ជំទាវទី២ អាមេរិក នឹងធ្វើទស្សនកិច្ចកោះ Greenland នាំទាំងរដ្ឋមន្ត្រីក្រសួងថាមពល ទៅជាមួយ

តាមការប្រកាសពីសេតវិមានកាលពីថ្ងៃអាទិត្យទី២៣ខែមីនាឆ្នាំ២០២៥ ជំទាវទី២អាមេរិក Usha Vance នឹងបំពេញទស្សនកិច្ចកោះ Greenland នៅថ្ងៃព្រហស្បតិ៍នេះ ហើយក្នុងដំណើរនោះ អ្នកស្រីនឹងទៅមើលប្រវត្តិសាស្ត្រដើម្បីស្វែងយល់អំពីបេតិកភណ្ឌ Greenland។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី Usha Vance នឹងធ្វើដំណើរទៅជាមួយគណៈប្រតិភូអាមេរិកដែលមានដូចជារដ្ឋមន្ត្រីក្រសួងថាមពល Chris Wright និងទីប្រឹក្សាសន្តិសុខជាតិ Mike Waltz ហើយទស្សនកិច្ចនេះ កើតឡើងចំពេលប្រធានាធិបតី ដូណាល់ ត្រាំ បង្ហាញបំណងចង់បានដែនដី Greenland រឹតខ្លាំង។

តាំងពីចូលកាន់អំណាចមក លោកត្រាំ បានដាក់កោះ Greenland ជាមុខព្រួញក្នុងគោលដៅដណ្តើមយកមកកាន់កាប់ ថែមទាំងមានពេលមួយលោកដល់ថ្នាក់ប្រកាសថា អាចមានលទ្ធភាពដែលអាមេរិក អាចប្រើកម្លាំងទ័ពដើម្បីយកដែនដីនេះមកគ្រប់គ្រងថែមទៀតផង។

មូលហេតុចម្បងមួយដែលលោក ត្រាំ ចង់បាន Greenland គឺដោយសារតែគូប្រជែងគឺចិននិងរុស្ស៊ី កំពុងដាក់ឥទ្ធិពលខ្លាំងណាស់នៅទីនោះ ហើយអាមេរិកចង់បានកោះនេះ ដើម្បីធានាសន្តិសុខរបស់ខ្លួន។ 

សូមជម្រាបជាថ្មី Greenland គឺជាដែនដីស្វយ័តរបស់ដាណឺម៉ាក ដែលស្ថិតក្រោមការគ្រប់គ្រងរបស់ប្រទេសនេះអស់រយៈពេលជាង៦០០ឆ្នាំមកហើយ ខណៈបច្ចុប្បន្ន វា​មាន​ប្រជាជន​​​​​​ប្រមាណ​​៥៦ ០០០​នាក់។ 

Greenland ស្ថិតនៅចន្លោះមហាសមុទ្រអាត្លង់ទិកនិងអាកទិក ត្រូវ​បាន​គ្របដណ្ដប់ដោយផ្ទាំងទឹកកក​ចំនួន​ ៨០% និងជាជម្រករបស់មូលដ្ឋានយោធាអាមេរិកដ៏ធំមួយ។ កោះដ៏ធំបំផុតរបស់ពិភពលោក​មួយ​នេះ ​សម្បូរទៅដោយ​​ធនធានរ៉ែ ប្រេង និងឧស្ម័នធម្មជាតិ ប៉ុន្តែការអភិវឌ្ឍ​មានសភាពយឺតយ៉ាវ ដែលធ្វើឲ្យសេដ្ឋកិច្ចរបស់ខ្លួន​ត្រូវ​ពឹងផ្អែកលើការនេសាទ និងការឧបត្ថម្ភធនប្រចាំឆ្នាំពីប្រទេសដាណឺម៉ាក៕

អត្ថបទ៖ សុខ សុវណ្ណ

ចុចអាន៖ ទេសចរ​កំពុង​កើន​ឡើង​​ទៅកម្សាន្ត​នៅ​កោះ Greenland ដែលត្រាំចង់បាន​