ព័ត៌មានអន្ដរជាតិ

២០២៣ ជាឆ្នាំដែលមានជម្លោះប្រដាប់អាវុធច្រើនបំផុត បន្ទាប់ពីសង្គ្រាមលោកលើកទី២

បានផុស

២ years មុន

នៅ

ថ្ងៃអង្គារ ១១ មិថុនា ២០២៤

ដោយ

Chheang

ជម្លោះប្រដាប់អាវុធ បានកើតឡើងចំនួនច្រើនករណីបំផុត នៅក្នុងឆ្នាំ២០២៣កន្លងទៅ ដែលតួលេខនេះវ៉ាដាច់ឆ្នាំណាណាទាំងអស់ គិតចាប់តាំងពីចប់សង្គ្រាមលោកលើកទី២។ វិទ្យាស្ថានស្រាវជ្រាវសន្តិភាពនៃរដ្ឋធានីអូស្លូ ហៅកាត់ថា PRIO បានបង្ហាញរបាយការណ៍ថា កាលពីឆ្នាំមុន ជម្លោះប្រដាប់អាវុធកើតមានសរុបចំនួន ៥៩ករណីជុំវិញពិភពលោក ដោយក្នុងនោះជម្លោះលេចធ្លោជាងគេគឺ សង្គ្រាមនៅអ៊ុយក្រែន និងសង្គ្រាមនៅតំបន់ហ្គាហ្សា។

សង្គ្រាមនៅតំបន់ហ្គាហ្សា (រូបភាព៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមជម្លោះប្រដាប់អាវុធទាំង៥៩ករណី មាន ២៨ករណីកើតឡើងនៅអាហ្វ្រិក, ១៧ករណីនៅអាស៊ី, ១០ករណីនៅមជ្ឈិមបូព៌ា, ៣ករណីនៅអឺរ៉ុប និង១ករណីនៅអាមេរិក។ ថ្វីត្បិតតែចំនួនជម្លោះប្រដាប់អាវុធកើនឡើងខ្លាំងនៅក្នុងឆ្នាំ២០២៣ តែបើសង្កេតមើលពីករណីជម្លោះចាស់ៗពីមុនហាក់បានថមថយខ្លះដែរ ដោយជម្លោះរ៉ាំរ៉ៃចំនួន៣៩ករណី ធ្លាក់មកសល់ត្រឹម ៣៤ករណី ពោលគឺដោះស្រាយនិងបញ្ចប់ជម្លោះបានចំនួន ៥ករណី។

របាយការណ៍របស់ PRIO បានឲ្យដឹងថា ការកើនឡើងនៃជម្លោះនេះ ក៏ដោយសារតែការរីករាលដាលនៃសកម្មភាពក្រុមជ្រុលនិយម ISIS នៅជុំវិញតំបន់អាស៊ី និងមជ្ឈិមបូព៌ា បូករួមទាំងការបង្កើតថ្មីនៃក្រុមសកម្មជនប្រឆាំងមិនមែនរដ្ឋាភិបាល។

មួយវិញទៀត បើយោងតាមទិន្នន័យដែលប្រមូលបានដោយសកលវិទ្យាល័យស៊ុយអែត Uppsala ពីអង្គការអន្តរជាតិ និងអង្គការក្រៅរដ្ឋាភិបាល, តួលេខមនុស្សស្លាប់នៅក្នុងសង្គ្រាមនៅទូទាំងពិភពលោក បានធ្លាក់ចុះពាក់កណ្ដាលឯណោះមកនៅត្រឹម ១២២ ០០០នាក់ កាលពីឆ្នាំ២០២៣កន្លងទៅ។ យ៉ាងណាមិញ តួលេខនេះនៅតែខ្ពស់ដដែល និងឈរនៅលំដាប់ថ្នាក់ទី៣ ដែលមានចំនួនអ្នកស្លាប់ដោយសារសង្គ្រាមច្រើនបំផុត គិតចាប់តាំងពីឆ្នាំ១៩៨៩។ ទន្ទឹមគ្នានេះផងដែរ តួលេខអ្នកស្លាប់៣ឆ្នាំជាប់ៗគ្នានេះ គឺច្រើនលើសលុបមិនធ្លាប់មាននោះទេ ក្នុងរយៈពេល៣ទសវត្សចុងក្រោយ ដែលភាគច្រើនមានប្រភពចេញពីសង្គ្រាមស៊ីវិលនៅក្នុងតំបន់ Tigray ប្រទេសអេត្យូពី, សង្គ្រាមឈ្លានពានរបស់រុស្ស៊ីលើអ៊ុយក្រែន និងការវាយលុករបស់អ៊ីស្រាអែលក្នុងតំបន់ហ្គាហ្សា៕

ដោយ៖ ឈាង

Related Topics:សង្គ្រាម