ព័ត៌មានអន្ដរជាតិ

រដ្ឋមន្ត្រីការពារជាតិតួកគី ថា ណាតូកំពុងសម្របខ្លួននឹងសន្តិសុខបច្ចុប្បន្ន ហើយអាមេរិកក៏គ្មានផែនការចាកចេញពីណាតូទេ

បានផុស

៣១ វិនាទី មុន

នៅ

ថ្ងៃអង្គារ ៣០ មិថុនា ២០២៦

ដោយ

ក្រោយមានបណ្តាញសារព័ត៌មានអន្តរជាតិធំៗ ចុះផ្សាយថា សហរដ្ឋអាមេរិកមានគម្រោងកាត់បន្ថយជំនួយដល់សម្ព័ន្ធមិត្តយោធាណាតូនៅតំបន់អឺរ៉ុប និងឈានដល់ទុកឱ្យសម្ព័ន្ធមិត្តនេះចេះរៀនរស់ខ្លួនឯងដោយគ្មានអាមេរិក នៅថ្ងៃអង្គារ៍នេះ រដ្ឋមន្ត្រីក្រសួងការពារជាតិតួកគី លោក Yasar Guler បានប្រាប់ទីភ្នាក់ងារសារព័ត៌មានរ៉យទ័រនៅថ្ងៃទី៣០ ខែមិថុនា នៅមុនកិច្ចប្រជុំកំពូលណាតូក្នុងទីក្រុងអង់ការ៉ាសប្តាហ៍ក្រោយ ថា អង្គការណាតូកំពុងសម្របខ្លួនទៅនឹងស្ថានភាពសន្តិសុខកំពុងផ្លាស់ប្តូរបច្ចុប្បន្ន ហើយសហរដ្ឋអាមេរិកគ្មានបំណងចាកចេញពីសម្ព័ន្ធភាពនេះទេ។

រដ្ឋមន្ត្រីក្រសួងការពារជាតិតួកគី លោក Yasar Guler ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ថា ប្រទេសតួកគីនឹងធ្វើជាម្ចាស់ផ្ទះទទួលមេដឹកនាំណាតូចំនួន ៣២រូប ក៏ដូចជាមេដឹកនាំមកពីតំបន់ឈូងសមុទ្រ និងអាស៊ីប៉ាស៊ីហ្វិក នៅថ្ងៃទី ៧-៨ ខែកក្កដា ខាងមុខ ចំពេលមានភាពតានតឹងក្នុងសម្ព័ន្ធភាពលើការចែករំលែកបន្ទុក ការចំណាយលើវិស័យការពារជាតិ និងការត្អូញត្អែររបស់សហរដ្ឋអាមេរិក អំពីការខ្វះការចូលរួមរបស់សម្ព័ន្ធមិត្តក្នុងការបើកច្រកសមុទ្រ Hormuz កាលពីថ្មីៗនេះ។

ក្នុងចម្លើយជាលាយលក្ខណ៍អក្សរ លោក Guler និយាយថា កិច្ចប្រជុំកំពូលនេះនឹងផ្តោតលើឯកភាពរបស់ប្លុក[សមាជិកណាតូ] ការវាយតម្លៃលើការចំណាយលើវិស័យការពារជាតិរបស់សម្ព័ន្ធមិត្ត ជំរុញកិច្ចសហប្រតិបត្តិការឧស្សាហកម្មការពារជាតិ និងបង្កើនការគាំទ្រដល់អ៊ុយក្រែន។

លោក បានបន្ថែមថា ទីក្រុងអង់ការ៉ាគួរតែចូលរួមក្នុងគំនិតផ្តួចផ្តើមការពារជាតិរបស់អឺរ៉ុប។

លោក Guler ថា៖ « អង្គការណាតូនៅតែជាសម្ព័ន្ធភាពមួយមិនអាចប្រៀបផ្ទឹមបាន ជាមូលដ្ឋានសម្រាប់សន្តិសុខ និងការពារជាតិអឺរ៉ុប-អាត្លង់ទិក។ យើងវាយតម្លៃរយៈពេលដែលយើងកំពុងឆ្លងកាត់មិនមែនជាវិបត្តិទេ ប៉ុន្តែជាដំណើរការនៃការសម្របខ្លួនទៅនឹងបរិយាកាសសន្តិសុខដែលកំពុងផ្លាស់ប្តូរ»។

លោក បន្តថា សហរដ្ឋអាមេរិកមិនមានបំណងដកខ្លួនចេញពីអង្គការណាតូទេ ប៉ុន្តែគ្រាន់តែចង់ឱ្យសម្ព័ន្ធមិត្តអឺរ៉ុបនិងកាណាដាទទួលខុសត្រូវបន្ថែមទៀត ចំពោះសន្តិសុខរបស់អឺរ៉ុប ហើយក៏ត្រូវរួមបញ្ចូលទីក្រុងអង់ការ៉ានៅក្នុងផែនការ និងគំនិតផ្តួចផ្តើមការពារជាតិផងដែរ៕

សម្រួល៖ ណឺ មិនា