រដ្ឋាភិបាលពិភាក្សាលើសំណើរចុះបញ្ជីគម្រោង​វិនិ​យោគ​ ១២ គម្រោង មានទុនជាង ៣០០ លានដុល្លារ

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា នៅថ្ងៃទី ១២ ខែឧសភា ឆ្នាំ ២០២៥​ បានរៀបចំកិច្ចប្រជុំច្រកចេញចូលតែមួយ ដើម្បីពិនិត្យពិភាក្សាលើសំណើសុំចុះបញ្ជី​គម្រោងវិនិយោគមានលក្ខណៈសម្បត្តិគ្រប់គ្រាន់ចំនួន​១២គម្រោង និងគម្រោង​ពង្រីក​បន្ថែម​ទីតាំង​វិនិយោគថ្មី​ចំនួន១​គម្រោង (គម្រោងអាជីវកម្មរ៉ែដែក នៅខេត្តកំពត) ​ក្រោមវត្តមានលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា។

គម្រោងវិនិយោគទាំងនេះ មានទុនវិនិយោគសរុបប្រមាណ ៣១៨លានដុល្លារអាម៉េរិក អាច​បង្កើតការ​ងារបានប្រមាណ ៧,៣ពាន់កន្លែង និងមានមុខសញ្ញាវិនិយោគក្នុងវិស័យ​ឧស្សាហ​កម្មចំនួន ១១គម្រោង ដែលគ្រោងបោះទីតាំងនៅខេត្តកណ្តាល កំពង់ស្ពឺ តាកែវ កំពត និង​មណ្ឌលគិរី។

គិតចាប់ពីខែមករា ដល់ខែមេសា ឆ្នាំ ២០២៥ ក្រុមប្រឹក្សាអភិវឌ្ឍន៍កម្ពុជា​បានអនុម័តគម្រោង​វិនិយោគសរុបចំនួន ២៣១ គម្រោង ជាមួយទំហំទឹកប្រាក់ប្រមាណ៣,៤ ​ពាន់​លានដុល្លារ​អាម៉េរិក កើនឡើង ៣៤% ធៀបនឹងរយៈពេលដូចគ្នានៅឆ្នាំ ២០២៤៕