គម្រោងស្ដារគុណភាពផ្លូវ ៣៣ តភ្ជាប់ពីក្រុងកំពត ទៅព្រំដែនកម្ពុជា-វៀតណាម ជិតបញ្ចប់ការសាងសង់

គម្រោងស្តារ និងលើកកម្រិតគុណភាពផ្លូវជាតិលេខ៣៣ ប្រវែង៥២,៥៧ គីឡូម៉ែត្រ តភ្ជាប់ពីក្រុងកំពតទៅកាន់ច្រកលក (ព្រំដែនកម្ពុជា-វៀតណាម) សម្រេចបានការសាងសង់ជិត ១០០% (៩៨,៨៩%) គិតត្រឹមខែវិច្ឆិកា ឆ្នាំ ២០២៤។

លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងនៅថ្ងៃទី ០៥ ខែវិច្ឆិកា​ ឆ្នាំ ២០២៤ នេះថា ខ្សែផ្លូវដ៏សំខាន់មួយនេះ ត្រូវបានសាង​សង់​ប្រកបបច្ចេកទេសខ្ពស់ ដោយធានាតាមបទដ្ឋានត្រឹមត្រូវ ប្រកបដោយគុណភាព និងប្រើប្រាស់យូរអង្វែង។

គម្រោងពង្រីក និងលើកកម្រិតគុណភាពផ្លូវជាតិលេខ៣៣ ត្រូវបានប្រកាសបើកការដ្ឋានជាផ្លូវការ កាលពីថ្ងៃទី៣០ ខែធ្នូ ឆ្នាំ២០២២ មានតម្លៃសាងសង់ជាង ៦១លានដុល្លារអាមេរិក និងមានរយៈពេល៤០ខែ សាងសង់ដោយក្រុមហ៊ុនសាជីវកម្មស្ពានថ្នល់ចិន(CRBC)។

គម្រោងខ្សែផ្លូវនេះ មានប្រវែង៥២,៥៧គីឡូម៉ែត្រ តភ្ជាប់ពីខេត្តកំពត (បំបែកពីផ្លូវជាតិលេខ៣ ត្រង់ចំណុច​គ.ម១៤៨+១០០)​​​ ទៅកាន់ច្រកលក(ព្រំដែនកម្ពុជា-វៀតណាម)ដោយឆ្លងកាត់ភូមិសាស្រ្ត ស្រុកទឹកឈូ និងស្រុកកំពង់ត្រាច ខេត្តកំពត ឆ្លងកាត់ភូមិសាស្រ្ត ក្រុងកែប និងស្រុកដំណាក់ចង្អើរ ខេត្តកែប គ្រប់គ្រងដោយក្រសួងសាធារណការ និងដឹកជញ្ជូន៕