តាមពិត តួស្រីរឿង Squid Game មិនមែនជាតារាសម្ដែងទេ តែមានអាជីពមួយនេះ

ប្រិយមិត្តរបស់ភាពយន្តភាគកូរ៉េខាងត្បូងរឿង Squid Game ច្បាស់ជាបានស្គាល់ Player 067 ឬ Kang Sae Byeok ​ជាក់ជាពុំខាន។ នាងជាបេក្ខជនស្វិតស្វាញបំផុតនៅក្នុងការប្រកួត រហូតឈានដល់ហ្គេមទី៥ ដែលនៅសល់មនុស្សតែ ៣នាក់ប៉ុណ្ណោះ។

ថ្វីត្បិត ចុងក្រោយនាងមិនបានឈ្នះហ្គេម តែសមត្ថភាពសម្ដែងជាតួស្រីកម្រមាត់ក ហ្មត់ចត់ និងមានចិត្តអាណិតអាសូរអ្នកដទៃរបស់នាង ធ្វើឱ្យទស្សនិកជនពេញចិត្តពេញថ្លើមលើការសម្ដែងនេះជាខ្លាំង ទោះបីរឿងនេះជាការប្រឡូកក្នុងវិស័យសម្ដែងដំបូងរបស់នាងក៏ដោយ។

Kang Sae Byeok មានឈ្មោះពិត Jung Hoyeon មានកំណើតនៅទីក្រុង សេអ៊ូល ប្រទេសកូរ៉េខាងត្បូង។ នាងកើតថ្ងៃទី ២៣ ខែមិថុនា ឆ្នាំ ១៩៩៤ និងមានបងប្អូនពីរនាក់។

ត្បិតតែ Jung Hoyeon ទើបលេចមុខក្នុងវិស័យភាពយន្តលើកទី១ ប៉ុន្តែកេរ្តិ៍ឈ្មោះរបស់នាងមិនមែនទើបតែមានប្រជាប្រិយភាពនោះទេ។ នាងជាម៉ូដែលល្បីឈ្មោះប្រចាំកូរ៉េខាងត្បូង ក៏ជាតារាបង្ហាញម៉ូដលំដាប់អន្តរជាតិផងដែរ។ ជាមួយកម្ពស់ ១.៧៦ម៉ែត្រ នាងគឺជា Top Model ដ៏ល្បីដែលទស្សនាវដ្ដី Vogue ឱ្យរហ័សនាមថា “Korea’s Next Top Model” ហើយបច្ចុប្បន្ននាងក៏បានបង្ហាញខ្លួនជាតារាសម្តែងថែមទៀត។

តួអង្គ Squid Game រូបនេះចាប់ផ្តើមបង្ហាញម៉ូដតាំងពីអាយុ ១៦ ឆ្នាំមកម្ល៉េះ។ ក្រៅតែពីអាជីពជាតារាម៉ូឌែលលំដាប់កំពូលរបស់ប្រទេសកូរ៉េ នាងបានបង្ហាញវត្តមាននៅលើទស្សនាវដ្តីធំៗលំដាប់ពិភពលោកដូចជា Vogue Girl Korea, Nylon Korea និង ELLE Wedding ។ល។

បច្ចុប្បន្នតារាស្រីវ័យ ២៧ ឆ្នាំរូបនេះ មានមិត្តប្រុសរួចហើយ ជាមួយនឹងតារាសម្ដែងលោក Lee Dong Hwi ដែលអ្នកទាំងពីរចាប់ផ្ដើមទំនាក់ទំនងជាមួយគ្នាតាំងពីឆ្នាំ ២០១៥ មកម្ល៉េះ។

Jung Hoyeon ត្រូវបានគេដឹងថាជាមិត្តល្អម្នាក់របស់ Jennie សមាជិកក្រុម Blackpink ហើយនាងក៏ជាមិត្តល្អរបស់តារាសម្ដែង Lee Ho-Jung ដែលហ្វេន K-drama ភាគច្រើនស្គាល់នៅក្នុងរឿង Nevertheless។

នៅឆ្នាំ ២០២១ នេះ Jung Hoyeon បានបោះជំហានចូលប្រឡូកក្នុងការសម្តែងជាលើកដំបូងនៅក្នុងរឿង Squid Game របស់ក្រុមហ៊ុន Netflix រហូតធ្វើឱ្យនាងកាន់តែមានឈ្មោះបោះសំឡេងខ្លាំងឡើងមួយកម្រិតទៀត៕

ប្រែសម្រួល៖ សន្យា

ចុចអាន៖ ការពិតគួរឱ្យភ្ញាក់ផ្អើល ពីក្រោយភាពល្បីល្បាញនៃភាពយន្ត “Squid Game”

ចុចអាន៖ ចម្ងល់ចាក់ស្ត្រេះ ក្រោយបញ្ចប់រឿង ហ្វេនៗជំរុញឱ្យ “Squid Game” ផលិតវគ្គ២ឆាប់ៗ