ក្រុមហ៊ុនចិនចង់ដាក់​ទុនវិនិយោគលើការ​ចម្រាញ់​ប្រេង ​នៅកម្ពុជា

ក្រុមហ៊ុន Beijing Sainte Holding Co., Ltd. របស់ចិន មានបំណងមកបណ្តាក់ទុនវិនិយោគ​ក្នុង​វិស័យ​ចម្រាញ់ប្រេងនៅកម្ពុជា។

លោក ជា វុទ្ធី អគ្គលេខាធិ​ការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា នៅ​ថ្ងៃ​ទី ១២ ខែឧសភា ឆ្នាំ ២០២៥ បាន​ទទួល​ជួបពិភាក្សាការងារជាមួយ​គណៈប្រតិភូនៃ​ក្រុមហ៊ុន Beijing Sainte Holding Co., Ltd. ដែលដឹកនាំដោយលោក ឆិន យីងលាវ (Chen Yingliu) អគ្គនាយកក្រុមហ៊ុន។

ក្រុមហ៊ុនបានសន្យា និងមានការបេ្តជ្ញាចិត្តខ្ពស់ក្នុងការនាំយកជំនាញ និងបច្ចេកវិទ្យាទំនើប និងឈានមុខពីប្រទេសចិនដើម្បីអនុវត្តគម្រោងនេះឱ្យបានជោគជ័យ។ លើសពីនេះ ក្រុមហ៊ុន Beijing Sainte Holding Co., Ltd សង្ឃឹមថា គម្រោងនេះនឹងអាចរួមចំណែក​ជួយគាំទ្រដល់​ការអភិវឌ្ឍសេដ្ឋកិច្ច-សង្គមកម្ពុជាផងដែរ។

លោក ជា វុទ្ធី បានស្វាគមន៍ចំពោះគណៈប្រតិភូ និងប្រាប់អំ​ពីសាវតាររបស់ក្រុមហ៊ុន​ចម្រាញ់ប្រេងមួយ​ចំនួននៅកម្ពុជា និងបទពិសោធន៍និងភាពជោគជ័យរបស់ក្រុមហ៊ុន​មួយចំនួនដូចជានៅប្រទេសសិង្ហបុរី និងប្រទេសកូរ៉េជាដើម។

លោក ជា វុទ្ធី បានស្នើឱ្យក្រុមហ៊ុនធ្វើការជ្រើសរើសទីតាំងសមស្របដើម្បីធ្វើការបង្កើតរោងចក្រ សំដៅកាត់បន្ថយការប៉ះពាល់បរិស្ថាន និងប្រជាពលរដ្ឋដែលរស់នៅក្បែរតំបន់នោះ។

បន្ថែមពីនេះ លោកអគ្គលេខាធិការក៏បានលើកទឹកចិត្តឱ្យក្រុមហ៊ុនបង្កើតតំបន់សេដ្ឋកិច្ចពិសេសមួយសម្រាប់តែឧស្សា​ហកម្មចម្រាញ់ប្រេង៕