មិនបង្ហាញខ្លួនមែន តែភរិយាប្រធានាធិបតី អ៊ុយក្រែន ប្ដេជ្ញានៅជាមួយស្វាមី និងពលរដ្ឋគ្រប់គ្នា

ជំទាវទីមួយរបស់អ៊ុយក្រែន លោកស្រី Olena Zelenska បានប្រកាសជំហរនៅជាមួយស្វាមី និងពលរដ្ឋគ្រប់គ្នា មិនរត់គេចខ្លួន យកសុខនោះទេ ទោះបីជាពេលនេះប្រធានាធិបតី Volodymyr Zelenskyy កំពុងតែជាគោលដៅ​របស់​​រុស្ស៊ី​ក៏ដោយ។

ខណៈពេលដែលសង្រ្គាមកំពុងឆាបឆេះក្នុងប្រទេស អ៊ុយក្រែន ប្រធានាធិបតី Volodymyr Zelenskyy បានបង្ហាញពីឆន្ទៈមោះមុតចំពោះអ្នកគាំទ្រ និងប្រជាជន ដោយលោកបានបន្តស្នាក់នៅក្នុងប្រទេស បើទោះបីលោកជាគោលដៅចម្បងនៃសត្រូវយ៉ាងណាក្ដី។

លោក Zelenskyy បាននិយាយកាលពីថ្ងៃព្រហស្បតិ៍ថា “សត្រូវបានសម្គាល់ខ្ញុំជាគោលដៅទី១ ហើយគ្រួសាររបស់ខ្ញុំជាគោលដៅទី២” ហើយលោកបដិសេធឱកាសពីសហរដ្ឋអាមេរិកក្នុងការជម្លៀសចេញពីរដ្ឋធានី គៀវ ចំពេលមានការឈ្លានពានរបស់រុស្ស៊ីលើប្រទេសរបស់ខ្លួន។

ដោយឡែក ភរិយាប្រធានាធិបតីវិញ គឺលោកស្រី Olena Volodymyrivna Zelenska ក៏កំពុងស្ថិតនៅក្នុងប្រទេសអ៊ុយក្រែនផងដែរ ខណៈប្រធានាធិបតីបានបដិសេធមិនប្រាប់ពីកន្លែងដែលនាងស្នាក់នៅ និងកូនៗនោះទេ ព្រោះពួកគេកំពុងទទួលរងការវាយប្រហារពីរុស្ស៊ី។

ទោះជាមិនបង្ហាញខ្លួនជាសាធារណៈ ​ប៉ុន្តែជំទាវទីមួយរបស់ប្រទេសអ៊ុយក្រែនបានបង្ហោះសារនៅលើគណនី Instagram ថា «ខ្ញុំគ្មានការភ័យស្លន់ស្លោ ឬយំយែកទេ។ ខ្ញុំនឹងស្ងប់ស្ងាត់ ហើយជឿជាក់។ កូនរបស់ខ្ញុំ កំពុងសំឡឹងមើលខ្ញុំ។ ខ្ញុំនឹងនៅក្បែរពួកគេ នៅក្បែរស្វាមីរបស់ខ្ញុំ និងនៅក្បែរអ្នកទាំងអស់គ្នា។ ខ្ញុំ​ស្រឡាញ់​អ្នក! ខ្ញុំស្រឡាញ់អ៊ុយក្រែន!»។

យ៉ាងណាមិញ ទីតាំងស្នាក់របស់លោកស្រី Olena Zelenska មិនត្រូវបានបង្ហាញឡើយ ដោយសារពេលនេះលោកស្រីនិងគ្រួសារ គឺជាមុខសញ្ញារបស់រុស្ស៊ី៕

ប្រែសម្រួល៖ សន្យា

ប្រភព៖ People

ចុចអាន៖ ប្រធានា​​ធិបតី​ អ៊ុ​យក្រែន ឆ្លើយតបផាំងៗ ក្រោយអាមេ​រិក​ស្នើ​ឲ្យ​ជម្លៀសលោកចេញពីប្រទេស

ចុចអាន៖ តារាសម្ដែងកូរ៉េ Lee Young Ae បរិច្ចាគប្រាក់ជាង ៨ម៉ឺនដុល្លា ជួយដល់ អ៊ុយក្រែន