កាន់តែមានភាពរំជើបរំជួល​និងបង្កការភ្ញាក់ផ្អើលទៀតហើយ នៅក្នុងវិស័យប្រឡងបវរកញ្ញាភេទទី ៣ នៅកម្ពុជាឆ្នាំ​២០២៣ ខណ:ដែលគិតមកទល់ពេលនេះមានជយលាភីលំដាប់រងចំនួន ៣ រូបហើយ បានប្រកាសលាលែងពីតំណែង។

បញ្ហានេះកំពុងធ្វើឲ្យអ្នកតាមដានវិស័យបវរកញ្ញានៅកម្ពុជា ផ្ទុះការវែកញែកជាបន្តបន្ទាប់ទៅលើស្ថាប័នអ្នករៀបចំកម្មវិធីព្រមទាំងរឿងរ៉ាវចម្រុងចម្រាស់មួយចំនួនទៀត ក្រោយបញ្ចប់ការប្រកួត Miss queen Cambodia 2023 ដែលទើប​រកឃើមម្ចាស់ម្កុដកាលពីថ្មីៗកន្លងទៅនេះ។ ទោះបីជាយ៉ាងណាជយលាភីរង ៣ រូប ដែលប្រកាសបោះបង់តំណែងនោះកំពុងទទួលបានការលើកទឹកចិត្តពីអ្នកគាំទ្រ។

ចំពោះបវរកញ្ញាដែលប្រកាសលាលែងតំណែងមុនគេគឺកញ្ញា ដេវីណា ម្ចាស់​ពាន Miss queen cambodia 2023 “first runner up” ដែល​បានប្រកាស​លាលែងពីតំណែងជាផ្លូវការ។ ចំណែកបវរកញ្ញា ដាវីកា ក៏​បានប្រកាសជាសាធារណ:លាលែងតំណែងចាប់ពីពេលនេះតទៅហើយ។

ដោយឡែកក្រោយអ្នកទាំង២ខាងលើបានប្រកាសដំណឹងនេះ ស្រាប់តែបវរកញ្ញាលំដាប់រងទី ៣ កញ្ញា ស្លឹក ឈើ ក៏បានប្រកាសនូវដំណឹងបោះបង់តំណែងដូចគ្នា។ ខ្លឹមសារបង្ហោះនោះ ស្លឹកឈើ បាននិយាយថា «នាង ខ្ញុំកញ្ញា ស្លឹកឈើ  ម្ចាស់ពាន Miss queen cambodia 2023 ចំណាត់ថ្នាក់ Third  runner up បានលាលែងពីតំណែងជាផ្លូវការហើយ។ សូមថ្លែងអំណរ គុណម្តងទៀតដល់បងប្អូនអ្នកគាំទ្រមិត្តភក្តិនិងក្រុមគ្រួសារដែលតែងតែមានការគាំទ្រលើកទឹកចិត្ត»។

ជាការកត់សម្គាល់នាពេលប៉ុន្មានថ្ងៃនេះគឺមានទស្សនិកជនចូលចិត្តតាមដាន និងអ្នកគាំទ្រវិស័យប្រឡងបវរកញ្ញាបង្ហាញ​ការ​ភ្ញាក់ផ្អើលគ្រប់គ្នា ខណ:ត្រឹមតែរយ:ពេល២ឬ៣ថ្ងៃប៉ុណ្ណោះក្រោយបញ្ចប់ការប្រកួតបរវកញ្ញា​ភេទ​ទី ៣ នៅកម្ពុជា ២០២៣ (Miss queen Cambodia 2023 ) ស្រាប់តែជយលាភីលំដាប់រងទី១ ,លំដាប់រងទី២និងលំដាប់រងទី៣ MQC2023 បានប្រកាសបោះបង់ពីតំណែងដូចគ្នា៕

អត្ថបទ៖ ចាន់រ៉ា