មាស សុខសោភា ស្នើឱ្យបន្តរួមសាមគ្គី និងណែនាំគ្នាជំនួសឱ្យការប្រមាថគ្រប់រូបភាព

ស្របពេលដែលបច្ចុប្បន្នស្ថានភាពនៅតាមបន្ទាត់ព្រំដែលហាក់មានសភាពស្ងប់ស្ងាត់បន្តិច ក្រោយទាហានសៀមឈ្លានពានមកលើទឹកដីប្រទេសកម្ពុជា តារាចម្រៀងអ្នកនាង មាស សុខសោភា បានចេញមុខអំពាវនាវដោយទទូចឱ្យពលរដ្ឋខ្មែរគ្រប់រូបបន្តរក្សាចិត្តឱ្យត្រជាក់ និងទុកចិត្តជឿជាក់លើថ្នាក់ដឹកនាំកម្ពុជា។ ពិសេសបន្តរួមសាមគ្គីគ្នាជាធ្លុងមួយ ហើយបើឃើញនរណាម្នាក់ប្រព្រឹត្តិអ្វីឆ្គាំឆ្គង សូមប្រើការណែនាំជំនួសឱ្យការប្រមាថ ខណៈនេះក៏បង្ហាញពីអត្តសញ្ញាណនៃពូជពង្សខ្មែរដ៏ថ្លៃថ្នូរផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាចម្រៀង មាស សុខសោភា បានឱ្យដឹងថា ដោយផ្អែកទៅលើស្ថានការណ៍ស្រុកទេស កំពុងកើតសង្រ្គាម ខ្លួនក៏មិនខុសថ្នាក់ដឹកនាមនោះដែរ គឺមានសេចក្តីព្រួយបារម្ភអំពីសុខទុក្ខពលរដ្ឋខ្លាំងណាស់។ ពិសេសប្រមុខដឹកនាំនៃរាជរដ្ឋាភិបាលកម្ពុជា ដែលលោកក៏កំពុងខ្នះខ្នែងព្យាយាមទប់ស្កាត់មិនចង់ឱ្យកើតមាននៅសង្រ្គាមបំផ្លិចបំផ្លាញដល់អាយុជីវិតមនុស្សលោក។

មាស សុខសោភា ថា “ឆ្លៀតក្នុងឱកាសនេះ ខ្ញុំសូមចិត្តពុកម៉ែបងប្អូនទាំងអស់គ្នា រក្សាភាពស្ងៀមស្ងាត់ដោយទុកឱ្យប្រមុខដឹកនាំរបស់យើងដែលលោកមានបញ្ញាញ្ញាណជាអ្នកដោះស្រាយ លោកមិនទុកពួកយើងចោលទេ អ្វីដែលសំខាន់ក្នុងពេលដែលកំពុងមានអាសន្ននេះ យើងទាំងអស់ត្រូវចេះរួមសាមគ្គីគ្នា ស្រលាញ់គ្នាទម្លាកក់ចោលនូវការជេប្រមាថគ្នាការយកកំហឹងមកធ្វើជាល្បិចកលដើម្បីដាក់ជាទោសកំហុសដល់គ្នា ក្នុងនាមយើងជាកូនខ្មែរដូចគ្នា ក៏ត្រូវនាំគ្នាបញ្ឈប់ការប្រមាថគ្នាត្រឹមនេះទៅចុះ”។

អ្នកនាង មាស សុខសោភា និយាយទៀតថា ក្នុងនាមខ្មែរតែមួយ មិនមែនជាសត្រូវនិងគ្នានោះទេ ដូច្នេះគួរតែចេះជួយចែករំលែកចំណេះដឹងល្អៗដល់គ្នា នាំគ្នាសាងអំពើល្អ ប្រកាន់ឱ្យខ្ជាប់នូវសច្ចធម៌ និងគុណធម៌ ព្យាយាមចែករំលែកគុណធម៌ទាំងឡាយដល់គ្នា។

បន្ថែមពីនេះ តារាចម្រៀងសំនៀងផ្អែមអ្នកនាង មាស សុខសោភា ណែនាំដែរថា កំហុសទាំងឡាយណាដែលមានគួរតែចេះអត់ឱនដល់គ្នា ចេះជួយអប់រំកែតម្រូវចំណុចខុសដល់គ្នាដោយសេចក្តីថ្លៃថ្នូរស័ក្តិសមជាពូជពង្សអំបូរខ្មែរ៕ ចាន់រ៉ា