UN ស៊ើបអង្កេត ក្រោយអ៊ីស្រាអែល បាញ់សម្លាប់ពលរដ្ឋប៉ាឡេស្ទីន ជាង១០០នាក់ ពេលចាំបើកជំនួយ

អគ្គលេខាធិការអង្គការសហប្រជាជាតិលោក Antonio Guterres កាលពីថ្ងៃព្រហស្បតិ៍ទី២៩ខែកុម្ភៈ បានថ្កោលទោសការសម្លាប់ពលរដ្ឋប៉ាឡេស្ទីនជាង១០០នាក់ ដែលកំពុងរង់ចាំបើកជំនួយនៅតំបន់ហ្គាហ្សាភាគខាងជើង ហើយចាប់ផ្តើមស៊ើបអង្កេតជាបន្ទាន់ លើករណីនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យប្រមុខ UN គឺលោក Stephane Dujarric បានប្រាប់ទៅ Reuters ថា “លោកអគ្គលេខាធិការ បានថ្កោលទោសចំពោះឧបទ្ទវហេតុនៅភាគខាងជើងហ្គាហ្សា ដែលក្នុងនោះមានមនុស្សជាង១០០នាក់ ត្រូវបានគេសម្លាប់ពេលពួកគេកំពុងស្វែងរកជំនួយសង្គ្រោះជីវិត។ ជនស៊ីវិលដែលកំពុងអស់សង្ឃឹមនៅហ្គាហ្សា ត្រូវការជំនួយជាបន្ទាន់ រួមទាំងអ្នកនៅភាគខាងជើងដែលរងការឡោមព័ទ្ធផងដែរ ព្រោះ UN មិនអាចដឹកជំនួយចូលទីនោះជាងមួយសប្តាហ៍មកហើយ”។

តាមការបញ្ជាក់ពីមន្ត្រីប៉ាឡេស្ទីន, កងកម្លាំងអ៊ីស្រាអែល បានបើកការបាញ់ប្រហារទៅលើ ប្រជាជនប៉ាឡេស្ទីនដែលកំពុងរង់ចាំជំនួយនៅលើឆ្នេរសមុទ្រហ្គាហ្សា ដោយបានសម្លាប់មនុស្សចំនួន១០៤នាក់ និងរបួសជាង៧៦០នាក់ផ្សេងទៀត។

ទោះបីជាយ៉ាងណាក៏ដោយ អ្នកនាំពាក្យយោធាអ៊ីស្រាអែល អះអាងថា កងទ័ពបាញ់នោះ គឺដើម្បីតែការពារខ្លួនប៉ុណ្ណោះ បន្ទាប់ពីពលរដ្ឋហ្គាហ្សា វាយប្រហារពួកគេនិងលុកលុយរថយន្តជំនួយ ដែលចូលទៅដល់តំបន់ ហ្គាហ្សាស្រ្ទីប ពេលព្រឹកព្រលឹម។

លោក Dujarric និយាយថា មិនមានវត្តមានមន្ត្រី UN នៅកន្លែងសោកនាដកម្មទេ ហើយច្បាស់ណាស់ ឧប្បត្តិហេតុនោះនឹង​ត្រូវ​ស៊ើបអង្កេត មិនអាចបណ្តោយឲ្យកន្លងផុតទទេៗឡើយ។ ស្របពេលជាមួយគ្នានោះដែរ លោក Guterres បានរំលឹកឡើងវិញ នូវការអំពាវនាវរបស់លោកសុំឲ្យមានបទឈប់បាញ់មនុស្សធម៌ជាបន្ទាន់ និងការដោះលែងចំណាប់ខ្មាំងទាំងអស់ដោយគ្មានលក្ខខណ្ឌ។

សូមបញ្ជាក់ជាថ្មី អ៊ីស្រាអែល បានបើកការវាយលុកផ្លូវអាកាសនិងដីគោកទ្រង់ទ្រាយធំនៅតំបន់ហ្គាហ្សា បន្ទាប់ពីខ្មាន់កាំភ្លើងក្រុមហាម៉ាស ឆ្មក់ចូលសម្លាប់មនុស្សប្រហែល១២០០នាក់នៅភាគខាងត្បូងប្រទេស និងចាប់២៥៣នាក់ធ្វើជាចំណាប់ខ្មាំង ប៉ុន្តែមានអ្នកខ្លះត្រូវបានដោះលែងមកវិញហើយ។

ចំណែក ក្រសួងសុខាភិបាលដែលគ្រប់គ្រងដោយក្រុមហាម៉ាស នៅតំបន់ហ្គាហ្សាស្ទ្រីប បានបង្ហាញតួលេខថា មនុស្សជាង៣ម៉ឺននាក់ហើយ ត្រូវបានសម្លាប់នៅក្នុងទឹកដីនេះ ចាប់តាំងពីថ្ងៃទី៧ខែតុលាឆ្នាំ២០២៣មក ខណៈជាង៧ម៉ឺននាក់រងរបួស៕

អត្ថបទ៖ សុខ សុវណ្ណ

ចុចអាន៖ ពលរដ្ឋហ្គាហ្សា ខ្លះជិះទូក ខ្លះហែលទឹក ចូលសមុទ្រ ប្រថុយជីវិតទៅយកជំនួយ