ចម្លើយសារភាពថ្មីទៀតរបស់ខ្មាន់កាំភ្លើង ដែលធ្វើឃាតលោក Abe

បុរសដែលបាញ់សម្លាប់អតីតនាយករដ្ឋមន្ត្រី Shinzo Abe បានប្រាប់ប៉ូលិសថា ដំបូងឡើយគាត់គ្រោងវាយប្រហារមេដឹកនាំក្រុមសាសនា ដែលគាត់ជឿថា បានធ្វើឲ្យម្តាយរបស់គាត់ត្រូវក្ស័យធនតាមរយៈការបរិច្ចាគ។

លោក Tetsuya Yamagami អាយុ ៤១ ឆ្នាំក៏បានសារភាពផងដែរថា គាត់មានចេតនាសម្លាប់ លោក Abe ដោយជឿថា អតីតនាយករដ្ឋមន្ត្រីរូបនេះ បានជួយផ្សព្វផ្សាយឲ្យក្រុមនេះនៅក្នុងប្រទេសជប៉ុន។

ជនសង្ស័យ​បាន​ទៅតាមលោក Abe នៅ​​ទីតាំង​ជាច្រើន ​មុន​ការ​បោះឆ្នោត​សភា​ ​ថ្ងៃអាទិត្យទី១០ខែកក្កដានេះ។

លោក អាបេ ត្រូវបានគេប្រកាសថា ស្លាប់កាលពីថ្ងៃសុក្រ ប្រហែលប្រាំម៉ោងបន្ទាប់ពីត្រូវបានបាញ់ អំឡុងពេលថ្លែងសុន្ទរកថា នៅជិតស្ថានីយ៍រថភ្លើងមួយ ក្នុងទីក្រុង Nara ខណៈលោក Yamagami ត្រូវ​បាន​ចាប់​ខ្លួន​នៅ​កន្លែង​កើត​ហេតុ។

ទោះបីជាយ៉ាងណាក៏ដោយ លោក Yamagami បានបដិសេធថា គាត់មិនបានប្រព្រឹត្តបទឧក្រិដ្ឋទេ តែនេះដោយសារតែគាត់ប្រឆាំងទៅនឹងជំនឿនយោបាយរបស់លោក Abe ប៉ុណ្ណោះ។

ប៉ូលិសបានឆែកឆេរផ្ទះរបស់គាត់កាលពីថ្ងៃសុក្រ ដោយរកឃើញវត្ថុ ដែលគេជឿថា ជាគ្រឿងផ្ទុះ និងកាំភ្លើងច្នៃដោយខ្លួនឯង។

លោក Yamagami បច្ចុប្បន្នជាមនុស្សគ្មានការងារធ្វើ។ គាត់ធ្វើការនៅរោងចក្រមួយក្នុងតំបន់ Kansai ចាប់ពីរដូវស្លឹកឈើជ្រុះឆ្នាំ២០២០ ប៉ុន្តែគាត់បានលាឈប់កាលពីខែឧសភាឆ្នាំនេះ។ ពីមុន គាត់ក៏ជាសមាជិកនៃកងកម្លាំងស្វ័យការពារដែនសមុទ្រប្រហែល ៣ឆ្នាំរហូតដល់ខែសីហា ២០០៥ផងដែរ៕

ប្រែសម្រួល៖ Vann Vann

ប្រភព៖ Kyodo

ចុចអាន៖ ក្រោយធ្វើកោសល្យវិច័យ ប៉ូលិស បញ្ជាក់មូលហេតុ នាំឲ្យលោក Abe បាត់បង់ជីវិត