អភិបាលខេត្តបន្ទាយមានជ័យព្រមានបិទអាជីវកម្ម និងដាក់ទោសអាជីវករ

បន្ទាយមានជ័យ៖ នៅថ្ងៃទី៧ ខែឧសភា ឆ្នាំ ២០២១នេះ អភិបាលខេត្តបន្ទាយមានជ័យដឹកនាំក្រុមការងារចម្រុះចុះរៀបចំ ផ្សារសិរីសោភ័ណ តាមស្តង់ដារសុវត្ថិភាព ដោយបានប្រមាននឹងបិទអាជីវកម្ម និងដាក់ទោសអាជីវករណាល្មើសមិនអនុវត្តវិធានការបង្ការការរីករាលដាលជំងឺកូវីដ-១៩។

លោក អ៊ុំ រាត្រី អភិបាលខេត្តបន្ទាយមានជ័យ បានព្រមានបិទអាជីវកម្ម ឬដាក់ទោសទណ្ឌទៅលើអាជីវកររូបណាដែលមិនបានអនុវត្តខ្ជាប់ខ្ជួនតាមការណែនាំរបស់រដ្ឋបាលខេត្ត។

លោកបានរៀបចំវិធានការណ៍ការពារនៃការឆ្លងរីករាលដាលជំងឺកូវីដ-១៩ ចូលក្នុងសហគមន៍ ដោយតម្រូវឱ្យអាជីវករ និងអ្នកទិញទាំងអស់ ត្រូវតែចូលរួមអនុវត្តវិធានការសុខាភិបាល ពាក់ម៉ាសឱ្យបានត្រឹមត្រូវ អនុវត្ត៣កុំ៣ការពារ។

លោកអភិបាលបានបញរៀបចំផ្សារមានលក្ខណៈស្តង់ដារសុវត្ថិភាព ដោយតម្រូវឱ្យគ្រប់ផ្សារត្រូវតែមានច្រកចេញចូលធំទូលាយ មានម៉ាស៊ីនស្កេនវាស់កម្ដៅ បាញ់អាល់កុលមុនចូលផ្សារ អាជីវករត្រូវមានគម្លាតពីតូប១ទៅតូប១ចម្ងាយ២ម៉ែត្រ។

លោក អ៊ុំ រាត្រី បានបញ្ជាក់ឱ្យដឹងទៀតថា រាល់មានករណីសង្ស័យដែលមានការពាក់ព័ន្ធជាមួយ ជំងឺកូវីដ-១៩ ត្រូវរាយការណ៍បន្ទាន់ទៅអាជ្ញាធរមានសមត្ថកិច្ចភ្លាមៗ។

លោក អ៊ុំ រាត្រី បានមានប្រសាសន៍ថា វិធានការរៀបចំផ្សារ សិរីសោភ័ណនេះដើម្បីចៀសវាងបិទផ្សារ ព្រោះកន្លងមកមានបុរសម្នាក់កើតជំងឺកូវីដ-១៩ ហើយមានម្តាយជាអ្នកលក់ដូរក្នុងផ្សារ។

ការរៀបចំផ្សារនេះក្រោមដឹកនាំដោយលោក អ៊ុំ រាត្រី អភិបាលខេត្តបន្ទាយមានជ័យ លោក ហ៊ឹល រ៉ាយ៉ា អភិបាលក្រុងសិរីសោភ័ណ លោក យ៉ាន់ ដោយវណ្ណ មេបញ្ជាការកងរាជអាវុធហត្ថក្រុងសិរីសោភ័ណ និងក្រុមការងារមួយចំនួន៕

អត្ថបទ៖ វ៉ាន់ ណាង