ធ្វើម៉េចទើបអាចចុះឈ្មោះលក់ផលិតផលខ្លួន​ លើគេហទំព័រ​ក្រសួងពាណិជ្ជកម្មបាន?

សម្រាប់ក្រុមហ៊ុន ឬសហគ្រាស ដែលមានបំណងចង់លក់ផលិតផលរបស់ខ្លួន លើគេហទំព័រក្រសួងពាណិជ្ជកម្ម (Cambodia Trade) គឺតម្រូវឱ្យជាក្រុមហ៊ុន ដែលចុះឈ្មោះផ្លូវការជាមួយក្រសួង មានលិខិតអនុញ្ញាតត្រឹមត្រូវ ហើយផលិតផល​ដែលចង់ដាក់លក់នោះ ត្រូវតែជាផលិតផល ផលិតនៅក្នុងស្រុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមក្រសួងពាណិជ្ជកម្ម ដើម្បីមានសិទ្ធិប្រើប្រាស់ ផ្សារខេមបូឌាត្រេដ (Cambodia Trade) សហគ្រាសធុនតូច​និងមធ្យម ត្រូវតែជាក្រុមហ៊ុន ឬសហគ្រាស ដែលបាន​ចុះឈ្មោះ​ជាផ្លូវការជាមួយ​ក្រសួងពាណិជ្ជកម្ម ឬមាន​លិខិតអនុញ្ញាត​​ប្រកប​អាជីវកម្ម។ ជាមួយគ្នានេះ ត្រូវមានវិញ្ញាបនបត្រ​ពន្ធប៉ាតង់ (Patent Certificate) និងលេខអត្តសញ្ញាណ​សារពើពន្ធ (VAT Certificate) ដែលមានសុពលភាព និងលក់បានតែផលិតផល​ ដែលផលិតនៅ​ក្នុងប្រទេសកម្ពុជា។

សូមជម្រាបថា ផ្សារខេមបូឌាត្រេដ ត្រូវបានសម្ពោធជាផ្លូវការដោយ លោក ចម ប្រសិទ្ធ អតីតរដ្ឋមន្ត្រីក្រសួងពាណិជ្ជកម្ម នៅថ្ងៃទី៣១ ខែមីនា ឆ្នាំ២០២២ និងបានបើកសម្រាប់ការចុះឈ្មោះ ពីសហគ្រាសធុនតូច​និងមធ្យម អាចលក់ទំនិញរបស់ខ្លួន នៅលើទីផ្សារនេះ (https://cambodiatrade.com/home-page)។

តាមរយៈការចុះឈ្មោះដើម្បីលក់ទំនិញនេះ ក្រុមការងារនៃក្រសួងពាណិជ្ជកម្ម នឹងធ្វើការត្រួត​ពិនិត្យនូវព័ត៌មាន និងឯកសារ​ទាំងអស់នោះ រយៈពេល ៣ថ្ងៃនៃថ្ងៃធ្វើការ។ នៅពេលដែលការចុះឈ្មោះត្រូវបានអនុម័តហើយ គឺអាចបំពេញស្តុករបស់ខ្លួនបាន ដោយគ្រាន់តែបង្ហោះផលិតផលទាំងនោះនៅលើទំព័រហាង។

គួរបញ្ជាក់ថា ផ្សារខេមបូឌាត្រេដ ជាផ្សារពាណិជ្ជកម្មតាមប្រព័ន្ធអេឡិចត្រូនិក (e-commerce marketplace) ដែលប្រតិបត្តិការតាមរយៈគេហទំព័រ CambodiaTrade.com ក្រោមការគ្រប់គ្រងរបស់ក្រសួងពាណិជ្ជកម្ម។ ផ្សារនេះ បង្កើត​ឡើង ក្នុងគោលបំណង​ជួយដល់​សហគ្រាសធុនតូចនិងមធ្យម នៅកម្ពុជា ក្នុងការលក់ផលិតផលក្របខណ្ឌ សមាហរណកម្ម (Enhanced Intergrated Framework) ក្រោមគម្រោងអភិវឌ្ឍពាណិជ្ជកម្ម តាមប្រព័ន្ធអេឡិច​ត្រូនិក​កម្ពុជា (Go4eCAM)។

គោលបំណងសំខាន់ គឺដើម្បីជំរុញឱ្យសហគ្រាសធុនតូចនិងមធ្យម ទទួលបានអត្ថប្រយោជន៍​ពីពាណិជ្ជកម្ម តាមប្រព័ន្ធអេឡិចត្រូនិក។ ក្រៅពីបើកឱ្យសហគ្រាសធុនតូចនិងមធ្យម ចុះឈ្មោះលក់ផលិតផល ក៏បើកសម្រាប់អ្នកចុះឈ្មោះ ប្រើប្រាស់​ដើម្បីទិញផលិតផលផងដែរ៕

អត្ថបទ៖​ សុធាវី