ទុរេនបែកអន្លូងចាប់ផ្ដើមប្រមូលផល រដូវកាលថ្មី

សហគមន៍កសិកម្ម ទុរេនបែកអន្លូងស្ទឹងត្រង់ បានបញ្ជាក់ថា រដូវកាលប្រមូលផលទុរេនបែកអន្លូង​នៅស្រុកស្ទឹង​ត្រង់ខេត្តកំពង់ចាម ចាប់ផ្ដើមប្រមូលផលបណ្ដើរៗ ចាប់ពីថ្ងៃទី ១២ ខែឧសភា ឆ្នាំ ២០២៥ ខណៈសហគមន៍គ្រោងធ្វើកម្មវិធីបើករដូវកាលប្រមូលផល ២០២៥ ឆាប់ៗនេះ។

លោក ហេង ឆេងលី ប្រធានសហគមន៍ទុរេនបែកអន្លូង ប្រាប់កម្ពុជាថ្មីថា ចម្ការក្នុង​សមាជិក​សហ​គមន៍មួយចំនួនអាចចាប់ផ្ដើមកាត់ប្រមូលផលបានខ្លះៗជាបណ្ដើរៗ ដោយលក់ក្នុងតម្លៃ ១ ម៉ឺន ៧ ពាន់រៀល ក្នុងមួយគីឡូក្រាម (លក់ទំហំតិចចេញពីចម្ការ)។

សហគមន៍ទុរេនបែកអន្លូង បន្តអំពាវនាវឱ្យអាជីវករបោះដុំលក់រាយ និងម្ចាស់ចម្ការទុរេន ត្រូវស្វែងយល់ និងដឹងពីប្រភពទុរេនឱ្យបានច្បាស់ដើម្បីសម្រេចចិត្តទិញ លក់ និងរក្សាសុខមាលភាពរបស់ខ្លួន។

សហគមន៍​ទុរេនបែកអន្លូងមានសមត្ថភាព​ផលិត និងប្រមូល​ផល​ទុរេន​បានប្រមាណ ២ ពាន់ ៥០០ តោន ដើម្បីផ្គត់ផ្គង់​តម្រូវការលើ​ទីផ្សារ​៕