២០២២ នឹងក្លាយជាឆ្នាំក្តៅបំផុតមួយ ក្នុងប្រវត្តិសាស្រ្ត (មានវីដេអូ)

ពិភពលោកប្រហែលជាជួបប្រទះឆ្នាំដ៏ក្តៅបំផុតមួយក្នុងប្រវត្តិសាស្រ្តនៅឆ្នាំ២០២២ខាងមុខ ដែលនេះគូសបញ្ជាក់ពីក្តីព្រួយបារម្ភអំពីតម្រូវការ ក្នុងការដោះស្រាយបម្រែបម្រួលអាកាសធាតុ។

ការិយាល័យ​​​​ព្យាករណ៍​អាកាស​ធាតុ ចក្រភពអង់គ្លេស (Met Office) បាននិយាយកាលពីដើមសប្តាហ៍មុនថា សីតុណ្ហភាពសកលជាមធ្យម ត្រូវបានគេរំពឹងថានឹងមានប្រហែល ១.០៩ អង្សាសេលើសពីកម្រិតមុនឧស្សាហកម្ម។

ថ្វីបើសីតុណ្ហភាពត្រូវបានគេរំពឹងថានឹងធ្លាក់ចុះបន្តិចក្នុងឆ្នាំខ្លះចាប់តាំងពីឆ្នាំ២០១៥មកក៏ដោយ ២០២២នឹងក្លាយជាឆ្នាំទី៨ជាប់ៗគ្នាដែលសីតុណ្ហភាពមានកម្រិតលើ១អង្សាសេ លើសពីសម័យមុនឧស្សាហកម្ម។

អ្នកវិទ្យាសាស្ត្រអាកាសធាតុបាននិយាយថា សីតុណ្ហភាពពិភពលោកនឹងបន្តកើនឡើង បើគ្មានការកាត់បន្ថយខ្លាំងក្លានៃការបំភាយឧស្ម័នផ្ទះកញ្ចក់ទេនោះ។ វានឹងបណ្តាលឲ្យមានបាតុភូតអាកាសធាតុនានាដូចជារលកកម្តៅកាន់តែញឹកញាប់ និងគំរាមកំហែងធ្វើឲ្យមនុស្សស្លាប់កាន់តែច្រើន ព្រមទាំងផលប៉ះពាល់ដល់ផលិតកម្មអាហារ។

លោក Doug Smith អ្នកជំនាញផ្នែកព្យាករណ៍អាកាសធាតុរបស់ Met Office បាននិយាយនៅក្នុងសេចក្តីថ្លែងការណ៍មួយថា ស៊េរីនៃការកើនឡើងសីតុណ្ហភាពជាមធ្យមចាប់តាំងពីឆ្នាំ២០១៥មក បានបង្ហាញឲ្យឃើញពីការប្រែប្រួលសីតុណ្ហភាពដ៏ខ្លាំងក្លានៅទូទាំងពិភពលោក។ ទីតាំងមួយចំនួនដូចជាតំបន់អាក់ទិក បានឡើងកម្តៅច្រើនដឺក្រេចាប់តាំងពីសម័យមុនឧស្សាហកម្មមក។

កិច្ចពិភាក្សារបស់ UN ស្តីពីអាកាសធាតុនាពេលថ្មីៗនេះក្នុងទីក្រុង Glasgow បានព្យាយាមរក្សាដែនកំណត់ការកើនឡើងនៃសីតុណ្ហភាពពិភពលោកត្រឹម ១.៥ អង្សាសេលើសសម័យមុនឧស្សាហកម្ម។

ទោះបីជាយ៉ាងណាក៏ដោយ Met Office ​និយាយ​ថា សីតុណ្ហភាព​​ឆ្នាំ​ក្រោយ​នឹងថយចុះ​​បន្តិច​ដោយ​សារ​ឥទ្ធិពល​នៃ​គំរូ​អាកាសធាតុ La Nina នៅ​ប៉ាស៊ីហ្វិក៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Straits Times

ចុចអាន៖ ថៃ ជាប់ចំណាត់លេខ ៩ នៃសន្ទស្សន៍ហានិភ័យអាកាសធាតុសកល អាក្រក់បំផុតក្នុងប្រទេស