តារាសម្ដែងកូរ៉េ Lee Young Ae បរិច្ចាគប្រាក់ជាង ៨ម៉ឺនដុល្លា ជួយដល់ អ៊ុយក្រែន

តារាសម្ដែងកូរ៉េខាងត្បូង Lee Young Ae ទទួលបានការសរសើរយ៉ាងខ្លាំងពីបណ្ដាអ្នកលេងអ៊ីនធឺណិតជុំវិញពិភពលោក បន្ទាប់ពីនាងបានបរិច្ចាគទឹកប្រាក់ជាង ៨ម៉ឺនដុល្លារ ដើម្បីជួយដល់ប្រទេសអ៊ុយក្រែន ក្នុងវិបត្តិសង្រ្គាម។

នៅថ្ងៃទី ០១ ខែមីនា ឆ្នាំ២០២២នេះ ប្រភពពីសារព័ត៌មាន Allkpop បានឱ្យដឹងថា តារាសម្តែង Lee Young Ae បានបរិច្ចាគទឹកប្រាក់ចំនួន ១០០លានវ៉ុន (៨៣ ៣២៩ ដុល្លារអាមេរិក) ដើម្បីជួយអ៊ុយក្រែនក្នុងជម្លោះដែលកំពុងបន្តជាមួយរុស្ស៊ី។ ភ្ជាប់រួមជាមួយនឹងមូលប្បទានប័ត្រ (សែក) មួយសន្លឹក Lee Young Ae ក៏បានបញ្ចូលសំបុត្រសរសេរដោយដៃផងដែរ ដើម្បីបង្ហាញពីបំណងរបស់នាងចង់ឱ្យសង្គ្រាមបញ្ចប់ឆាប់ៗ។

ក្នុងអត្ថន័យនៃសំបុត្រ Lee Young Ae បានសរសេរថា៖

ជូន​ចំពោះ​ប្រជាជន​អ៊ុយក្រែន​ជា​ទី​គោរព!

«ខ្ញុំ​ជា​តារា​សម្ដែង​ម្នាក់​ឈ្មោះ Lee Young Ae ពេលនេះកំពុង​រស់​នៅ​ក្នុង​ប្រទេស​កូរ៉េ​ខាង​ត្បូង។ ក្នុងនាមខ្ញុំជាសមាជិកម្នាក់របស់គ្រួសារអតីតយុទ្ធជន ខ្ញុំយល់ច្បាស់នូវភាពសាហាវឃោរឃៅនៃសង្រ្គាមជាងអ្នកដទៃ។ ខ្ញុំបន់ស្រន់សុំឱ្យសង្គ្រាមនៅអ៊ុយក្រែនអាចបញ្ចប់ឆាប់ៗ ដើម្បីឱ្យប្រទេសមានសន្តិភាពឡើងវិញ។ ខ្ញុំសូមអធិស្ឋានឱ្យប្រទេសនេះក្លាយជាទីមានសុវត្ថិភាពសម្រាប់ពលរដ្ឋអ៊ុយក្រែនទាំងអស់។»

ជូនចំពោះពលរដ្ឋអ៊ុយក្រែន ដែលស្រឡាញ់សេរីភាព និងសន្តិភាព!

«ខ្ញុំសូមឱ្យគ្រប់គ្នាកុំទាន់អស់សង្ឃឹម និងចូរភាពក្លាហានឡើង! ក្នុង​នាម​ជា​ពលរដ្ឋ​ម្នាក់​ក្នុង​ចំណោម​ពលរដ្ឋ​ជា​ច្រើន​ដែល​ស្រឡាញ់​សន្តិភាព​ក្នុង​ប្រទេស​កូរ៉េ​ខាង​ត្បូង​ ខ្ញុំ​សូម​ប្រគល់​បេះដូង​ដ៏​តូច​តែ​មាន​តម្លៃ​របស់​ខ្ញុំ​ដល់​ពលរដ្ឋ​អ៊ុយក្រែន​ទាំង​អស់។ សូម​ព្រះ​គង់​នៅ​ជា​មួយ​អ្នក​ជានិច្ច»៕

ប្រែសម្រួល៖ សន្យា

ចុចអាន៖ ស្រ្តីអ៊ុយក្រែនរាប់ម៉ឺននាក់ ត្រៀមខ្លួនប្រយុទ្ធជាមួយ រុស្ស៊ី

ចុចអាន៖ សមាជិក BST ជាប់ឈ្មោះជាសេដ្ឋី ព្រោះម្នាក់ៗកាន់កាប់ប្រាក់សុទ្ធរាប់សិបលាននៅក្នុងដៃ