CambodiaTrade ផ្តល់ទំនុកចិត្តខ្ពស់សម្រាប់ទិញ-លក់ផលិតផលខ្មែរ ខណៈ ហេង វិសាល ជំរុញការចូលរួមគាំទ្រ

ស្របពេលកម្ពុជាកំពុងជំរុញចលនាគាំទ្រផលិតផលក្នុងស្រុក និងលើកកម្ពស់ភាពម្ចាស់ការនៃសេដ្ឋកិច្ចជាតិ តាមរយៈការកាត់បន្ថយការពឹងផ្អែកលើផលិតផលនាំចូលពីក្រៅប្រទេស ផ្សារពាណិជ្ជកម្មតាមប្រព័ន្ធអេឡិចត្រូនិកថ្នាក់ជាតិ «CambodiaTrade» របស់ក្រសួងពាណិជ្ជកម្ម បានក្លាយជាវេទិកាដ៏មានទំនុកចិត្តខ្ពស់សម្រាប់ប្រជាពលរដ្ឋខ្មែរ ក្នុងការទិញ និងលក់ផលិតផលខ្មែរ។

ជាមួយគ្នានេះដែរ អ្នកផលិតមាតិកាដ៏មានប្រជាប្រិយ លោក ហេង វិសាល ក៏បានចូលរួមផ្សព្វផ្សាយ និងលើកទឹកចិត្តឱ្យសាធារណជនគាំទ្រផលិតផលជាតិ ព្រមទាំងជំរុញឱ្យអាជីវករខ្មែរ ចូលរួមប្រើប្រាស់វេទិកា CambodiaTrade ដើម្បីពង្រីកទីផ្សារផលិតផលក្នុងស្រុកឱ្យកាន់តែទូលំទូលាយ។

នៅល្ងាចថ្ងៃទី១០ ខែមិថុនា ឆ្នាំ២០២៦ លោក ហេង វិសាល បានលើកឡើងពីសារៈសំខាន់ និងតម្លៃរបស់ផ្សារពាណិជ្ជកម្មតាមប្រព័ន្ធអេឡិចត្រូនិកថ្នាក់ជាតិមួយនេះ ដោយចាត់ទុកថា CambodiaTrade គឺជាផ្សារពាណិជ្ជកម្មដ៏មានប្រសិទ្ធភាពសម្រាប់ជួយដល់អាជីវកម្មក្នុងស្រុក និងជំរុញការប្រើប្រាស់ផលិតផលខ្មែរ ឱ្យកាន់តែរីកចម្រើនក្នុងយុគសម័យសេដ្ឋកិច្ចឌីជីថល។

CambodiaTrade ជាផ្សារពាណិជ្ជកម្មអេឡិចត្រូនិកថ្នាក់ជាតិដំបូងគេរបស់កម្ពុជា ដាក់ឱ្យដំណើរការជាផ្លូវការតាំងពីចុងខែមីនា ឆ្នាំ២០២២ ក្រោមការគ្រប់គ្រងរបស់ក្រសួងពាណិជ្ជកម្ម ក្នុងគោលបំណងជួយដល់សហគ្រាសធុនតូច និងមធ្យម (SMEs) នៅកម្ពុជា ឱ្យទទួលបានអត្ថប្រយោជន៍ពីពាណិជ្ជកម្មតាមប្រព័ន្ធអេឡិចត្រូនិក និងបង្កើនសក្តានុពលនៃការនាំផលិតផលខ្មែរ ទៅកាន់អតិថិជនទាំងក្នុង និងក្រៅប្រទេស។

បច្ចុប្បន្ន មានផលិតផលខ្មែរជាច្រើនប្រភេទត្រូវបានដាក់លក់នៅលើវេទិកាផ្សារនេះ ដែលមិនត្រឹមតែផ្តល់ភាពងាយស្រួលដល់អ្នកប្រើប្រាស់ក្នុងប្រទេសប៉ុណ្ណោះទេ ប៉ុន្តែក៏ជួយឱ្យប្រជាពលរដ្ឋខ្មែរដែលរស់នៅក្រៅប្រទេស អាចស្វែងរក និងបញ្ជាទិញផលិតផលពីស្រុកកំណើតបានយ៉ាងងាយស្រួលផងដែរ។

បើតាមក្រសួងពាណិជ្ជកម្ម សហគ្រាស ឬក្រុមហ៊ុនដែលមានបំណងចូលរួមលក់ផលិតផលនៅលើ CambodiaTrade ត្រូវតែបានចុះបញ្ជីជាផ្លូវការជាមួយក្រសួងពាណិជ្ជកម្ម ឬមានលិខិតអនុញ្ញាតប្រកបអាជីវកម្ម ព្រមទាំងមានវិញ្ញាបនបត្រពន្ធប៉ាតង់ និងលេខអត្តសញ្ញាណសារពើពន្ធ (VAT) ដែលមានសុពលភាព។ ជាពិសេស ផលិតផលដែលអនុញ្ញាតឱ្យដាក់លក់ គឺត្រូវតែជាផលិតផលដែលផលិតនៅក្នុងប្រទេសកម្ពុជា។

ធ្វើម៉េចទើបអាចចុះឈ្មោះលក់ផលិតផលខ្លួន​ លើគេហទំព័រ​ក្រសួងពាណិជ្ជកម្មបាន?

គួររំលេចដែរថា ផលិតផលដែលធ្វើដោយដៃ អាចនឹងមានតម្លៃខ្ពស់ខុសពីចេញពីរោងចក្រដែលពលរដ្ឋខ្មែរធ្លាប់ប្រើកន្លងមក តែបើនិយាយពីអត្ថប្រយោជន៍នៃផលិតផលក្នុងស្រុក គឺមានសុវត្ថិភាពសម្រាប់សុខភាពបំផុត ព្រោះទូទៅផ្សំឡើងដោយវត្ថុធាតុដើមពីធម្មជាតិ មិនបារម្ភពីសារធាតុរក្សាទុកក្នុងផលិតផលជាដើម។ល។

ទាក់ទងនឹងការគាំទ្រផលិតផលក្នុងស្រុកនេះដែរ អ្នកមានឥទ្ធិពលលើប្រព័ន្ធផ្សព្វផ្សាយ ពិសេសអ្នកស្ថិតក្នុងវិស័យជំនួញ ក៏ធ្លាប់បានលើកឡើងដូចគ្នាដែរថា ទោះជាកម្ពុជាស្ថិតនៅដំណាក់កាលនៃការចាប់ផ្តើមងាកមកពង្រីកការផលិតផលិតផលក្នុងស្រុក ប៉ុន្តែបើខ្មែររួមគ្នាគាំទ្រផលិតផលជាតិឱ្យផុសផុល រយៈពេលយូរទៅ ជឿថា អាចពីសិប្បកម្មធនតូច និងមធ្យម ប្រែក្លាយជារោងចក្រ សហគ្រាសសម្រាប់នាំចេញជាក់ជាមិនខាន៕ អត្ថបទ៖ សុធាវី