ព័ត៌មានអន្ដរជាតិ

ប្រជាជនកោះGreenland រៀបចំបោះឆ្នោត ក្រោមការតាមដានរបស់ពិភពលោក

បានផុស

៣ សប្តាហ៍ មុន

នៅ

ថ្ងៃអង្គារ ១១ មីនា ២០២៥

ដោយ

ប្រជាជននៅរស់នៅលើកោះ Greenland ដ៏ធំបំផុតក្នុងពិភពលោកស្ថិតនៅតំបន់អាកទិក បានចាប់ផ្តើមបោះឆ្នោតកាលពីថ្ងៃអង្គារនៅក្នុងការបោះឆ្នោតមួយដែលនាំឱ្យមានការចាប់អារម្មណ៍ជាអន្តរជាតិ បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បង្ហាញបំណងយកកោះនេះមកចំណុះខ្លួនតាមរយៈការទិញឬក៏ប្រើកម្លាំងយោធា។

កោះ Greenland ដែលស្ថិតក្រោមការគ្រប់គ្រងរដ្ឋបាលរបស់ប្រទេសដាណឺម៉ាកក្នុងតំបន់អឺរ៉ុបខាងជើង បានក្លាយជាទីចាប់អារម្មណ៍របស់ប្រធានាធិបតីអាមេរិកលោក ដូណាល់ ត្រាំ ក្នុងការគ្រប់គ្រងកោះដែលសម្បូរទៅដោយសារ ធាតុរ៉ែ ក្នុងអំឡុងចុងអាណត្តិទី១របស់លោក និងក្នុងពេលយុទ្ធនាការរកសំឡេងឆ្នោតក្នុងអាណត្តិទី២របស់លោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីចូលកាន់តំណែងក្នុងខែមករាមក លោក ដូណាល់ ត្រាំ បានប្តេជ្ញាធ្វើឱ្យ Greenland ដែលជាដែនដីពាក់កណ្តាលស្វយ័តរបស់ដាណឺម៉ាក ជាផ្នែកមួយនៃសហរដ្ឋអាមេរិកដោយនិយាយថាវាមានសារៈសំខាន់ចំពោះផលប្រយោជន៍សន្តិសុខរបស់សហរដ្ឋអាមេរិក និងសន្តិសុខសកលលោក។

កោះដ៏ធំដែលមានប្រជាជនជិត៦ម៉ឹននាក់ត្រូវបានជាប់នៅក្នុងការប្រកួតប្រជែងភូមិសាស្ត្រនយោបាយសម្រាប់ភាពលេចធ្លោនៅតំបន់អាកទិក ជាកន្លែងដែលផ្ទាំងទឹកកករលាយកំពុងធ្វើឱ្យធនធានរបស់វាកាន់តែងាយស្រួល និងបើកផ្លូវដឹកជញ្ជូនថ្មី។ ទាំងរុស្ស៊ី និងចិនបានបង្កើនសកម្មភាពយោធានៅក្នុងតំបន់។ យោងទីភ្នាក់ងាររ៉យទ័រ។

កោះ Greenland ដែលមានទំហំធំជាងគេបំផុតក្នុងសកលលោក រហូតដល់ជាង២លានគីឡូម៉ែត្រការ៉េ នឹងក្លាយជាជម្លោះក្នុងភូមិសាស្ត្រនយោបាយនៃប្រទេសមហាអំណាចនាពេលខាងមុខ ខណៈដែលប្រទេសនៅតំបន់អឺរ៉ុបក៏នឹងមិនបោះបង់ដែនដីរបស់ខ្លួនទៅឲ្យសហរដ្ឋអាមេរិកដោយងាយៗនោះដែរ៕

ដោយ រ៉ាន់ រើយ