រូបកាយឃ្លាតហើយ តើលោក សែម សង្វាត បានបន្សល់ទុកស្នាដៃអ្វីខ្លះនៅក្នុងជីវិតសិល្បៈ?

តារាចម្រៀងជើងចាស់លោក សែម សង្វាត បានទទួលមរណភាពហើយកាលពីវេលាម៉ោង១២ និង១០នាទីរំលងអធ្រាត្រ ឈានចូលថ្ងៃទី០១ ខែតុលា ឆ្នាំ២០២១ នៅក្នុងមន្ទីរពេទ្យ កុសុមៈ ហៅពេទ្យលោកសង្ឃ បន្ទាប់ពីលោកបានពុះពារជម្នះជំងឺប្រចាំកាយអស់ជាច្រើនឆ្នាំ។

តាមរយៈដំណឹងមរណទុក្ខដ៏សោកសៅ និងក្រៀមក្រំបំផុតសម្រាប់ក្រុមគ្រួសារលោក សែម សង្វាត នេះដែរ គេសង្កេតឃើញមហាជន និងអ្នកសិល្បៈជាច្រើនបានសម្តែងការសោកស្តាយ ព្រមជាមួយការផ្ញើសារចូលរួមរំលែកទុក្ខ។

បើទោះបីជារូបកាយរបស់លោក សែម សង្វាត ត្រូវឃ្លាតឆ្ងាយពីក្រុមគ្រួសារ មហាជន និងអ្នកគាំទ្រមិនអាចមានថ្ងៃត្រឡប់ក្រោយក៏ពិតមែន ប៉ុន្តែសម្រាប់កេរ្តិ៍ឈ្មោះ និងប្រជាប្រិយភាពរបស់លោកនៅតែរក្សាបានការចងចាំពីសំណាក់អ្នកគាំទ្រគ្នា។

ជាក់ស្តែងនៅមានចម្រៀងដែលជាសំនៀងរបស់លោកជាច្រើនបទ នៅតែដិតជាប់ក្នុងក្រអៅបេះដូងអ្នកគាំទ្រ និងមិត្ដសិល្បៈរួមជំនាន់នៅឡើយ។ លោកបានបន្សល់បទទាំងនេះតាមរយៈផលិតកម្ម រស្មីស្ទឹងសង្កែ និងផលិតកម្ម KH Promotion ដែលលោកធ្លាប់ច្រៀងកន្លងមក។

ចំពោះស្នាដៃនៃបទចម្រៀងល្បីៗរបស់លោក សែម សង្វាត ដែលទទួលបានការគាំទ្រយ៉ាងភ្លូកទឹកភ្លូកដីនោះរូបមាន បទ ជីវិតកម្មករឆ្លងដែន ស្នេហ៍តែអូន រាជនីដួងចិត្ដ សំបុត្រស្នេហ៍ក្នុងសៀវភៅអូន និងបទចម្រៀងជាច្រើនទៀត។

តួយ៉ាងនៅអំឡុងឆ្នាំ២០០០ លោក សែម សង្វាត និងក្រុម EvBand របស់លោកដែលមានដូចជា លោក ឃុំ ប៉ុណ្ណាដែត អ្នកនាង យក់ ឋិតរដ្ឋា អ្នកនាង ឱក សុគន្ធកញ្ញា និងលោក បូរ វិចិត្រ បានទទួលបានការគាំទ្រខ្លាំងណាស់ពីមហាជន។

គួរបញ្ជាក់ថា អតីតតារាចម្រៀង លោក សែម សង្វាត បានចាប់ផ្តើមឈឺ ស្គមស្គាំងខ្លាំង ដោយសារ បញ្ហាក្រពះ និង ពោះវៀន អស់រយៈពេលជាច្រើនឆ្នាំមកហើយ។ មរណភាពរបស់លោក សែម សង្វាត នាពេលនេះគឺបានកើតឡើងនៅថ្ងៃតែមួយបន្ទាប់ពីលោកត្រូវបានផ្តល់ដំណឹងថា កំពុងតែសង្គ្រោះបន្ទាន់នៅបន្ទប់ ICU នៃមន្ទីរពេទ្ យលោកសង្ឃ ដោយសារជំងឺបានវិវត្តកាន់តែធ្ងន់ធ្ងរ៕

អត្ថបទ៖ ចាន់រ៉ា