ទីប្រឹក្សាលោក ត្រាំ ស្តីឲ្យ ហ្សេលេនស្គី ថា ស្លៀកពាក់មើលងាយអាមេរិក

ទីប្រឹក្សារបស់លោក ដូណាល់ ត្រាំ មិនសប្បាយចិត្តទាល់តែសោះ ហើយស្តីបន្ទោសខ្លាំងៗទៅមេដឹកនាំអ៊ុយក្រែនលោក វ្ល៉ាឌីមៀរ ហ្សេលេនស្គី ថា «មិនគោរពអាមេរិក» ដោយសារតែគាត់ពាក់អាវយឺត ស្លៀកខោខ្មៅនិងពាក់ស្បែកជើងទ័ព អំឡុងពេលជំនួបមួយនៅទីក្រុងប៉ារីស នៃប្រទេសបារាំង។ នេះបើតាមការចុះផ្សាយរបស់ VN Express កាលពីថ្ងៃចន្ទទី៩ខែធ្នូឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមពិតទៅ លោក ហ្សេលេនស្គី តែងតែស្លៀកពាក់បែបនេះ ពេលជួបប្រមុខដឹកនាំពិភពលោក ជាពិសេសជួបប្រធានាធិបតីអាមេរិក លោក ចូ បៃដិន តែម្តង ប៉ុន្តែទើបតែលើកនេះទេ ដែលគាត់ រងការស្តីបន្ទោសពីសំណាក់រដ្ឋបាលថ្មីរបស់ទីក្រុងវ៉ាស៊ីនតោន។

កាលពីចុងសប្តាហ៍ លោក រ៉ូជើ ស្តូន ដែលជាទីប្រឹក្សាលោក ត្រាំ បាននិយាយថា «ប្រធានាធិប​តី​អ៊ុយក្រែន​មិន​អាច​ទិញ​ឈុតល្អមួយពាក់បានទេមែនទេ? គាត់ពាក់អាវធំ និងក្រវ៉ាត់កទៅវេទិកាសេដ្ឋកិច្ចពិភពលោក ប៉ុន្តែហេតុអ្វីគាត់មិនអាចពាក់ឈុតនោះ នៅពេលនិយាយនៅក្នុងសភាអាមេរិក ឬពេលជួបប្រធានាធិបតីជាប់ឆ្នោតអាមេរិក? នោះគឺជាការមើលងាយដល់អាមេរិកហើយ»។

មិនត្រឹមតែទីប្រឹក្សាលោកត្រាំទេ សូម្បីអ្នកលេងបណ្តាញសង្គមក៏រិះគន់ការស្លៀកពាក់របស់លោក ហ្សេលេនស្គី ដែរ។ ក្នុងរូបថតដែលលោក ហ្សេលេនស្គី បង្ហោះជាមួយលោក ត្រាំ និងប្រធានាធីបតីបារាំង អេម៉ាញូអែល ម៉ាក្រុង, អ្នកខ្លះចូលទៅ Comment ថា «ក្នុងនាមខ្ញុំជាជនជាតិបារាំង ទោះខ្ញុំមិនមែនជាអ្នកគាំទ្រលោកម៉ាក្រុងក៏ដោយ ប៉ុន្តែលោក ហ្សេលេនស្គី ក៏គួរតែដឹងដែរថា ត្រូវស្លៀកពាក់បែបណា»។

ចំណែកអ្នកផ្សេងទៀត Comment ថា «គាត់អាចយកលុយដែលអាមេរិកជួយ ទៅទិញឈុតសមរម្យមួយទៅ។ មិនសមសោះដែលគាត់ស្លៀកពាក់ មិនដូចជាមនុស្សធំទាំងដែលពិភពលោកឲ្យលុយគាត់ រាប់ពាន់លានដុល្លារ»។

សូមបញ្ជាក់ថា មតិរិះគន់នេះគឺចំពោះការដែលលោកហ្សេលេនស្គី ស្លៀកពាក់មិនសមរម្យទៅចូលរួមពិធីបើកព្រះវិហារ Notre Dame សាជាថ្មីជាមួយលោក ត្រាំ និងម៉ាក្រុង។

ចាប់តាំងពីផ្ទុះសង្រ្គាមមក លោកហ្សេលេនស្គី តែងតែបង្ហាញមុខក្នុងឯកសណ្ឋានយោធាពណ៌បៃតង នៅពេលធ្វើដំណើរចេញទៅក្រៅប្រទេស ឬចូលរួមព្រឹត្តិការណ៍អន្តរជាតិ។ សកម្មភាព​របស់​លោក​ត្រូវ​​គេ​ជឿ​ថា មាន​គោល​បំណង​បង្ហាញ​ពី​សាមគ្គីភាព​ជាមួយ​ប្រជាជន និង​កង​កម្លាំង​ប្រដាប់​អាវុធ និង​ជាការ​ផ្ញើ​សារ​ត្រៀម​ខ្លួនដើម្បី​ការពារ​ប្រទេស៕

អត្ថបទ៖ សុខ សុវណ្ណ 

ចុចអាន៖ លោក ត្រាំ មានផែនការចំនួន៣ ដើម្បីបញ្ចប់សង្គ្រាម រុស្ស៊ី-អ៊ុយក្រែន