ជីវិតកម្សាន្ដ

ចំណុចពិសេសដែល មាស សុខសោភា រក្សាបានការគាំទ្រពីមហាជនគ្រប់វ័យ គ្រប់ស្រទាប់វណ្ណៈ

បានផុស

២ years មុន

នៅ

ថ្ងៃសុក្រ ៧ កក្កដា ២០២៣

ដោយ

បើនិយាយពីតារាចម្រៀងអ្នកនាង មាស សុខសោភា ថ្វីត្បិតតែបច្ចុប្បន្នចាកចេញពីទ្រនំចាស់ផលិតកម្មថោន មានរយៈពេលជិត ២ ឆ្នាំ ហើយពិតមែន តែសម្រាប់ទីផ្សារគាំទ្រ និងកេរ្តិ៍ឈ្មោះល្បីរបស់នាង នៅតែដក់ជាប់ក្នុងអារម្មណ៍ទស្សនិកជនមិនអន់ថយឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរក្សាបានប្រជាប្រិយភាព និងការគាំទ្រពីសំណាក់តារាចម្រៀងសំឡេងមនោសញ្ចេតនាអ្នកនាង មាស សុខសោភា នៅលើទីផ្សារសិល្បៈសព្វថ្ងៃនេះ ត្រូវបានអ្នកតាមដានវិស័យសិល្បៈខ្មែរវិភាគឃើញថា ដោយសារតារាស្រីរូបនេះមានឥទ្ធិពលសំឡេងអំណោយផលពីធម្មជាតិ ដែលធ្វើឲ្យអ្នកគាំទ្រ និងមិត្តៗ យុវវ័យ ស្ដាប់មិនចេះជិនណាយ ពិសេសបូករួមនឹងលក្ខណៈសម្បត្តិអត្តចរិតរួសរាយរាក់ទាក់មើលឃើញពីការផ្ដល់តម្លៃចំពោះអ្នកគាំទ្រ។

កត្តាទាំងនេះហើយ ទើបធ្វើឲ្យ មាស សុខសោភា អាចឈរជើងលំដាប់តារាកំពូលប្រចាំប្រទេស ហើយនេះក៏ជាជោគជ័យធំធេងសម្រាប់នាងលើវិស័យសិល្បៈផងដែរ។ ស្របពេល មាស សុខសោភា កំពុងជោគជ័យព្រមគ្នាទាំងសិល្បៈ និងអាជីពជំនួញខាងក្រៅ ស្រាប់តែមានការទម្លាយពីសំណាក់តារាសិល្បៈរៀមច្បង លោក សុះ ម៉ាច នូវចំណុចពិសេសរបស់តារាស្រីរូបនេះ ដែលអាចធ្វើឲ្យនាងរក្សាបានការគាំទ្រមិនថមថយលើវិស័យសិល្បៈ និងការសរសើរអត្តចរិត។

លោក សុះ ម៉ាច បានបញ្ជាក់ថា «មាស សុខសោភា ជាតារាចម្រៀងផ្នែកនារីដែលមានសំនៀងដ៏ស្រទន់ នាងច្រៀងបានគ្រប់គ្រងទម្រង់ ដោយនាងច្រៀងបានទាំងចម្រៀងប្រពៃណី ប្រជាប្រិយ សម័យដើម សម័យថ្មី យុវវ័យ និងភាសាបរទេសផងដែរ ដែលមិនសរសើរមិនបានសម្រាប់ខ្ញុំ»។

តារាចម្រៀងលោក សុះ ម៉ាច បាននិយាយទៀតថា «ចំណុចពិសេសទាំងនេះដែលធ្វើឲ្យនាងទទួលបានការគាំទ្រពីមហាជនគ្រប់វ័យគ្រប់ស្រទាប់វណ្ណៈ។ ពិសេសជាងនេះទៅទៀត អត្តចរិត ភាពរួសរាយស្និទ្ធស្នាល និងការរួមចំណែកជាមួយសង្គមជាតិជាដើម»។