សេដ្ឋកិច្ច

កម្ពុជារកចំណូលបានជិត ៥០០ លានដុល្លារ ពីការនាំចេញដំឡូងមី ធ្លាក់ចុះជាង ១០%

បានផុស

៨ ខែ មុន

នៅ

ថ្ងៃពុធ ១ តុលា ២០២៥

ដោយ

កម្ពុជាទទួលបានប្រាក់ចំណូល ៤៩៨ លានដុល្លារ ពីការនាំចេញដំឡូងមីនៅក្នុងរយៈពេល ៨ ខែ (មករា-សីហា) ឆ្នាំ ២០២៥ ធ្លាក់ចុះ ១០,៥២% ប្រៀបធៀបនឹងរយៈពេលដូចគ្នានៅឆ្នាំ ២០២៤។ នេះបើយោងតាមរបាយការណ៍របស់ក្រសួងពាណិជ្ជកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ងិន ឆាយ អគ្គនាយក នៃអគ្គនាយកដ្ឋានកសិកម្ម មានប្រសាសន៍ថា ការនាំចេញផលិតផលដំឡូងមីស្រស់នៅឆ្នាំនេះបានថយចុះ ដោយសារប្រជាកសិករបំប្លែងពីដំឡូងមីស្រស់ទៅក្រៀម និងកែច្នៃជាម្សៅ ដើម្បីអាចរក្សាទុកបានយូរ និងមានតម្លៃខ្ពស់។

លោក អិល ឈិញ ប្រធានសមាគមកសិករដំឡូងមីខ្មែរ មានប្រសាសន៍ថា តម្លៃទីផ្សារដំឡូងមីនៅតែជាបញ្ហាចោទសម្រាប់កសិករ នៅក្នុងឆ្នាំ ២០២៥ តម្លៃដំឡូងមីស្រស់ដាំក្បាលចុះរហូតដែលមានតម្លៃ ១២០ រៀលក្នុងមួយគីឡូក្រាម ខណៈដំឡូងមីស្ងួតអាចលក់បាន ៥២០ រៀល ក្នុងមួយគីឡូក្រាម។

លោក អិល ឈិញ បញ្ជាក់ថា មានកត្តាជាច្រើនបានធ្វើឱ្យតម្លៃដំឡូងមីធ្លាក់ចុះ កាលពីឆ្នាំ ២០២៤ កម្ដៅកើនឡើងខ្លាំងបានធ្វើឱ្យទិន្នផល និងគុណភាពដំឡូងធ្លាក់ចុះ។

ម្យ៉ាងទៀត កំណើននៃការដាំដុះនៅប្រទេសអាស៊ានចំនួន ៤ (ថៃ ឥណ្ឌូនេស៊ី វៀតណាម កម្ពុជា) បានធ្វើឱ្យបរិមាណ កើនឡើងលើសតម្រូវការ ខណៈទីផ្សារម្សៅមីលើសកលលោកធ្លាក់ចុះ បានធ្វើឱ្យតម្លៃដំឡូងមីធ្លាក់ចុះផងដែរ។

កសិករនៅភូមិប៉ៃឡាំ និងភូមិទួល ក្នុងឃុំចែងមានជ័យ នៃស្រុកបាណន់ ខេត្តបាត់ដំបង នៅតែមានការព្រួយបារម្ភទៅនឹងបញ្ហាទីផ្សារដំឡូងមី បើទោះបីជាឆ្នាំនេះអាកាសធាតុមានលក្ខណៈអំណោយផលល្អ ដែលបានធ្វើឱ្យផលដំណាំដំឡូងមី របស់ពួកគាត់នឹងហុចផលឲ្យច្រើនជាងការរំពឹងទុក។

អ្នកស្រី ផូ ថា បានព្រួយបារម្ភនឹងបញ្ហាទីផ្សារ នៅមិនទាន់ដឹងថា ធ្លាក់ចុះ ឬនៅដដែល ឬយ៉ាងណានោះទេ ខណៈទិន្នផលឆ្នាំនេះ ទាំងរូបអ្នកស្រី ទាំងអ្នកភូមិ នឹងប្រមូលបានច្រើនជាងឆ្នាំកន្លងទៅ។

បើតាមលោកស្រីទៅសួរនាំខាងសាយឡូ គេប្រាប់ថាមិនទាន់បានកំណត់នៅឡើយទេ ដល់ពេលចាប់ផ្តើមប្រមូលផល ទើបខាងសាយឡូកំណត់ និងសរសេរតម្លៃ ដាក់ជូនកសិករលើផ្លាកសាយឡូតែម្តង។

នៅក្នុងឆ្នាំ២០២៤ កម្ពុជានាំចេញដំឡូងមីស្រស់ជាង ៣ លានតោន (៣ ៤៤៣ ៧៦០), ចំណិតដំឡូងមីក្រៀមជិត ១ លានតោន (៩៦៤ ៦៨១) និងម្សៅដំឡូងមីចំនួន ៦០ ៥២៤ តោន គិតជាទឹកប្រាក់ប្រមាណ ៧២៨ លានដុល្លារ។

កម្ពុជាជាប់ចំណាត់ថ្នាក់ជាប្រទេសនាំចេញដំឡូងមីធំជាងគេទី៤ នៅអាស៊ី និងទី១០នៅលើពិភពលោក ដែលមានផ្ទៃដីដាំដុំដំឡូងមីប្រមាណ ៦០ ម៉ឺនហិកតាទៅ ៨០ ម៉ឺន ហិកតា៕

អត្ថបទ៖ ឡេង ដេត