ប៉ែន ចំរុង សួរយោបល់អ្នកគាំទ្រ គួរប្តឹងឬយ៉ាងណា ក្រោយមានអ្នកជេរប្រមាថដល់ម្តាយ

ពិធីករល្បីឈ្មោះលោក ប៉ែន ចំរុង បានបង្ហាញការហួសចិត្តជាខ្លាំង ខណ:ដែលសុខៗស្រាប់តែមានម្ចាស់គណនីហ្វេសប៊ុកម្នាក់ បានចូលទៅបញ្ចេញមតិជេរប្រមាថកាតទៀនដល់ម្តាយរបស់លោក នៅលើបណ្តាញទំនាក់ទំនងសង្គមជាសាធារណ:។ ត្រង់ចំណុចនេះ លោកលើកជាចំណោទសួរជាសាធារណៈដែរថា “អ្នកសិល្បៈចាំឱ្យតែគេធ្វើបាប មិនបាច់តបត ទោះគេជេឪពុកម្តាយ?“។

លោក ប៉ែន ចំរុង ដែលជាពិធីករសម្បូរវោហារស័ព្ទមិនចេះរីងស្ងួតនៅគ្រប់បណ្តាកម្មវិធីនានា ក៏បានលើកជាយោបល់សួរទៅកាន់មហាជនអ្នកគាំទ្រថា តើគួរប្តឹងឬមួយធ្វើយ៉ាងណាចំពោះមនុស្សបែបនេះ។ ប្រតិកម្មរបស់លោក ប៉ែន ចំរ៉ុង គឺបន្ទាប់ពីមានម្ចាស់គណនីហ្វេសប៊ុកមួយបានប្រើពាក្យពេចន៍យ៉ាងអសីលធម៌ជេរប្រមាថដល់ម្តាយរបស់លោក។

លោក ប៉ែន ចំរុង បានសួរសំនួរទៅកាន់អ្នកគាំទ្រខ្លួនថា “បើសុខៗគេ Comment ជេរយើងអ៊ីចឹង តើបងប្អូនគួរធ្វើម្តេច? សុំយោបល់ម្នាក់មួយមកបងប្អូន?“។ លោកបន្ថែមថា “១.ប្តឹង ( មិនទទួល ការសុំទោស ) ,២.សាកឱ្យគេជេរគាត់វិញ, ៣. Block ចោល, ៤. រកអត្តសញ្ញាណពិតពិនិត្យទឹកនោម និង ៥.ស្គាល់ឱ្យច្បាស់គាត់ឆ្កួតឬជា?“។

ពិធីករ ប៉ែន ចំរុង បន្តថា ចុះបើមានគេជេរឬប្រើពាក្យមិនល្អដល់ផ្ទះគាត់វិញតើគាត់ចេះឈឺអត់? ឬអ្នកសិល្បៈចាំឱ្យតែគេធ្វើបាបមិនបាច់តបត ទោះគេជេឪពុកម្តាយ?។

ទោះបីយ៉ាងណាលោក ប៉ែន ចំរុង មិនបានបញ្ជាក់ទេថាមូលហេតុដើមចមដែលបុគ្គលខាងលើឈានដល់ការជេរប្រមាថធ្ងន់ៗ ដល់ម្តាយលោកឡើយ ខណ:មានការលើកឡើងថា Facebook គេបង្កើតមកដើម្បីផ្សារភ្ជាប់ទំនាក់ទំនងនឹងចែករំលែកអ្វីដែរល្អៗ តែបុគ្គលអត់ខួរមួយចំនួនឱ្យតែមាន Facebook មួយ នឹងដើរជេគេជេឯងពេញហ្នឹង៕ អត្ថបទ៖​ចាន់រ៉ា