទៅ តែបើខ្នាត​ស្ដង់​ដារកម្រិតមធ្យមអាចខ្ទង់ ៥ ម៉ឺនដុល្លារ បើគាត់មានផ្ទះស្រេច ប៉ុន្តែខ្ញុំ​ចង់ផ្ដល់​យោបល់ថា បើចង់ចាប់របរនេះ គួរស្វែងយល់ឱ្យបានស៊ីជម្រៅ កុំធ្វើតាមគ្នា យើងមានសមាគម ក្នុងការផ្ដល់យោបល់ ចំណេះដឹង បទពិសោធន៍ ប្រសិនមានបំណងចង់វិនិយោគ គួរចូលសមាគម​សិក្សាសិន ចាំដាក់ទុនធ្វើដើម្បីកុំឱ្យធ្វើខុស»។

បើតាមលោក ​ស៊ុយ ​កុកធាន ទីផ្សារសំបុកត្រចៀកកាំនៅកម្ពុជានៅមានសក្ដានុពល ដោយ​សារតែ​ ​ចិន តៃវ៉ាន់ ហុងកុង និងសិង្ហបុរី ជាពិសេសប្រទេសចិន គឺជាប្រទេសដែលមានចំណង​មិត្ត​ភាព​ធំ និងកិច្ចព្រមព្រៀងពាណិជ្ជកម្មច្រើនជាមួយកម្ពុជា ដូច្នេះសំបុកត្រចៀកកាំមានសក្ដានុពល​ខ្ពស់​ក្នុងការ​នាំ​ចេញទៅប្រទេសចិន។

តម្លៃសំបុកត្រចៀកកាំបច្ចុប្បន្ន ៤០០ ទៅ ៤៥០ ដុល្លារ ក្នុងមួយគីឡូក្រាម សម្រាប់សំបុកមិនទាន់កែច្នៃ ប៉ុន្តែ​សំបុក​​ឆាកាប្រមាណ ៣០០ ដុល្លារ ក្នុងមួយគីឡូក្រាម ខណៈកែច្នៃហើយ ១ ២០០​ សម្រាប់​ទីផ្សារក្នុងស្រុក។

ផលិតកម្មសំបុកត្រចៀកកាំផលិតនៅកម្ពុជា ភាគច្រើនផលិត​នៅខេត្តជាប់​មាត់​សមុទ្រ ដូចជា ខេត្តកំពត ខេត្តកោះកុង ប៉ុន្តែសក្ដានុពល​សម្រាប់​​ការវិនិយោគបន្ត បច្ចុប្បន្ន បាន​ប្ដូរ​មក​ខេត្តភូមិភាគកណ្ដាល ដូចជាខេត្តកំពង់ធំ ខេត្តជុំវិញ​បឹង​ទន្លេសាប ខេត្តស្ទឹងត្រែង និងព្រះ​វិហារ​វិញ ដោយសារខេត្តជាប់មាត់សមុទ្រ មានការសាង​សង់​ច្រើន​លើសលប់។

តាមការប៉ាន់ស្មាន កម្ពុជាមានសត្ថភាពផលិតសំបុកត្រចៀកកាំ ប្រមាណ ១០០ តោន ក្នុងមួយឆ្នាំ៕

អត្ថបទ៖ ឡេង ដេត