ចំណុចអ្វីខ្លះដែលជំរុញឲ្យ លីម តិចម៉េង ឆក់យកបេះដូងអ្នកគាំទ្រ រហូតក្លាយជាម្ចាស់ពាន Cambodian Idol

ទម្រាំទទួលបានជោគជ័យលើវិថីសិល្បៈ និងក្លាយជាម្ចាស់ពានរង្វាន់កម្មវិធីប្រកួតចម្រៀងលំដាប់ថ្នាក់ពិភពលោក Cambodian Idol រដូវកាលទី ៤ តើកំលោះតូច លីម តិចម៉េង មានចំណុចពិសេសអ្វីខ្លះ?

លីម តិចម៉េង មានស្រុកកំណើតនៅភូមិស្វាយមាស ឃុំបុសខ្នុរ ស្រុកចំការលើ ខេត្តកំពង់ចាម ដែលមានលោកឱពុកជាអ្នកដឹកសិស្សសាលារៀន ចំណែកឯអ្នកម្ដាយជាសន្តិសុខ និងលក់អីវ៉ាន់តិចតូច ហើយតិចម៉េងជាកូនបងនៅចំណោមបងប្អូន ៣ នាក់ក្នុងគ្រួសារ។ ម្ចាស់ជយលាភី Cambodian Idol រដូវកាលទី ៤ បានបញ្ឈប់ការសិក្សាឆ្នាំទី ៣ នៅសកលវិទ្យាល័យ ន័រតុន ផ្នែកសំណង់ស៊ីវិល ដោយសារបញ្ហាហិរញ្ញវត្ថុមិនអំណោចផល ទើបធ្វើឲ្យម្ចាស់ពានរង្វាន់រូបនេះបង្ខំចិត្តឈប់រៀន ដើម្បីប្រឡូកវិស័យសិល្បៈផ្គត់ផ្គង់ជីវភាព។

កំលោះតូច លីម តិចម៉េង ចាប់ផ្ដើមស្រលាញ់វិស័យសិល្បៈតាំងពីខ្លួនរៀនវិទ្យាល័យថ្នាក់ទី ១០ មកម៉្លេះ ដោយគ្រាន់តែមិនមែនជាសិល្បៈផ្នែកចម្រៀង គឺជាការរ៉េប និង Bet Box ប៉ុន្តែវាបានបរាជ័យទើបតិចម៉េងងាកមកចាប់ផ្នែកចម្រៀង និងតន្ដ្រីវិញរហូតបានចូលច្រៀងនៅ Pub មួយកន្លែងបាន ៤ ឆ្នាំមុនដាច់ចិត្តចូលប្រលង Cambodian Idol។

បើនិយាយពីចំណុចដែលជំរុញឲ្យកំលោះរូបសង្ហារ លីម តិចម៉េង ទទួលបានជោគជ័យ ក៏ព្រោះតែសំឡេងមានភាពខុសប្លែកពីគេ បូករួមជាមួយទេពកោសល្យនៃការប្រើប្រាស់សំឡេង គួបផ្សំនឹងទឹកដមដ៏ក្រអួនក្រអៅ អន្ទងចិត្តអ្នកស្ដាប់ឲ្យស្លុងទៅតាម។ លើសពីនោះទៅទៀត អ្នកគាំទ្រជាច្រើន បានកោតសរសើរពីភាពរួសរាយរាក់ទាក់ និងការឲ្យតម្លៃទៅអ្នកគាំទ្រ។

គួររំលឹកថា ​កាលពីយប់​ថ្ងៃទី​ ២៨ ខែសីហា ឆ្នាំ​ ២០២២​ នបេក្ខជន​ដែល​ឆ្លង​ដល់​វគ្គ​ផ្តាច់ព្រ័ត្រ​ ក្នុងកម្មវិធី Cambodian Idol រដូវកាលទី ៤ គឺមាន​ចំនួន​ ៤​ នាក់ រួមមាន​៖ លីម តិច​ម៉េង​,​ នាង ដា​វីន​,​ ថុល សុ​ភិ​ទិ និង ស៊ឹ​ម ច័ន្ទ​ពន្លឺ​៕

អត្ថបទ៖ ផានិត