ចំណេះជាស្ពាន! លីម តិចម៉េង ដាស់សតិអ្នកជំនាន់ក្រោយ គប្បីត្រងត្រាប់រៀនសូត្រ ជៀសវាងសោកស្តាយថ្ងៃក្រោយ

ទាក់ទងនឹងរឿងរ៉ាវដែលសិស្សមិនកត់មេរៀន ហើយបែរជានាំគ្នាវក់លេងទូរស័ព្ទធ្វើឱ្យអ្នកគ្រូខឹងរហូតយកសៀវភៅសិស្សបោះចេញក្រៅថ្នាក់ ខណៈនាំគ្នាសើចក្អាកក្អាយមិនខ្វល់អ្វីទៀតទៀតនោះ លោក លីម តិចម៉េង តារាចម្រៀងប្រុសវ័យក្មេងប្រចាំផលិតកម្ម រស្មីហង្សមាស បានបង្ហាញការមិនពេញចិត្តចំពោះសកម្មភាពនេះ និងដាស់តឿនថា “វិន័យសំខាន់ណាស់មិនអាចលេងសើចបានទេ ថ្ងៃណាមួយប្អូននឹងស្តាយក្រោយដោយសារតែសម្តីនេះ”។

តាមរយ:សកម្មភាពរបស់អ្នកគ្រូខាងលើនេះ កំពុងមានការវែកញែក និងមានការបញ្ចេញមតិមួយចំនួនដោយបង្ហាញការអាណិតដល់ទឹកចិត្តរបស់គ្រូដែលខំបង្ហាត់បង្រៀនចង់ឱ្យសិស្សចេះ ប៉ុន្តែសិស្សៗបែរជាមិនស្តាប់តាមគ្រូទៅវិញ ខណ:តារាចម្រៀងលោក លីម តិចម៉េង ក៏បានបញ្ចេញមតិជុំវិញរឿងនេះផងដែរ។

ផ្អែកតាមការបង្ហោះនៅលើទំព័រហ្វេសប៊ុកឈ្មោះ Bong Pich Kh បានរៀបរាប់ថា “សិស្ស​ស្ទើរមួយថ្នាក់​ គ្រូ​ឱ្យកត់មេរៀនអត់បានកត់ ទើប​​គ្រូខឹង​បានយកសៀវភៅ​បោះចេញក្រៅថ្នាក់មិនកាន់ជើង​គ្រូទេ តែមើលសិស្ស​ទាំងនោះទូរសព្ទដៃទំនើបគ្រប់គ្នា ដែលមានន័យថា​ពួកគេសប្បាយនឹង​កម្មវិធីក្នុងទូរសព្ទដោយមិនខ្វល់​នឹង​កិច្ចការ​សាលាចូលគិតម្ដងទៀត​ដើម្បីអនាគទំពាំងស្នងឬស្សី”។

ដោយឡែក ងាកមកចាប់អារម្មណ៍តារាចម្រៀងលោក លីម តិចម៉េង លើកឡើងដែរថា ជំនាន់ខ្ញុំគ្រូឱ្យកត់មេរៀន ឬទន្ទេញមេរៀន បើមិនគោរពតាមទេវិន័យគឺតឹងរឹងជាងនេះឆ្ងាយណាស់អាចសុីរំពាត់ ឬឈរនៅដងទង់ជាតិ១ថ្ងៃពេញ លើសពី៣ដង ត្រូវហៅពុកម៉ែ មកនិយាយគ្នាមិនបានសប្បាយបែបនេះទេ”។

តារាចម្រៀង លីម តិចម៉េង បានបន្ថែមថា “បើទូរស័ព្ទអាចប្រើបានតែពេលក្រៅម៉ោងសិក្សាតែប៉ុណ្ណោះ ម៉ោងសិក្សាអាចយកចូលថ្នាក់រៀនបានតែ 1280 ឬ Nចុចពិល តែប៉ុណ្ណោះ ការពារមានការអ្វីពីគ្រួសារ។ វិន័យសំខាន់ណាស់មិនអាចលេងសើចបានទេ ថ្ងៃណាមួយប្អូននឹងស្តាយក្រោយដោយសារតែសម្តីនេះ ប្អូនៗ ក្មួយៗវ័យសិក្សាត្រូវតែគោរពវិន័យសាលាអោយបានល្អគុណធម៌ត្រូវមានជាប់ខ្លួនជានិច្ច”

តួយ៉ាង សាធារណជន ក៏សម្តែងក្តីបារម្ភផងដែរចំពោះការសិក្សារបស់អ្នកជំនាន់ក្រោយ ដែលហាក់មិនខ្វាយខ្វល់នឹងមុខការសិក្សារៀនសូត្រទាល់សោះ ខណៈមុខវិជ្ជាប្រវត្តិសាស្ត្រ ជាអ្វីដែលអ្នកជំនាន់ក្រោយខ្មែរគ្រប់រូប ត្រូវតែសិក្សាស្វែងយល់ជាដាច់ខាត៕ ដោយ ៖ ចាន់រ៉ា