ព័ត៌មានជាតិ

សហគមន៍ស្រុកភ្នំព្រឹក ផ្គត់ផ្គង់បន្លែជាង ៣០០ តោននៅ ៥ ខែ ឆ្នាំនេះ

បានផុស

៥៣ នាទីutes មុន

នៅ

ថ្ងៃចន្ទ ១៦ មិថុនា ២០២៥

ដោយ

លោក ហ៊ុន វត្ថា ប្រធានសហគមន៍កសិកម្មពន្លឺថ្មីពេជ្រចិន្តា បានប្រាប់ឱ្យដឹងថា រយៈពេល ៥ ខែ នៃឆ្នាំ២០២៥ នេះ សហគមន៍អាចប្រមូលផលបានប្រមាណ ៣២០តោន សម្រាប់លក់នៅលើទីផ្សារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ៊ុន វត្ថា បានមានប្រសាសន៍ថា បច្ចុប្បន្ននេះនៅក្នុងសហគមន៍ ក្នុងរយៈពេល ១ខែ បានប្រមូលផលបន្លែបានចន្លោះពី ៥០-៦០តោន ទៅតាមប្រភេទមុខដំណាំ សម្រាប់នាំទៅលក់នៅតាមទីផ្សារទាំងក្នុងខេត្តបាត់ដំបង និងភ្នំពេញ។

ក្នុងនោះដែរ ក្រៅពីលក់ទៅលើទីផ្សារមួយចំនួននៅក្នុងខេត្ត និងតាមបណ្តាខេត្តមួយចំនួន លោក ហ៊ុន វត្ថា បានឱ្យដឹងថា បច្ចុប្បន្នសហគមន៍ក៏បានពង្រីកទីផ្សារទៅតាមព្រំដែនមួយចំនួនទៀតដូចគ្នាដែរ ដូចជា កំរៀង-ភ្នំព្រឹក និងទៅដល់ប៉ោយប៉ែតជាដើម។

ក្នុងនោះ គឺមានប្រជាកសិករ ដែលនៅចាំទទួលយកបន្លែទៅលក់បន្តបើកជាតូបតូចៗ គឺលក់តែបន្លែរបស់សហគមន៍តែប៉ុណ្ណោះ ក្នុងមួយថ្ងៃអាចនាំចេញទៅប្រមាណ៥០០-៦០០គីឡូ និងថ្ងៃខ្លះទៀត អាចឈានដល់ ៧០០គីឡូក្រាមក៏មាន។

«ក្រៅពីទីផ្សារថ្មីនៅតាមព្រំដែននេះ សហគមន៍ ក៏នាំចេញទៅតាមទីផ្សារមួយចំនួនផ្សេងទៀតដូចជា សៀមរាប និងរាជធានីភ្នំពេញ ដែលមានខាងទីផ្សារសហភាពជាអ្នកទទួលទិញ។» លោក ហ៊ុន វត្ថា បន្ថែមបែបនេះ។

សូមជម្រាបថា សហគមន៍កសិកម្មពន្លឺថ្មីពេជ្រចិន្តា មានទីតាំងស្ថិតក្នុងភូមិ ភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង ដែល សព្វថ្ងៃ នៅក្នុងសហគមន៍កសិកម្មពន្លឺថ្មីពេជ្រចិន្តា ធ្វើការនាំចេញបន្លែចម្រុះប្រមាណជាង ១០ មុខ ដែលមានដាំក្នុងសំណាញ់ លក់លើទីផ្សារចន្លោះពី ២ តោន ទៅ ២,៥ តោន ក្នុងមួយថ្ងៃ៕