ព័ត៌មានជាតិ

សូត្រខ្មែរ កំពុងមានតម្រូវការខ្ពស់នៅលើទីផ្សារ

បានផុស

២ ខែ មុន

នៅ

ថ្ងៃពុធ ៧ ឧសភា ២០២៥

ដោយ

អ្នកស្រី ហេង ណៃស៊ី ដែលជាអ្នកត្បាញសូត្រខ្មែរ រស់នៅភូមិព្រែកបង្កង សង្កាត់ព្រែកតាកូវ ក្រុងអរិយធម៌ ខេត្តកណ្តាល បានឱ្យ «កម្ពុជាថ្មី» ដឹងថា បច្ចុប្បន្ននេះត្បាញសូត្រខ្មែរ កំពុងមានតម្រូវការខ្ពស់នៅលើទីផ្សារ សំខាន់ឱ្យតែតម្បាញសូត្រត្បាញបានស្អាតល្អ និងមានភាពប្រណិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី បានលើកឡើងថា មុខរបរត្បាញសូត្រខ្មែរនេះ អ្នកស្រីបានបន្តពីម្តាយ ដែលបន្តមកពីជំនាញយាយទូត រហូតមកដល់ពេលបច្ចុប្បន្ន។ ជាក់ស្តែងនាពេលបច្ចុប្បន្ននេះសូត្រខ្មែរមានតម្រូវការខ្ពស់ ប៉ុន្តែក៏ទាមទារឱ្យការត្បាញសូត្រនោះបានស្អាតល្អផងដែរទើបអាចលក់បានតម្លៃល្អនៅលើទីផ្សារ។

ទោះជាមានតម្រូវការខ្ពស់ក៏ពិតមែន ប៉ុន្តែ អ្នកស្រី ហេង ណៃស៊ី បានឱ្យដឹងថា ទីផ្សារសូត្រខ្មែរ គឺអ្នកនាំចេញទៅកាន់តែទីផ្សារក្នុងស្រុកប៉ុណ្ណោះ ដូចជា បោះដុំឱ្យនៅផ្សារថ្មី តាមហាងម៉ូយចាស់ដែលធ្លាប់ទិញ និងអ្នកធ្លាប់ស្គាល់ជាដើម នៅមិនទាន់មានការនាំចេញទៅកាន់ទីផ្សារខាងក្រៅនៅឡើយទេ។

ជាមួយគ្នានោះដែរ ចំពោះតម្រូវការនៅក្នុងស្រុក សូត្រសុទ្ធក្នុងមួយក្បិន គឺអ្នកស្រីលក់បោះដុំ នៅក្នុងតំលៃមួយក្បិន ១៤០ ដុល្លារ និង ១៥០ ដុល្លារ។

ដោយសារត្បាញសូត្រទាមទារឱ្យអ្នកត្បាញមានជំនាញ ការយកចិត្តទុកដាក់ និងត្រូវត្បាញដោយដៃផង ក្នុងរយៈពេល ១ សប្ដាហ៍ ទៅ ១០ថ្ងៃ អ្នកស្រីត្បាញសូត្របានត្រឹមតែមួយក្បិនប៉ុណ្ណោះ នេះវាមិនមែនជាការងាយស្រួលទេ ណាមួយក៏មានបង្ករំខានដោយសារអាកាសធាតុផង។ នេះបើយោងតាមអ្នកស្រី។

យ៉ាងណាមិញ ព្រោះតែចំណាយពេលយូរនៅក្នុងការផលិត អ្នកស្រី ហេង ណៃស៊ី បានបន្តថា តម្រូវការទីផ្សារមានច្រើន ជាក់ស្តែង សព្វថ្ងៃនេះការផលិត នៅមិនទាន់គ្រប់ និងអាចផ្គត់ផ្គង់បានទាន់ពេលវេលាទៅតាមតម្រូវការទីផ្សារនៅឡើយទេ។

ក្នុងនាមជាអ្នកត្បាញសូត្រខ្មែរមួយរូប អ្នកស្រី ហេង ណៃស៊ី ក៏បានអំពាវនាវដល់ប្រជាពលរដ្ឋ មេត្តនៅតែជួយបន្តប្រើប្រាស់ផាមួងសូត្រខ្មែរ និងដើម្បីជួយលើកស្ទួយវប្បធម៌ប្រពៃណីខ្មែរយើង ដែលបានបន្សល់ទុកតាំងពីដូនតា និងបន្តទៅពេលអនាគត៕