ទិដ្ឋភាពពិធីបុណ្យសពអ្នកនាង អ៊ុំ គន្ធា មានភាពស្ងប់ស្ងាត់ពុំសូវឃើញអ្នកសិល្ប:ចូលរួម

មហាជនពិតជាមានអារម្មណ៍ស្រងេះស្រងោច និងអាណិតជាខ្លាំង ខណ:ដែលពិធីបុណ្យអតីតតារាចម្រៀងល្បីឈ្មោះទសវត្សរ៍ ៩០ អ្នកនាង អ៊ុំ គន្ធា មានសភាពស្ងាត់ជ្រងំដោយពុំសូវមានវត្តមានអ្នកសិល្ប:ទៅចូលរួមឡើយ។ នេះតាមការបញ្ជាក់ពីលោក អុឹម ជីវ៉ា ។

តារាសម្តែងលោក អុឹម ជីវ៉ា បានឲ្យដឹងថា សម្រាប់ទិដ្ឋភាពនៃពិធីបុណ្យសពអ្នកនាង អ៊ុំ គន្ធា គឺមានលក្ខណ:ស្ងាត់ឈឹងដោយពុំមានអ្នកសិល្បៈចូលរួមទេ ឃើញតែវត្តមានរបស់លោកជំទាវចិត្តធម៌ ហ៊ុន សុីណាត បានអញ្ជើញទៅចូលរួមនិងរំលែកទុក្ខដ៏ក្រុមគ្រួសារសព ។

តារាសម្តែងលោក អុឹម ជីវ៉ា បានឲ្យដឹងទៀតថា អតីតតារាចម្រៀងល្បីឈ្មោះ អ៊ុំ គន្ធា បានទទួលមរណភាព កាលពីព្រលប់ថ្ងៃទី១៧ ខែវិច្ឆកា ឆ្នាំ២០២៤ នៅមន្ទីពេទ្យរុស្សី។ ក្នុងនោះគេឃើញសិល្បករ-សិល្បការិនីមួយចំនួនបានបង្ហាញក្តីរន្ធត់និងសោកស្តាយជាពន់ពេកបន្ទាប់ទទួលដំណឹងនៃមរណភាពអ្នកនាង អ៊ុំ គន្ធា ក្រោយនាងធ្លាប់ខ្លួនឈឺជំងឺសង្គមរុំារ៉ៃអស់រយ:ពេលជិត ២០ឆ្នាំ កន្លងទៅនេះ។

សពអតីតតារាចម្រៀងអ្នកនាង អ៊ុំ គន្ធា ធ្វើបុណ្យនៅវត្តពោធិ៍ចិនតុងផ្លូវសហព័ន្ធរុស្សី ខណ្ឌពោធិ៍សែនជ័យ រាជធានីភ្នំពេញ ហើយនឹងត្រូវបូជានៅល្ងាចថ្ងៃទី១៨ ខែវិច្ឆិកា ឆ្នាំ២០២៤នេះ វេលាម៉ោង ៦ល្ងាច។

គួរបញ្ជាក់ថា បន្ទាប់ពីឃ្លាតឆ្ងាយសិល្ប:យូរឆ្នាំមកនោះ គឺមានអ្នកគាំទ្រនិងទស្សនិកជនជាច្រើន តែងបង្ហាញនូវក្តីអាណិតខ្លាំងចំពោះអតីតតារាចម្រៀងសិចសុីអ្នកនាង អ៊ុំ គន្ធា ដែលមានជំងឺសង្គមជាប់ខ្លួនជិត ២០ឆ្នាំមកហើយ។

កន្លងអ្នកនាង អ៊ុំ គន្ធា ថ្វីត្បិតរាងកាយរបស់នាងត្រូវបានរួមរឹតដោយជំងឺកាចសាហាវយ៉ាងណាក៏ដោយក៏នាងនៅតែតស៊ូក្នុងឆាកជីវិតរហូតដល់ជីវិតចុងក្រោយនាពេលនេះ។ ដំណឹងនេះក៏ធ្វើឲ្យអ្នកសិល្ប:និងមិត្តភក្តិធ្លាប់រួមអាជីពមួយចំនួនផ្ញើរសារចូលរួមរំលែកទុក្ខដ៏ក្រៀមក្រំនេះជាមួយក្រុមគ្រួសារផងដែរ៕ អត្ថបទ៖ ចាន់រ៉ា