ជីវិតកម្សាន្ដ

ឧកញ៉ា ព្រាប សុវត្ថិ គាំទ្រពេញទំហឹងចំពោះការបង្កើត “មូលនិធិកសាងហេដ្ឋារចនាសម្ព័ន្ធតាមបណ្ដោយព្រំដែន”

បានផុស

២ years មុន

នៅ

ថ្ងៃពុធ ២៨ សីហា ២០២៤

ដោយ

បន្ទាប់ពីចូលរួមបរិច្ចាគថវិកាចំនួន ២០០ លានរៀល ដល់ «មូលនិធិកសាងហេដ្ឋារចនាសម្ព័ន្ធតាមព្រំដែន» កំពូលតារាចម្រៀងងារជាឧកញ៉ា ព្រាប សុវត្ថិ បានប្រកាសពីឆន្ទៈរបស់ខ្លួនក្នុងការគាំទ្រយ៉ាងពេញទំហឹងចំពោះ សម្ដេចមហាបវរធិបតី ហ៊ុន ម៉ាណែត ដែលបានបង្កើតមូលនិធិកសាងហេដ្ឋារចនាសម្ព័ន្ធតាមបណ្ដោយព្រំដែននេះឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ព្រាប សុវត្ថិ បានឲ្យដឹងកាលពីរសៀលថ្ងៃទី ២៧ ខែសីហា ឆ្នាំ ២០២៤ ថា លោកសូមគោរព និងគាំទ្រសេចក្ដីប្រកាសរបស់ សម្ដេចមហាបវរធិបតី ហ៊ុន ម៉ាណែត ដែលបានបង្កើតនូវមូលនិធិកសាងហេដ្ឋារចនាសម្ព័ន្ធនានាតាមបណ្ដោយព្រំដែន ព្រមទាំងផ្ដល់ឱកាសឲ្យប្រជាពលរដ្ឋខ្មែរគ្រប់មជ្ឈដ្ឋាននៅក្នុង និងក្រៅប្រទេស បានចូលរួមចំណែកផ្ទាល់ជាមួយរាជរដ្ឋាភិបាលក្នុងបុព្វហេតុរួមគ្នាកសាងជាតិមាតុភូមិ។

កំពូលតារាចម្រៀង ព្រាប សុវត្ថិ បានបន្តថា នេះជាពេលវេលាល្អបំផុតដែលប្រជាជនខ្មែរទាំងអស់បានបង្ហាញឲ្យឃើញនូវកម្លាំងមហាសាមគ្គីជាតិខ្មែរគ្រប់ទិសទីរួមគ្នាកសាង ការពារ អភិវឌ្ឍន៍តាមតំបន់ព្រំដែន ឲ្យមានសុខសន្តិភាព និងបូរណភាពទឹកដី ឲ្យបានរឹងមាំគង់វង្សរហូតគ្រប់ជំនាន់។

លោកបានបញ្ជាក់ថា «ក្នុងនាមខ្ញុំបាទប្រជាពលរដ្ឋមួយរូប សូមគាំទ្រ និងបរិច្ចាគធនធានផ្ទាល់ខ្លួនចំនួន ២០០ លានរៀល ដើម្បីបង្ហាញពីស្មារតីចូលរួមជាមួយរាជរដ្ឋាភិបាលក្នុងការអភិវឌ្ឍហេដ្ឋារចនាសម្ព័ន្ធតាមតំបន់ព្រំដែន»។

បន្ថែមពីនេះ ឧកញ៉ា ព្រាប សុវត្ថិ បានបំផុសស្មារតីដល់មហាជនដែរថា «ខ្ញុំបាទសូមអំពាវនាវពុកម៉ែបងប្អូនចូលរួមឲ្យបានគ្រប់គ្នា ១ ០០០ រៀល ឬ ២ ០០០ រៀល ក្តី គឺបង្ហាញពីទឹកចិត្តបេះដូង និង ឆន្ទៈ នៃការស្រឡាញ់ និងប្ដេជ្ញាចូលរួមការពារទឹកដីរបស់យើងទាំងអស់គ្នា»៕

អត្ថបទ ៖ ចាន់រ៉ា