តារាសម្តែងជើងចាស់ រ៉េត រ៉ូស ប្រាប់អ្នកសិល្ប:ជំនាន់ក្រោយ ប្រយ័ត្នផលិតករកេងប្រវ័ញ្ចលើកម្លាំង

តារាសម្តែងជើងចាស់អ្នកស្រី រ៉េត រ៉ូស បានបង្ហាញការអន់ចិត្ត និងបានផ្តាំផ្ញើតួសម្តែងជំនាន់ក្រោយមួយចំនួន ឱ្យមានការប្រុងប្រយ័ត្នចំពោះបណ្តាផលិតករមួយចំនួនតូច ដែលតែងកេងប្រវ័ញ្ចលើកម្លាំងញើសឈាមរបស់អ្នកសិល្ប:ទាំងចាស់និងថ្មី។

តាមរយ:នៃការ​លើក​ឡើងពី​សសំណាក់អ្នកស្រី រ៉េ​ត រ៉ូ​ស នេះ គឺបន្ទាប់​ពី​គាត់បាន​ឆ្លងកាត់និងជួបប្រទះ នូវ​បញ្ហា​មួយ​នេះ​ដោយផ្ទាល់ ខណ:មកដល់ពេលនេះ នៅមិនទាន់មានដំណោះស្រាយនៅឡើយ។ តារាសម្តែងជើងចាស់រូបនេះ បានលើកឡើងថា សូមផ្ដាំដល់បងប្អូនសិល្បករពេលដែលទទួលគេថត ត្រូវសួរឱ្យច្បាស់ពីពេលវេលាកុំឱ្យខកចិត្តដូចខ្ញុំ ។

អ្នកស្រី រ៉េ​ត រ៉ូ​ស បានបញ្ជាក់ទៀតថា “ផលិតករមួយចំនួនតូច កេងប្រវ័ញ្ចលើកម្លាំងញើសឈាមតួចាស់ៗខ្លាំងណាស់ឱ្យយើងទៅដល់ទីតាំងម៉ោង ៧:៣០ព្រឹក ថតរហូតដល់ស្អែកឡើងម៉ោង ៦:០០ព្រឹកវិញ បានចប់ សុំសួរមតិបងប្អូនបន្តិចតើការគិតលុយឱ្យតែមួយថ្ងៃត្រឹមត្រូវដែរទេ សូមខមិនម្នាក់មួយមក តែខ្ញុំបានប្រាប់ថាខ្ញុំសុំគិត២ថ្ងៃ តែខាងផលិតកម្មនៅតែគិតឱ្យមួយថ្ងៃដូចជាបំបាក់ទឹកចិត្តយាយចាស់តាចាស់ពេកហើយ“។

តារាសម្តែងអ្នកស្រី រ៉េ​ត រ៉ូ​ស និយាយទៀតថា “ពេលតួចាស់ៗគេមិនហៅថតកាន់តែក្រ គ្មានលុយទិញថ្នាំបែរជានិយាយបែបមើលងាយថា ចាស់ៗសុំតែជំនួយចុះពេលដែលហៅគាត់ថតមួយរឿងមានប៉ុន្មានថ្ងៃ? ហើយមួយថ្ងៃឱ្យគាត់ប៉ុន្មានដែរ? នេះហើយជាហេតុផលដែលតួចាស់ដូចគាត់កាន់តែក្រ“។

បើមិនមានលុយសម្រាប់ចាយឱ្យតួ គឺសុំឱ្យតួជួយថតត្រង់ៗតែម្ដងសម្ដីពិតនិយាយពិតធ្វើពិតពីនាងខ្ញុំ រ៉េត រ៉ូស និងប្អូនៗក្រុមការងារ។ នេះគឺជាសម្តីរបស់តារាសម្តែង រ៉េត រ៉ូស បានបញ្ជាក់បន្ថែម៕ អត្ថបទ៖ ចាន់រ៉ា