ព័ត៌មានអន្ដរជាតិ

ឥណ្ឌូណេស៊ីត្រៀមនាំចេញទុរេនទៅចិន ដោយប្រជែងថៃ និងវៀតណាម

បានផុស

១ year មុន

នៅ

ថ្ងៃសុក្រ ២១ មីនា ២០២៥

ដោយ

ឥណ្ឌូណេស៊ីកំពុងបង្កើនការដាំដុះទុរេន និងបញ្ចប់ដំណើរការផ្លូវច្បាប់ដើម្បីចាប់ផ្តើមការនាំចេញទៅកាន់ប្រទេសចិន ដោយប្រជែងជាមួយប្រទេសនាំចេញទុរេនធំៗក្នុងតំបន់រួមមានថៃ និងវៀតណាម។ នេះបើតាមការចុះផ្សាយរបស់កាសែត South China Morning Post។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបោះជំហានបែបនេះ អាចឱ្យឧស្សាហកម្មទុរេនដ៏ធំរបស់ឥណ្ឌូណេស៊ីរកប្រាក់ចំណេញ ពីទីផ្សារចិនដែលមានតម្រូវការខ្លាំងសម្រាប់ផ្លែឈើប្រភេទនេះ។ ប៉ុន្តែអ្នកវិភាគនិយាយថា ឥណ្ឌូណេស៊ីប្រហែលមិនទាន់មានសមត្ថភាពបំពេញតម្រូវការអតិថិជនចិនភ្លាមៗនោះទេ ដោយសារតែតម្រូវការក្នុងស្រុកមានច្រើនរួចទៅហើយ។

កាលពីសប្ដាហ៍មុន រដ្ឋបាលគយទូទៅរបស់ចិនបានធ្វើដំណើរទៅកាន់ឥណ្ឌូណេស៊ី ដើម្បីត្រួតពិនិត្យចម្ការទុរេនក្នុងស្រុក និងកន្លែងវេចខ្ចប់។ តាមទីភ្នាក់ងារសារព័ត៌មានរដ្ឋ Antara ការត្រួតពិនិត្យនឹងទំនងជាសម្រេចចិត្តថាតើ «កិច្ចសហប្រតិបត្តិការនាំចេញទុរេន» អាចបន្ត ឬអត់។

កាលពីខែកក្កដា ទីភ្នាក់ងារសារព័ត៌មានរដ្ឋចិន Xinhua បាននិយាយថា រដ្ឋាភិបាលឥណ្ឌូណេស៊ី «បានកំណត់ដើម្បីពន្លឿន» ការនាំចេញទុរេនពីខេត្ត Central Sulawesi ។ កាលពីខែមុន មានការរាយការណ៍ថា មន្ត្រីនៅទីក្រុងហ្សាកាតាកំពុង «បង្កើនកិច្ចខិតខំប្រឹងប្រែង» ដើម្បីចាប់ផ្តើមការនាំចេញទុរេនទៅចិន។

លើសពីនេះ ក៏មានសេចក្ដីរាយការណ៍ផងដែរថា ក្រសួងកសិកម្មរឥណ្ឌូណេស៊ី បានកំណត់ភូមិចំនួន ៤២២ ជុំវិញប្រជុំកោះ ដើម្បីផ្តោតលើការដាំដុះទុរេន ក្នុងក្ដីសង្ឃឹមជាវិជ្ជមានសម្រាប់ការនាំចេញទុរេនទៅកាន់ប្រទេសចិន។

ការត្រៀមខ្លួនរបស់ឥណ្ឌូណេស៊ី នឹងក្លាយជាការប្រកួតប្រជែងជាមួយប្រទេសនាំចេញទុរេនធំៗផ្សេងៗរួមមានថៃ និងវៀតណាម ដែលកំពុងទទួលរងនូវការត្រួតពិនិត្យការនាំចេញទុរេនទៅចិនយ៉ាងតឹងរុឹង ជុំវិញបញ្ហាប្រើប្រាស់ថ្នាំគីមីដែលអាចបង្កជំងឺមហារីកលើផ្លែទុរេន។

ថៃបាននាំមុខគេលើទីផ្សារទុរេនរបស់ចិនជាយូរមកហើយ ដោយរួមចំណែកលើការផ្គត់ផ្គង់ ៥៧ ភាគរយ ក្នុងទំហំតម្លៃនៃការនាំចេញ ៦,៩៩ ប៊ីលានដុល្លារ កាលពីឆ្នាំមុន។ វៀតណាមគឺជាអ្នកផ្គត់ផ្គង់ធំទី២ ហើយបន្ទាមកមកគឺហ្វីលីពីន និងម៉ាឡេស៊ី។ នេះបើយោងតាមទិន្នន័យគយរបស់ចិន។

អ្នកជំនាញលើកឡើងថា ថៃ និងម៉ាឡេស៊ីបានបង្កើតខ្សែចង្វាក់ផ្គត់ផ្គង់ និងការទទួលស្គាល់ម៉ាកយីហោនៅក្នុងប្រទេសចិនរួចហើយ ដូច្នេះឥណ្ឌូណេស៊ីចាំបាច់ត្រូវតែធ្វើឱ្យគេស្គាល់៕