UN៖ ប្រជាជន ១,១ ពាន់លាននាក់រស់នៅក្នុងភាពក្រីក្រធ្ងន់ធ្ងរ

អង្គការសហប្រជាជាតិបានចេញរបាយការណ៍ថ្មីដែលបង្ហាញថា ប្រជាជនជាង១​​ពាន់លាននាក់រស់នៅក្នុងភាពក្រីក្រធ្ងន់ធ្ងរ ដោយជិតពាក់កណ្តាលនៃពួកគេនៅក្នុងប្រទេសកំពុងជួបប្រទះជម្លោះ។ នេះបើយោងតាមការចេញផ្សាយរបស់សារព័ត៌មាន​Al Jazeera នៅថ្ងៃទី១៨ខែតុលានេះ។

បើតាមរបាយការណ៍នេះ បណ្តាប្រទេសដែលមានសង្រ្គាមគឺមានកម្រិតនៃភាពអត់ឃ្លានខ្ពស់ជាងគេ ខណៈកម្មវិធីអភិវឌ្ឍន៍អង្គការសហប្រជាជាតិ (UNDP) បានរាយការណ៍ថា វានឹងកាន់តែធ្ងន់ធ្ងរនៃការខ្វះខាតអាហារូបត្ថម្ភ ខ្វះខាតអគ្គិសនី ទឹក និង​ការទទួលបានអនាម័យត្រឹមត្រូវ។

ការស្រាវជ្រាវនៅទូទាំងប្រទេសចំនួន១១២ និងប្រជាជនចំនួន៦,​៣ ពាន់លាននាក់ បានបង្ហាញថាមនុស្ស ១,១ពាន់លាននាក់​បានស៊ូទ្រាំនឹងភាពក្រីក្រ ដោយ​៤៥៥លាននាក់«រស់នៅក្នុងស្រមោលនៃជម្លោះ»។ មនុស្សប្រហែល ៥៨៤ លាននាក់ដែលមានអាយុក្រោម១៨ឆ្នាំកំពុងជួបប្រទះភាពក្រីក្រខ្លាំងដែលស្មើនឹង ២៧,៩​ភាគរយនៃកុមារនៅទូទាំងពិភពលោក​ធៀប​​នឹង​ ១៣,៥​​ភាគរយនៃមនុស្សពេញវ័យ។

អត្រាមរណភាពកុមារនៅក្នុងជម្លោះមាន៨ភាគរយ ធៀបនឹង ១,១​ភាគរយនៅក្នុងប្រទេសដែលមានសន្តិភាព។ ក្នុងនោះ ៨៣,២ ភាគរយនៃប្រជាជនក្រីក្របំផុតរបស់ពិភពលោករស់នៅក្នុងអនុតំបន់សាហារ៉ាអាហ្វ្រិក និងអាស៊ីខាងត្បូង។

លោក Achim Steiner ប្រធាន UNDP បាននិយាយថា «ជម្លោះកាន់តែខ្លាំង និងកើនឡើងក្នុងប៉ុន្មានឆ្នាំថ្មីៗនេះ ឈាន​ដល់កម្រិតខ្ពស់ថ្មីនៃអ្នកស្លាប់ និងរបួស ធ្វើឱ្យមនុស្សរាប់លាននាក់ផ្លាស់ទីលំនៅ និងបង្កឱ្យមានការរំខានយ៉ាងធំធេងដល់ជីវិត និងជីវភាពរស់នៅរបស់ប្រជាជន»។

បើយោងតាមការវាយតម្លៃដែលបានចងក្រងរួមគ្នាជាមួយ Oxford Poverty and Human Development Initiative (OPHI) បានប្រើសូចនាករដូចជា កង្វះលំនៅឋានគ្រប់គ្រាន់ អនាម័យ អគ្គិសនី ប្រេងឥន្ធនៈ អាហាររូបត្ថម្ភ និងការទទួលបានការអប់រំ ដើម្បីវាយតម្លៃកម្រិតនៃ «ភាពក្រីក្រពហុវិមាត្រ»។

រួមបញ្ចូលការសិក្សាស៊ីជម្រៅលើប្រទេសអាហ្វហ្គានីស្ថាន ដែលមនុស្ស ៥,៣ លាននាក់បន្ថែមទៀតបានធ្លាក់ក្នុងភាពក្រីក្រក្នុងអំឡុងឆ្នាំ ២០១៥-១៦ និង ២០២២-២៣។ កាលពីឆ្នាំមុន ប្រជាជនអាហ្វហ្គានីស្ថានជិតពីរភាគបីត្រូវបានចាត់ទុកថាក្រីក្រ។ ក្នុងនោះប្រទេសឥណ្ឌាគឺជាប្រទេសដែលមានចំនួនប្រជាជនច្រើនជាងគេនៅក្នុងភាពក្រីក្រខ្លាំង ដែលប៉ះពាល់ដល់មនុស្ស ២៣៤​លាននាក់នៃចំនួនប្រជាជន ១,៤ ពាន់លាននាក់របស់ប្រទេសនេះ។

បន្ទាប់ពីឥណ្ឌាមានប្រទេសប៉ាគីស្ថាន អេត្យូពី នីហ្សេរីយ៉ា និងសាធារណរដ្ឋប្រជាធិបតេយ្យកុងហ្គោ ដោយប្រទេសទាំងប្រាំរួមបញ្ចូលគ្នាមានចំនួនជិតពាក់កណ្តាលនៃប្រជាជនក្រីក្រ​១,១​ពាន់លាននាក់។

ប៉ុន្តែបើតាមលោក Yanchun Zhang ប្រធានស្ថិតិនៅ UNDP បាននិយាយថា «សម្រាប់អ្នកក្រីក្រនៅក្នុងប្រទេសដែលរងផលប៉ះពាល់ដោយជម្លោះ ការតស៊ូទ្រាំនឹងការខ្វះខាតតម្រូវការជាមូលដ្ឋានគឺជាការប្រឈមដ៏ធ្ងន់ធ្ងរ និងអស់សង្ឃឹមជាង»៕

អត្ថបទ៖ ប៊ុន សុភាព