មាស សុខសោភា ស្នើមហាជនផុសផុលចូលរួមគាំទ្រព្រឹត្តិការណ៍ប្រកួតបាល់ទាត់ នាចុងខែឧសភានេះ

តារាចម្រៀងសូរសៀវពីរោះរណ្តំ អ្នកនាងមាស សុខ សោភា ស្នើមហាជនពិសេសអ្នកស្នេហាវិស័យបាល់ទាត់ ចូលរួមទស្សនាការប្រកួតបាល់ទាត់ពានរង្វាន់ SOCCER LEAGUE លើកទី៨ ឆ្នាំ២០២៥ ឱ្យផុសផុល ដែលនឹងរៀបចំប្រកួត នាថ្ងៃទី៣១ ចុងខែឧសភានេះ នៅពហុកីឡដ្ឋានជាតិអូឡាំពិក។

ការចេញមុខបំផុសពីសំណាក់កំពូលតារាចម្រៀងអ្នក នាង មាស សុខសោភា ពេលនេះគឺក្នុងគោលបំណងដើម្បីជាចូលរួមលើកទឹកចិត្តដល់ក្រុមកីឡាករបាល់ទាត់ និងគាំទ្រដល់វិស័យកីឡាបាល់ទាត់នៅកម្ពុជា ខណ:ថ្ងៃនោះអ្នកនាងក៏នឹងមានវត្តមានច្រៀងផ្តល់ភាពសប្បាយរីករាយដល់អ្នកគាំទ្រផងដែរ។

អ្នកនាង មាស សុខសោភា បានឱ្យដឹងដែរថា ក្នុងកម្មវិធីបើកព្រឹត្តិការណ៍ការប្រកួតបាល់ទាត់ពានរង្វាន់ SOCCER LEAGUE លើកទី៨នេះ អ្នកនាងនឹងមានការសម្ដែងពិសេសបទចម្រៀង «រះឡើងជាមួយគ្នា» បង្ហាញជូនដល់អ្នកគាំទ្រផងដែរ។

តារាចម្រៀងស្រីល្បីឈ្មោះរូបនេះ ស្នើដូច្នេះថា “សូមបងប្អូនចូលរួមគាំទ្រនិងទស្សនាការប្រកួតបាល់ទាត់ឱ្យបានគ្រប់គ្នាហើយពិសេសថែមទៀតក៏នឹងមានវត្តមានរបស់អ្នកនាងចូលរួមច្រៀងអបអរគាំទ្រដល់ក្រុមកីឡាករបាល់នៅពហុកីឡដ្ឋានជាតិអូឡាំពិកថ្ងៃទី៣១ ខែឧសភា ឆ្នាំ២០២៥ ឆាប់ៗនេះផងដែរ”។

គួរជម្រាបថា SOCCER LEAGUE លើកទី៨ ឆ្នាំ២០២៥ ជាសកម្មភាពមួយក្នុងការរួមចំណែកក្នុងការលើកស្ទួយវិស័យបាល់ទាត់នៅកម្ពុជា ៕ អត្ថបទ៖ ចាន់រ៉ា