UN ​ជ្រើសតាំង​​សមាជិកមិនអចិន្ត្រៃយ៍​៥​ប្រទេស​ទៅ​ក្នុង​​ក្រុម​ប្រឹក្សាសន្តិសុខ​ឆ្នាំ២០២៦​

មហាសន្និបាតអង្គការសហប្រជាជាតិ បានបោះឆ្នោតជ្រើសរើសប្រទេសចំនួន​៥​ដូចជា បារ៉ែន កូឡុំប៊ី សាធារណរដ្ឋប្រជាធិបតេយ្យកុងហ្គោ (DRC) ឡេតូនី និងលីបេរីយ៉ា ដើម្បីធ្វើជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិសម្រាប់រយៈពេល២​ឆ្នាំ​គិត​ចាប់ពីថ្ងៃទី​១​ខែមករាឆ្នាំ​២០២៦។

ការបោះឆ្នោតដែលបានធ្វើឡើងកាល​ពី​ថ្ងៃទី​៣​ខែមិថុនា​ឆ្នាំ​២០២៥ បានឃើញការរាប់សន្លឹកឆ្នោតដូចខាងក្រោម៖ បារ៉ែនទទួលបាន ១៨៦​សំឡេង កុងហ្គោ ១៨៣​សំឡេង លីបេរីយ៉ា ១៨១​សំឡេង កូឡុំប៊ី ១៨០​សំឡេង និងឡេតូនី ១៧៨​សំឡេង។ ប្រទេស​នីមួយៗទាមទារសំឡេងភាគច្រើនពីរភាគបីនៅក្នុងមហាសន្និបាតដែលមានសមាជិកចំនួន១៩៣ ដើម្បីទទួលបានអាសនៈ។

ប្រទេសទាំង​៥​នេះ នឹងជំនួសប្រទេសអាល់ហ្សេរី ហ្គីយ៉ាន កូរ៉េខាងត្បូង សៀរ៉ាឡេអូន និងស្លូវេនី ដែល​បញ្ចប់​អាណត្តិ​របស់​ខ្លួន​នៅចុងឆ្នាំ​២០២៥។

សូម​ជម្រាប​ថា ក្រុមប្រឹក្សាសន្តិសុខមានសមាជិក ១៥​ប្រទេស​៖ សមាជិកអចិន្ត្រៃយ៍ចំនួន​៥ ​ដែលមានអំណាចវេតូ ដូចជា ចិន បារាំង រុស្ស៊ី ចក្រភពអង់គ្លេស និងសហរដ្ឋអាមេរិក ព្រម​ទាំង​សមាជិកមិនអចិន្ត្រៃយ៍ចំនួន១០ ដែល​ត្រូវបានជាប់ឆ្នោតសម្រាប់អាណត្តិ ២​ឆ្នាំ៕

ដោយ៖ ឈាង