នាយក​​រដ្ឋ​​មន្ត្រី​​​ហ្សាម៉ាអ៊ីក​ទូល​រាជវង្ស​​អង់គ្លេស​ថា ប្រទេស​​ចង់​​បាន​​ឯករាជ្យ​

នាយករដ្ឋមន្ត្រីប្រទេសហ្សាម៉ាអ៉ីក លោក Andrew Holness បានទូលព្រះអង្គម្ចាស់ William និងមហេសី Kate របស់ចក្រភពអង់គ្លេសកាលពីថ្ងៃពុធថា ប្រទេសរបស់លោកចង់បាន«ឯករាជ្យ» និងដោះស្រាយបញ្ហាដែលមិនទាន់ដោះស្រាយ មួយថ្ងៃបន្ទាប់ពីអ្នកតវ៉ាបានអំពាវនាវឲ្យចក្រភពអង់គ្លេសបង់ប្រាក់សំណងសម្រាប់ទាសភាព។

ស្វាមី និងមហេសីរបស់រាជវង្សអង់គ្លេសបានយាង​ទៅដល់ប្រទេសហ្សាម៉ាអ៉ីក​កាលពីថ្ងៃអង្គារ៍ដែលជារាជទស្សនកិច្ចរយៈពេលមួយសប្តាហ៍ទៅកាន់ប្រទេសអតីតអាណានិគមអង់គ្លេស ប៉ុន្តែបានប្រឈមនឹងការចោទសួរជាសាធារណៈនៃកេរ្តិ៍ដំណែលរបស់ចក្រភពអង់គ្លេស។

ក្នុងព្រះរាជសុន្ទរកថាមួយនៅល្ងាចថ្ងៃពុធ ព្រះអង្គម្ចាស់ William មិនបានឆ្លើយតបទៅនឹងការអំពាវនាវឲ្យ​ដក​ចេញ​ព្រះមហាក្សត្រិយ៍ Elizabeth ដែលជាព្រះអយ្យិការបស់ព្រះអង្គម្ចាស់​ពីប្រមុខរដ្ឋហ្សាម៉ាអ៉ីកឡើយ។

ព្រះរាជទស្សនកិច្ចរបស់ព្រះអង្គម្ចាស់ និងមហេសីបានកើតមានឡើង បន្ទាប់ពីប្រទេសកោះ Barbados បានក្លាយជាសាធារណៈរដ្ឋជិត៤ខែមកហើយដោយបាន​ដក​ព្រះមហាក្សត្រិយ៍ Elizabeth ចេញពីតួនាទីជាប្រមុខរដ្ឋ ដែលបានធ្វើឲ្យប្រទេសហ្សាម៉ាអ៊ីកចាប់ផ្តើមសិក្សាដែរ។

លោកនាយករដ្ឋមន្ត្រី Holness បាននិយាយអំឡុងពេលថតរូបជាមួយនឹងព្រះអង្គម្ចាស់ William និងព្រះនាង Kate ថា ៖«នៅទីនេះមានបញ្ហាដូចដែលព្រះអង្គម្ចាស់ជ្រាបហើយគឺមិនទាន់ដោះស្រាយ»។

«ប៉ុន្តែហ្សាម៉ាអ៉ីក​ដូចឃើញស្រាប់ហើយគឺជាប្រទេសមួយដែលមានមោទកភាពខ្លាំង… ហើយយើងខ្ញុំនឹងផ្លាស់ប្តូរ។ ហើយយើងខ្ញុំមានបំណងបំពេញមហិច្ឆតាពិតប្រាកដរបស់ពួកយើងក្នុងការទទួលបានឯករាជ្យ ជាប្រទេសអភិវឌ្ឍ និងរុងរឿងពេញលេញ»។

មនុស្សជាច្រើនបានប្រមូលផ្តុំគ្នាកាលពីថ្ងៃអង្គារ៍នៅខាងក្រៅគណៈកម្មការជាន់ខ្ពស់អង់គ្លេសនៅទីក្រុង Kingston ដោយបាននាំគ្នាច្រៀងចម្រៀងប្រពៃណី Rastafarian និងបានលើកបដាដែលសរសេរពាក្យ “seh yuh sorry”ដែលជាភាសាអ្នកស្រុកក្នុងការជំរុញឲ្យចក្រភពអង់គ្លេសសុំទោស។

នៅក្នុងព្រះរាជសុន្ទរកថាមួយនៅគេហដ្ឋានរបស់អគ្គទេសាភិបាលដែលចូលរួមដោយលោក Holness និងមន្ត្រីជាន់ខ្ពស់ជាច្រើនទៀត ព្រះអង្គ William ក៏បានឈប់រយៈពេលខ្លីដើម្បីធ្វើការសុំទោសចំពោះទាសភាព ទោះជាព្រះអង្គមានបន្ទួលថា ព្រះអង្គឯកភាពនឹងព្រះរាជប្រកាសរបស់ព្រះបិតារបស់ព្រះអង្គថា «ភាពឃោរឃៅគួរឲ្យរន្ធត់នៃទាសភាពបានប្រឡាក់ក្នុងប្រវត្តិសាស្ត្ររបស់យើងជារៀងរហូត»។

ព្រះអង្គម្ចាស់ William ដែលជាជួរទី២នឹងព្រះរាជបល្ល័ង្គអង់គ្លេស ក៏បានសម្តែងទុក្ខព្រួយយ៉ាងជ្រាលជ្រៅចំពោះស្ថាប័ននៃទាសភាពដែលព្រះអង្គមានបន្ទួលថា មិនគួរមាន៕

ប្រែសម្រួល៖ វីរបុត្រ
ប្រភព៖ reuters