ផ្លូវជាតិលេខ៣៣ សាងសង់សម្រេចបានជាង ៣៥%លឿនជាងផែនការ

គម្រោងពង្រីក និងលើកកម្រិតគុណភាពផ្លូវជាតិលេខ៣៣ ពីទីរួមខេត្តកំពត ដល់ច្រកលក សម្រេចការ​សាងសង់​បានជាង ៣៥%លឿនជាងផែនការ បន្ទាប់ពីបានបើកការដ្ឋានរយៈពេល៨ខែរួចមក។

នៅក្នុងឱកាសចុះពិនិត្យបច្ចេកទេស និងវឌ្ឍនភាពការងារជាថ្មីម្តងទៀតគម្រោងពង្រីក និងលើកកម្រិតគុណភាព​ផ្លូវ​ជាតិលេខ៣៣នៅព្រឹកថ្ងៃទី១៨សីហានេះ លោក ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគ្រប់គ្រងសម្របសម្រួលគម្រោង បានឱ្យដឹងថាការចុះត្រួតពិនិត្យនេះធ្វើឡើងក្នុងគោលបំណងពិនិត្យមើល​ស្ថានភាពសាងសង់ស្ពានក្បាលរមាសថ្មី ត្រង់ចំណុចគីឡូម៉ែត្រលេខ០៤+៧៩១ និងត្រួតពិនិត្យលើការងារបច្ចេកទេស សាងសង់ផ្លូវតាំងពីដើមទី រហូតដល់ចុងទី។

ដើម្បីធានាឱ្យបានថាគម្រោងផ្លូវជាតិលេខ៣៣  អនុវត្តទៅតាមលក្ខណៈបទដ្ឋានត្រឹមត្រូវ ប្រកបដោយគុណភាព និងអាចប្រើប្រាស់បានយូរអង្វែង លោករដ្ឋលេខាធិការនិងជាប្រធានគ្រប់គ្រងសម្របសម្រួលគម្រោង នឹងអញ្ជើញ​ដឹកនាំក្រុមការងារបច្ចេកទេស ព្រមជាមួយឧបករណ៍ និងម៉ាស៊ីនត្រួតពិនិត្យគុណភាពស្រទាប់គ្រឹះផ្លូវ យកមកធ្វើតេស្ត នាដើមខែកញ្ញាខាងមុខនេះ។

ឆ្លៀតក្នុងឱកាសនេះដែរ លោករដ្ឋលេខាធិការ បានធ្វើការណែនាំដល់ក្រុមហ៊ុនសាងសង់ ត្រូវយកចិត្តទុក​ដាក់ឱ្យបាន​ខ្ពស់បំផុត ក្នុងការអនុវត្តការងារឱ្យបានត្រឹមត្រូវតាមលក្ខណៈបច្ចេកទេស លើសពីនេះទៅទៀត ក្រុមហ៊ុនត្រូវគិត​គូរឱ្យបានហ្មត់ចត់ពីសុវត្ថិភាពនៅតាមការដ្ឋាន ដោយដាក់ផ្លាកសញ្ញាផ្តល់ដំណឹង ផ្លាកសញ្ញាបញ្ជៀសចរាចរណ៍ ប្រើប្រាស់សម្លៀកបំពាក់ និងឧបករណ៍ការពារសុវត្ថិភាពឱ្យបានត្រឹមត្រូវ ព្រមទាំងស្រោច​ទឹកកាត់បន្ថយដីហុយ​ឱ្យបានជាប់លាប់ ជៀសវាងការរំខានបងប្អូនប្រជាពលរដ្ឋ។

គួរបញ្ជាក់ថា គិតត្រឹមថ្ងៃទី១៨ ខែសីហា ឆ្នាំ២០២៣ វឌ្ឍនភាពនៃគម្រោងស្តារ និងលើកកម្រិតគុណភាព​ផ្លូវជាតិ​លេខ៣៣ បានសម្រេចលទ្ធផលការងារសរុបចំនួន ៣៥,១២% ក្នុងនោះរួមមាន៖ (១) ការងារកាប់ឆ្ការ និងបោសសម្អាត សម្រេចបាន ៥២,៥៧ គ.ម (២) ការងារសាងសង់តួថ្នល់ Sub-grade សម្រេចបាន ៤៩,៨៧ គ.ម និង (៣) ការងារសាងសង់ស្រទាប់គ្រឹះរង Sub-base សម្រេចបាន ៣៧,៦៦ គ.ម។ តួលេខខាងលើបានបង្ហាញថា គម្រោងកំពុងអនុវត្តទៅលឿនជាងផែនការដែលបានគ្រោងទុក៕

អត្ថបទ៖ សំអឿន