វ៉ាន់ នីឡា ត្រៀមទទួលកាដូរកូនស្រីដំបូងក្នុងខែនេះ ខណៈ តា វ៉ិចទ័រ កាន់តែអន្ទះសារចង់ឃើញមុខចៅ

គេចាំបានថា តារាកំប្លែងវ័យក្មេងកូនស្រីបណ្តូលចិត្តលោក សុវណ្ណ រិទ្ធី ហៅលោកតា វ៉ិចទ័រ គឺអ្នកនាង វ៉ាន់ នីឡា កាលពីថ្ងៃទី១៩ ខែមីនា ឆ្នាំ២០២២កន្លងទៅបានសម្រេចក្តីសុបិន្តដោយបានចូលរោងការជាផ្លូវការជាមួយស្វាមី​វ័យប្រហែលគ្នា។

បន្ទាប់ពិធីមង្គលការបានមួយរយ:ខ្លីតារាកំប្លែង វ៉ាន់ នីឡា ក៏បានប្រកាសពីដំណឹងមានផ្ទៃពោះកូនដំបូងប្រមាណជាង៤ខែទៅហើយ។ កាលនោះដំណឹងនេះបានធ្វើឲ្យអ្នកគាំទ្ រនិងមហាជនមានការចាប់អារម្មណ៍គ្រប់គ្នាដោយហេតុថា នីឡា និងស្វាមីទើបតែចូលរោងការថ្មីថ្មោងសោះ តែមិននឹកស្មានមានកូនលឿនដល់ថ្នាក់ហ្នឹងទេ។

យ៉ាងណាមិញនៅក្នុងនោះដែរក៏មានមិត្តភក្តិ និងអ្នកគាំទ្រនាងមួយចំនួនទៀតបានសម្តែងការចូលរួមអបអរសាទរចំពោះដំណឹងដ៏ល្អនេះផងដែរ។ ក្រោយការសម្ងំពពោះ និងថែរក្សាសុខភាពទាំងម្តាយ-កូនអស់រយ:ពេលជាច្រើនខែនោះ ពេលនេះកាន់តែមានដំណឹងល្អសម្រាប់ស្វាមី-ភរិយាវ័យក្មេង១គូរនេះ ដោយអ្នកនាង វ៉ាន់ នីឡា ត្រៀមសម្រាលកូនស្រីដំបូង​នាអំឡុងខែកញ្ញានេះ ពោលគឺចំឱកាសរដូវបុណ្យភ្ជុំបិណ្ឌតែម្តង។

លោកតា វ៉ិចទ័រ ដែលជាឪពុករបស់អ្នកនាង វ៉ាន់ នីឡា បានប្រាប់ «កម្ពុជាថ្មី» ឲ្យដឹងតាមទូរស័ព្ទថា លោកពិតជារំភើបណាស់ ខណ:ដែលជិតបានឃើញមុខចៅស្រីសំណព្វចិត្តក្នុងពេលដ៏ខ្លីឆាប់ៗខាងមុខនេះ ។ បើតាមការបញ្ជាក់ពីសំណាក់​លោកតា វ៉ិចទ័រ បានឲ្យដឹងបន្ថែមថា នីឡា កំពុងត្រៀមខ្លួនសម្រាលកូនស្រីដំបូងរបស់គេនាអំឡុងខែកញ្ញាឆ្នាំ២០២២ នេះហើយ ខណ:លោកក៏ចង់ឃើញមុខចៅឆាប់ៗផងដែរ។

គួររំលឹកថា នៅក្នុងថ្ងៃសិរីមង្គលរបស់កូនក្រមុំដែលជាតារាកំប្លែង វ៉ាន់ នីឡា និងកូនកម្លោះរូបសង្ហាវ័យប្រហែលគ្នានេះ បើចាប់អារម្មណ៍ទៅមើលទិដ្ឋភាពមង្គលការ គឺបានរៀបចំតុបតែងយ៉ាងស្រស់ស្អាត។ កម្មវិធីនេះបានរៀបចំធ្វើឡើងទៅតាមការណែនាំរបស់ក្រសួងសុខាភិបាលទាំងអស់ ខណ:មានភ្ញៀវកិត្តិយស និងតារាល្បីៗជាច្រើនបង្ហាញវត្តមានចូលរួមអបដោយភាពសប្បាយរីករាយ៕

អត្ថបទ៖ ចាន់រ៉ា