សហគ្រិនខ្មែរម្នាក់ គ្រោងបង្កើតប្រេនឈ្មោះទឹកត្រចៀកាំ ដាក់លក់លើផ្សារទំនើបជំនួសផលិតផលថៃ

ម្ចាស់អាជីវកម្មផ្ទះអភិរក្សសត្វត្រចៀកកាំមួយ គ្រោងបង្កើតប្រេនឈ្មោះទឹកត្រចៀកកាំ ដាក់លក់លើទីផ្សារប្រទេសកម្ពុជា ជំនួសឱ្យផលិតផលនាំចូលពីប្រទេសថៃ។

ថ្លែងប្រាប់ កម្ពុជាថ្មី លោក ញ៉ែម ប៊ុនថា ជាម្ចាស់អាជីវកម្មផ្ទះអភិរក្សសត្វត្រចៀកកាំ ឱ្យដឹងថា ថ្មីៗនេះ លោកគ្រោងនឹងរៀបចំបង្កើតប្រេនឈ្មោះទឹកត្រចៀកកាំដែលមានស្ដង់ដាត្រឹមត្រូវ ដាក់លក់ផ្សារទំនើប និងម៉ាតមួយចំនួនក្នុងប្រទេសកម្ពុជា ដើម្បីជំនួសឱ្យផលិតផលទឹកត្រចៀកកាំរបស់ថៃ បន្ទាប់ពីប្រជាជនខ្មែរពហិការឈប់គាំទ្ររួចមក។

សហគ្រិនរូបនេះ បានឱ្យដឹងទៀតថា មូលហេតុដែលលោកប​ង្កើតប្រេនឈ្មោះទឹកត្រចៀកកាំនេះ ដោយសារតែលោកចង់ឱ្យខ្មែរអាចមានផលិតផលដែលមានស្ដង់ដាមួយដោយខ្លួនឯង។ ក្រៅពីនេះ លោក ញ៉ែម ប៊ុនថា ក៏មានផ្ទះអភិរក្សសត្វត្រចៀកកាំដែលជាអាជីកម្មផ្ទាល់ខ្លួនស្រាប់ ដែលស្ថិតនៅខេត្តព្រះសីហនុ និងខេត្តកំពង់ចាម ផងដែរ។ កត្តាទាំងនេះហើយ ដែលនាំឱ្យសហគ្រិនរូបនេះ​ ចង់បង្កើតផលិតសម្រេចមួយសម្រាប់ផ្គត់ផ្គង់ទីផ្សារក្នុងស្រុក។

សម្រាប់ពេលបច្ចុប្បន្ន លោក ញ៉ែម ប៊ុនថា ក៏មានអាជីវកម្មកែច្នៃសំបុកត្រចៀកកាំ និងផលិតទឹកត្រចៀកកាំដាក់លើលើទីផ្សាររួចខ្លះមកហើយដែរ។ ក្រៅពីមុខរបរទាំងនេះ លោក ញ៉ែម ប៊ុនថា ក៏មានអាជីវកម្មមួយទៀត នោះគឺទទួលរៀបចំផ្ទះអភិរក្សសត្វត្រចៀកកាំសម្រាប់អ្នកដែលចង់បង្កើតអាជីកម្មរកស៊ីខាងផលិតសំបុកត្រចៀកកាំទាំងនេះ ផងដែរ។

គួរឱ្យដឹងថា ផលិតកម្មសំបុកត្រចៀកកាំផលិតនៅកម្ពុជា ភាគច្រើនផលិត​នៅខេត្តជាប់​មាត់​សមុទ្រ ដូចជា៖ ខេត្តកំពត ខេត្តកោះកុង ប៉ុន្តែសក្ដានុពល​សម្រាប់​​ការវិនិយោគបន្ត បច្ចុប្បន្ន បាន​ប្ដូរ​មក​កាន់ខេត្តភូមិភាគកណ្ដាល មានដូចជា៖ ខេត្តកំពង់ធំ ខេត្តជុំវិញ​បឹង​ទន្លេសាប ខេត្តស្ទឹងត្រែង និងព្រះ​វិហារ​វិញ ដោយសារខេត្តជាប់មាត់សមុទ្រ មានការសាង​សង់​ច្រើន​លើសលប់។

តាមការប៉ាន់ស្មាន កម្ពុជាមានសមត្ថភាពផលិតសំបុកត្រចៀកកាំប្រមាណ ១០០ តោន ក្នុងមួយឆ្នាំ៕

អត្ថបទ ៖ សួស សិត