ព័ត៌មានអន្ដរជាតិ

តុលាការថៃ ចេញដីកាចាប់ខ្លួនមហាសេដ្ឋីម្នាក់ និងមនុស្ស១៦នាក់ ពាក់ព័ន្ធករណីបាក់រលំអគារកាលពីខែមីនា

បានផុស

១ year មុន

នៅ

ថ្ងៃសុក្រ ១៦ ឧសភា ២០២៥

ដោយ

Chheang

យោងតាមការចុះផ្សាយរបស់ BBC នៅថ្ងៃទី១៦ខែឧសភានេះ អាជ្ញាធរថៃបានចេញដីកាចាប់ខ្លួនបុគ្គលចំនួន១៧នាក់ ក្នុងនោះរួមមានទាំងមហាសេដ្ឋីដ៏ល្បីម្នាក់ឈ្មោះ Premchai Karnasuta ពាក់ព័ន្ធនឹងការដួលរលំអគារកម្ពស់៣០ជាន់ក្នុងទីក្រុងបាងកក អំឡុងពេលរញ្ជួយដីកម្រិត៧,៧រិចទ័រ កាលពីថ្ងៃទី២៨ខែមីនា ដែលបណ្ដាលឲ្យមនុស្ស៨៩នាក់ស្លាប់ និងបាត់ខ្លួន៧នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យដែលរួមមានវិស្វករ អ្នកគ្រប់គ្រង និងអ្នកម៉ៅការមកពីក្រុមហ៊ុនដូចជា Forum Architect, Meinhardt Thailand និង ITD-CREC ប្រឈមមុខនឹងការចោទប្រកាន់ពីបទធ្វេសប្រហែសវិជ្ជាជីវៈបណ្តាលឲ្យមានមនុស្សស្លាប់។ ការស៊ើបអង្កេតបានបង្ហាញថា ការរចនាអគារនេះរំលោភលើស្តង់ដារសុវត្ថិភាព ព្រមទាំងកំហុសនៃរចនាសម្ព័ន្ធដែលបានប្រើនៅក្នុងជណ្ដើរយន្តប្រអប់ និងការប្រើប្រាស់បេតុង និងដែកដែលមិនមានស្តង់ដារ។

លោក Premchai Karnasuta អាយុ៧១ឆ្នាំ អតីតប្រធានក្រុមហ៊ុន Italian-Thai Development Plc ស្ថិតក្នុងចំណោមអ្នកដែលត្រូវបានចោទប្រកាន់។ លោកធ្លាប់ត្រូវបានកាត់ទោសម្ដងរួចមកហើយកាលពីឆ្នាំ២០១៩ ពីបទប្រម៉ាញ់សត្វព្រៃខុសច្បាប់ ហើយត្រូវបានដោះលែងឲ្យនៅក្រៅឃុំនៅឆ្នាំ២០២៣។

សូមជម្រាបថា ការដួលរលំអគារនេះបានធ្វើឲ្យមានការព្រួយបារម្ភអំពីសុវត្ថិភាព និងការត្រួតពិនិត្យបទប្បញ្ញត្តិសំណង់នៅក្នុងប្រទេសថៃ។ អាជ្ញាធរកំពុងបន្តការស៊ើបអង្កេតដោយផ្តោតលើកំហុសសំណង់ដែលអាចកើតមាន និងការប្រើប្រាស់សម្ភារដែលមិនមានស្តង់ដារ៕

ដោយ៖ ឈាង