រដ្ឋមន្ត្រីការពារជាតិអាល្លឺម៉ង់ លោក Boris Pistorius បាននិយាយកាលពីថ្ងៃពុធថា រថក្រោះ A6 Leopard 2 របស់អាល្លឺម៉ង់ និងព័រទុយហ្គាល់សរុប ២១ គ្រឿង នឹងត្រូវដឹកជញ្ជូនទៅកាន់តំបន់ជម្លោះក្នុងប្រទេសអ៊ុយក្រែននៅខែនេះ ។

លោក Pistorius បញ្ជាក់ថា រថក្រោះ A6 Leopard 2 ទាំង ២១ គ្រឿងនេះ គឺរបស់អាល្លឺម៉ង់ចំនួន ១៨ គ្រឿង និងព័រទុយហ្គាល់ចំនួន ៣ គ្រឿង ហើយក្រៅពីរថក្រោះខ្លារខិនទាំងនេះ ក៏រួមមានកងពលតូចដែលត្រូវបានហ្វឹកហ្វឺនរួចរាល់ ក៏នឹងបញ្ជូនទៅកាន់អ៊ុយក្រែនផងដែរ ។

ការប្រកាសរបស់រដ្ឋមន្ត្រីការពារជាតិអាល្លឺម៉ង់កើតឡើងតែប៉ុន្មានថ្ងៃប៉ុណ្ណោះ បន្ទាប់ពីប្រទេសប៉ូឡូញក៏នឹងបញ្ជូនរថក្រោះខ្លារខិន Leopard 2 ផលិតដោយអាល្លឺម៉ង់ចំនួន ១០ គ្រឿងបន្ថែមទៀតទៅឲ្យអ៊ុយក្រែនក្នុងខែនេះដូចគ្នា ។

អាល្លឺម៉ង់ និងប៉ូឡូញ ជាប្រទេសនាំមុខគេក្នុងកិច្ចខិតខំប្រឹងប្រែងរបស់លោកខាងលិច ដើម្បីផ្តល់រថក្រោះទំនើប Leopard ឲ្យអ៊ុយក្រែន ដោយទីក្រុងវ៉ាសូវី បានប្រគល់កញ្ចប់ដំបូងចំនួន ៤ គ្រឿងកាលពីថ្ងៃទី២៤ ខែកុម្ភៈ ឆ្នាំ២០២៣ នេះ ។

គួរបញ្ជាក់ថា ការប្រកាសផ្ដល់រថក្រោះខ្លារខិន Leopard 2 របស់អាល្លឺម៉ង់ទៅឲ្យរដ្ឋាភិបាលទីក្រុងកៀវនៅពេលនេះ គឺបន្ថែមពីលើចំនួនរថក្រោះប្រយុទ្ធ ១៤ គ្រឿង ដែលអាល្លឺម៉ង់បានសន្យាផ្ដល់ឲ្យអ៊ុយក្រែនកាលពីដើមឆ្នាំនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រថក្រោះ Leopard ចំនួន១០គ្រឿងទៀត នឹងទៅដល់អ៊ុយក្រែន ក្នុងសប្តាហ៍នេះ