ស្លូវ៉ាគី៖ អ៊ុយក្រែន គ្មានថ្ងៃចូល ណាតូ បានឡើយ

នៅក្នុងកម្មវិធី «សន្ទនាថ្ងៃសៅរ៍» របស់ទូរទស្សន៍ STVR នាយករដ្ឋមន្ត្រីស្លូវ៉ាគីលោក Robert Fico បានបញ្ជាក់ច្បាស់ៗថា អ៊ុយក្រែន គ្មានថ្ងៃចូលជាសមាជិកអង្គការណាតូបានឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេដឹកនាំដែលធ្លាប់រួចជីវិតពីការប៉ុនប៉ងធ្វើឃាតរូបនេះ និយាយថា កុំថាឡើងណាតូ សម្បីការខិតខំរបស់អ៊ុយក្រែន ដើម្បីក្លាយជាសមាជិកភាព EU ក៏មិនទទួលបានជោគជ័យដែរ ព្រោះថា បើយោងតាមសេចក្តីថ្លែងការណ៍របស់អ្នកនយោបាយមួយចំនួននាពេលថ្មីៗនេះ, អ៊ុយក្រែន មានបញ្ហាច្រើនណាស់ ដែលត្រូវដោះស្រាយ។

ស្របពេលជាមួយគ្នានោះ លោក Fico ក៏បានរិះគន់ប្រមុខដឹកនាំរដ្ឋាភិបាលទីក្រុងកៀវ Vladimir Zelensky ផងដែរថា គាត់តែងតែជំទាស់ចំពោះបទឈប់បាញ់ជាមួយរុស្ស៊ី ហើយនៅតែចិញ្ចឹមចិត្តចង់ឈ្នះសង្គ្រាម។

ជាយូរមកហើយ ទីក្រុងកៀវ អះអាងថា ខ្លួន​ត្រូវការ​ការធានា​ផ្នែកសន្តិសុខ​យ៉ាង​ម៉ឺងម៉ាត់ជាទីបំផុត មុននឹង​យល់ព្រម​បទ​ឈប់​បាញ់​ជាមួយ​ក្រុងមូស្គូ ហើយម្យ៉ាង ​ចាត់ទុក​សមាជិកភាព​ណាតូ​ជាការ​ធានា​ដ៏ល្អបំផុត។

យ៉ាងណា ពាក់ព័ន្ធសមាជិកភាពណាតូនេះដែរ អតីតប្រមុខសម្ព័ន្ធភាពយោធាដឹកនាំដោយអាមេរិក Jens Stoltenberg មុននឹងចុះចេញពីតំណែង លោកធ្លាប់ព្រលយពាក្យថា លក្ខខណ្ឌតែមួយគត់ ដែលអ៊ុយក្រែន អាចចូលជាសមាជិករបស់ខ្លួនបាន នោះគឺ លុះត្រាតែកងកម្លាំងរបស់លោក Zelensky ឈ្នះសង្គ្រាមលើរុស្ស៊ី សិន។ លោកនិយាយថា គ្មាននរណាអាចធានាថា ១០ទៀតអ៊ុយក្រែន នឹងចូលអង្គការណាតូបានឡើយ ហើយសមាជិកភាពរបស់ទីក្រុងកៀវ គឺអាស្រ័យលើសង្គ្រាមជាមួយរុស្ស៊ីនេះឯង។

បុរសសញ្ជាតិន័រវេសវ័យ៦៥ឆ្នាំរូបនេះ សង្កត់ធ្ងន់ថា បញ្ហានាំអ៊ុយក្រែនចូលណាតូ គឺជាបញ្ហារសើបបំផុត។ វាមិនអាចកើតឡើងបានត្រឹមរយៈពេល៣ឆ្នាំទៀតនោះទេ ព្រោះថា ឥឡូវអ៊ុយក្រែន គឺជាប្រទេសដែលកំពុងមានសង្គ្រាម។ យ៉ាងណា រឿងសំខាន់ពេលនេះ គឺសម្ព័ន្ធភាពយោធាដឹកនាំដោយអាមេរិក ត្រូវតែបង្កើនការផ្តល់ជំនួយដល់អ៊ុយក្រែន តាមដែលអាចធ្វើទៅបាន។

សូមបញ្ជាក់ថា ដើមឡើយ សមាជិក​ណាតូទាំងអស់ ​បាន​ព្រមព្រៀង​គ្នា ឲ្យអ៊ុយក្រែន​ ​ចូល​រួម​ក្នុង​ប្លុក​នេះ​នៅ​ឆ្នាំ២០០៨ ប៉ុន្តែ​មិន​បាន​ផ្តល់​ពេលវេលា​ជាក់លាក់​ទេ។ ក្រោយរដ្ឋប្រហារនៅទីក្រុងកៀវក្នុងឆ្នាំ២០១៤ អ៊ុយក្រែនក៏ប្តេជ្ញាចិត្តយ៉ាងពេញលេញ ចំពោះគោលដៅនៃការទទួលបានសមាជិកភាពនេះ ហើយនៅរដូវស្លឹកឈើជ្រុះឆ្នាំ២០២២ ខ្លួនបានដាក់ពាក្យជាផ្លូវការដើម្បីចូលណាតូ បន្ទាប់ពីតំបន់ចំនួន៤ បានបោះឆ្នោតប្រជាមតិ ក្លាយជាផ្នែកមួយរបស់ប្រទេសរុស្ស៊ី៕

អត្ថបទ៖ សុខ សុវណ្ណ

ចុចអាន៖ លោក ម៉ាក រូតេ៖ ណាតូនឹងអាប់ឱន បើអ៊ុយក្រែន ចាញ់រុស្ស៊ី