ស្ត្រីម្នាក់មានដង្កូវពស់ថ្លាន់នៅក្នុងខួរក្បាល ដំបូងគេបង្អស់លើលោក

គ្រូពេទ្យភ្ញាក់ផ្អើលយ៉ាងខ្លាំង បន្ទាប់ពីរកឃើញដង្កូវនៅក្នុងខួរក្បាលស្ត្រីម្នាក់ ដែលធ្លាប់តែមាននៅក្នុងពស់ថ្លាន់ ។

អ្នកជំងឺគឺជាស្ត្រីជនជាតិអង់គ្លេសវ័យ ៦៤ ឆ្នាំ ហើយដង្កូវដែលគេរកឃើញក្នុងខួរក្បាលគាត់ជាប្រភេទ Ophidascaris robertsi ប្រវែង ៨ សង់ទីម៉ែត្រ ។

ជាទូទៅដង្កូវប្រភេទនេះ មានតែនៅក្នុងពោះវៀនពស់ថ្លាន់ប្រភេទ Carpets ដែលរស់នៅរដ្ឋ New South Wales នៃប្រទេសអូស្ត្រាលីប៉ុណ្ណោះ ។

គេមិនដឹងពីមូលហេតុដែលធ្វើឲ្យអ្នកស្រីមានដង្កូវក្នុងខួរក្បាលឡើយ ប៉ុន្តែរឿងរ៉ាវបានចាប់ផ្ដើមកាលពីឆ្នាំ ២០២១ ខែមករា មកម្ល៉េះ ។

កាលនោះអ្នកស្រីត្រូវបញ្ជូនទៅមន្ទីរពេទ្យអូស្ត្រាលី ដោយសារឈឺពោះ និងរាក មុនវិវត្តន៍ទៅជាក្អកស្ងួត និងបែកញើសពេលយប់ ។ គ្រូពេទ្យវិនិច្ឆ័យរោគថា ជាជំងឺរលាកសួត ហើយផ្តល់ថ្នាំស្តេរ៉យឲ្យគាត់ ។ ដំបូង​អ្នកស្រីមាន​ភាព​ប្រសើរ​ឡើងវិញ និងវិល​ត្រឡប់ទៅផ្ទះធម្មតា ។

ស្រាប់តែប៉ុន្មានសប្ដាហ៍ក្រោយគាត់គ្រុនក្ដៅ និងក្អកជាប់រហូត បណ្ដាលឲ្យគ្រូពេទ្យសង្ស័យថា ជារោគសញ្ញា hypereosinophilic ដែលជំរុញដោយ T-cell ជាស្ថានភាពដែលអាចគំរាមកំហែងដល់អាយុជីវិត ព្រោះប្រព័ន្ធភាពស៊ាំរបស់រាងកាយដំណើរការលើសទម្ងន់ ។

លុះដល់ខែមករា ឆ្នាំ ២០២២ នាងស្រាប់តែចាប់ផ្តើមភ្លេចភ្លាំង និងមានជំងឺធ្លាក់ទឹកចិត្តកាន់តែធ្ងន់ ទើបគ្រូពេទ្យពិនិត្យមើលខួរក្បាលរបស់នាងម្ដង ។

បន្ទាប់ពីការស្កេន​បានបង្ហាញ​ពី​ដំបៅ​ក្នុង​ខួរក្បាល​របស់ស្ត្រីវ័យ ៦៤ ឆ្នាំខាងលើ គាត់ក៏ត្រូវចូលវះកាត់នៅខែមិថុនា ឆ្នាំ ២០២២ ។

ក្នុងអំឡុងពេលវះកាត់ គ្រូពេទ្យបានរកឃើញដង្កូវ Ophidascaris robertsi ដែលមានតែក្នុងពស់ថ្លាន់ប៉ុណ្ណោះ ។ ដូច្នេះអ្នកស្រីបានក្លាយជាមនុស្សដំបូងបង្អស់លើលោក ដែលឆ្លងប៉ារ៉ាស៊ីតនេះ ៕

ប្រែសម្រួល៖ វារី

ប្រភព៖ Dailymail

ចុចអាន៖ ស្ត្រីវៀតណាមម្នាក់ចូលចិត្តញ៉ាំសាច់គោឆៅ រហូតមានតេនញ៉ាប្រវែង ៦ ម៉ែត្រ