នាយករដ្ឋមន្ត្រីថៃទស្សនកិច្ច​​នៅវៀតណាម ដើម្បី​​​ពង្រឹង​ទំនាក់​ទំនងសេដ្ឋកិច្ច​និង​ទេសចរណ៍​

នាយករដ្ឋមន្ត្រីថៃលោកស្រី ផែថងថាន ស៊ីណាវ៉ាត្រ (Paetongtarn Shinawatra) បានមកដល់ទីក្រុងហាណូយនៅថ្ងៃព្រហស្បតិ៍នេះ ក្នុងដំណើរទស្សនកិច្ចផ្លូវការរយៈពេលពីរថ្ងៃនៅវៀតណាម តបតាមការអញ្ជើញរបស់នាយករដ្ឋមន្ត្រី ​លោក ផាម មិញជិញ (Pham Minh Chinh)។ នេះបើយោងតាមការចេញផ្សាយរបស់សារព័ត៌មាន​ Viet Nam News។

នាយករដ្ឋមន្ត្រីថៃ ត្រូវបានទទួលស្វាគមន៍នៅអាកាសយានដ្ឋានអន្តរជាតិ Noi Bai ដោយរដ្ឋមន្ត្រីក្រសួងវប្បធម៌ កីឡា និងទេសចរណ៍ លោក Nguyen Van Hung អនុរដ្ឋមន្ត្រីក្រសួងការបរទេស Nguyen Manh Cuong និងឯកអគ្គរដ្ឋទូតវៀតណាមប្រចាំនៅប្រទេសថៃ Pham Viet Hung។

ក្នុងដំណើរបំពេញទស្សនកិច្ចនេះ នាយករដ្ឋមន្ត្រី​វៀតណាម និងនាយករដ្ឋមន្ត្រីថៃ​ ផែថង​ថាន នឹងធ្វើជាសហប្រធាននៃកិច្ចប្រជុំគណៈរដ្ឋមន្ត្រីចម្រុះវៀតណាម-ថៃ លើកទី៤ ខណៈរដ្ឋាភិបាលរបស់នាយករដ្ឋមន្ត្រី​​ ផែថងថាន យកចិត្តទុកដាក់យ៉ាងខ្លាំងលើការពង្រឹងកិច្ចសហប្រតិបត្តិការជាមួយបណ្តាប្រទេសអាស៊ាន រួមទាំងវៀតណាម ជាពិសេសលើផ្នែកសេដ្ឋកិច្ច និងទេសចរណ៍។

ថ្លែងទៅកាន់អ្នកឆ្លើយឆ្លងព័ត៌មានវៀតណាម (VNA) នៅទីក្រុងបាងកក ឯកអគ្គរដ្ឋទូតវៀត លោក Hung បានបញ្ជាក់​ថា ដំណើររបស់​នាយករដ្ឋមន្ត្រី​ ផែថងថាន គឺជាដំណើរទស្សនកិច្ចផ្លូវការលើកដំបូងរបស់នាយករដ្ឋមន្ត្រីថៃក្នុងរយៈពេល ១១ ឆ្នាំ ចាប់តាំងពីដំណើរទស្សនកិច្ចរបស់នាយករដ្ឋមន្ត្រី Prayut Chan-o-cha ក្នុងឆ្នាំ២០១៤មក។ ដំណើរនេះ​មក​ចំពេល​ដែលប្រទេសទាំងពីរទន្ទឹងរង់ចាំខួបលើកទី ៥០ នៃទំនាក់ទំនងការទូតពីឆ្នាំ ១៩៧៩ដល់ឆ្នាំ២០២៦។

ជុំវិញដំណើរទស្សនៈកិច្ចនេះអ្នកការទូត បាននិយាយថា ក្រៅពីភាពជាដៃគូយុទ្ធសាស្ត្រដែលបានពង្រឹងនាំឲ្យមានការអភិវឌ្ឍន៍យ៉ាងទូលំទូលាយ និង​សំខាន់លើវិស័យផ្សេងៗ ដំណើរទស្សនកិច្ចនេះផ្តល់នូវឱកាសដ៏សំខាន់សម្រាប់ប្រទេសទាំង​ពីរ​ក្នុងការលើកកំពស់ទំនាក់ទំនងរបស់ពួកគេទៅកាន់កម្ពស់ថ្មីមួយនិងមានប្រសិទ្ធភាពជាងមុន៕

អត្ថបទ៖ ប៊ុន សុភាព