ឃើញរឿងថៃមួយកំពុងផ្ទុះការរិះគន់! សុគា គីមលាង ប្រាប់ថា យុគ៩ត្រូវសាងតែល្អឲ្យច្រើន

ស្របពេលដែលរឿងរឿងភាគបែបបុរាណរបស់ថៃមួយ ចំណងជើង “THE EMPRESS OF AYO DHAYA” ឬ «ម៉ែយូរ» របស់បុស្តិ៍ One31 សម្តែងដោយ Davika ចាក់ផ្សាយមិនទាន់បានប៉ុន្មានផង ក៏រងការរិះគន់យ៉ាងផុសផុលនៅក្នុងប្រទេសថៃ។

ដោយឡែកងាកមកចាប់អារម្មណ៍សិល្បការិនីឆ្នើម គឺនាដការីរបាំ កញ្ញា សុគា គីមលាង ហៅ កូនអាន ឯណេះវិញ ក៏បានចូលរួមបញ្ចេញមតិពាក់ព័ន្ធនឹងរឿងរ៉ាវនេះផងដែរ ដោយកញ្ញាបានលើកឡើងពីទស្សន:បែបដាស់តឿនថា “យុគ៩ ត្រូវចាំ សាងតែល្អកុំកើតជាចោរ សន្សំសុខនិងបុណ្យទៅក្រែងទៅវិញមានទ្រព្យបុណ្យជាប់ខ្លួនខ្លះ“។

ការលើកឡើងរបស់នាដការីរបាំរូបនេះ គឺបន្ទាប់ពីមានការបង្ហោះចែករំលែកនៅលើបណ្តាញសង្គមហ្វេសប៊ុក ភ្ជាប់ជាមួយខ្លឹមសារថា “រឿងបែបបុរាណរបស់ថៃ ចំណងជើង “THE EMPRESS OF AYODHAYA” ចូលរួមសម្តែងដោយ Davika របស់ one31 បានចំណាយទុនអស់លុយយ៉ាងច្រើនដើម្បីស្ដារ one31 ឡើងវិញ តែបែជាត្រូវបានគេរិះគន់សូម្បីតែជនជាតិថៃផ្ទាល់“។

ប្រភពដដែលបន្តថា មូលហេតុនៃការរិះគន់ ក៏ដោយសារតែរឿងមួយនេះ យកឆ្មាសប្បុរខ្មៅមួយមកបំពុលមែនទែន ហើយដូចបានឃើញនៅក្នុងរឿង ពេលដែលឆ្មាខ្មៅនោះត្រូវបានបំពុល វាប្រកាច់ និងស្រែកយ៉ាងគួរឲ្យអាណិត។
ហេតុដូច្នេះហើយ ទើបរឿងមួយនេះត្រូវបានគេរិះគន់ ចង់ឲ្យឈប់ចាក់ផ្សាយនិងនាំគ្នាតវ៉ាឈប់ទស្សនាផងដែរ។

មិនតែប៉ុណ្ណោះ អង្គការសង្គមស៉ីវិលអ្នកការពារសិទ្ធិសត្វចិញ្ចឹម ក៏កំពុងតែថ្កោលទោសដល់អ្នកដឹកនាំរឿង ចំពោះការរំលោភបំពានសិទ្ធិសត្វក្នុងពេលថតយ៉ាងធ្ងន់ធ្ងរដូចគ្នា ទាំងដែលឈុតនេះអាចប្រើ CGI, AI និង Animatronics បាន។

ជាមួយគ្នានោះ ក៏មានប្រភពខ្លះទៀតបញ្ជាក់ថា ក្រោយការរិះគន់ពេលនេះរឿងភាគ «The Empress of Ayodhaya» ឬ «ម៉ែយូរ» របស់បុស្តិ៍ One31 ដែលមានតារាស្រី Mai Davika ជាតួអង្គអាចប្រឈមនឹងការបញ្ឈប់ការបញ្ចាំងផ្សាយ ព្រោះតែមានឈុតឆាកទារុណកម្មទៅលើសត្វឆ្មា៕ អត្ថបទ៖ ចាន់រ៉ា