ត្រាំ បញ្ជាក់ថា អាមេរិកនៅតែជួយអ៊ុយក្រែនដដែល ប៉ុន្តែជួយតែអាវុធសំខាន់ៗមួយចំនួនប៉ុណ្ណោះ

ថ្លែងប្រាប់អ្នកសារព័ត៌មានមុនឡើងយន្តហោះ Air Force One ទៅកាន់រដ្ឋ Iowa កាលពីថ្ងៃព្រហស្បតិ៍ទី៣ខែកក្កដាឆ្នាំ២០២៥ ប្រធានាធិបតីអាមេរិក ដូណាល់ ត្រាំ បញ្ជាក់ថា ទីក្រុងវ៉ាស៊ីនតោននៅតែផ្តល់ជំនួយយោធាឲ្យអ៊ុយក្រែនដដែល គ្រាន់តែកាត់បន្ថយខ្លះ ពោលគឺផ្តល់តែអាវុធសំខាន់ៗដែលចាំបាច់ប៉ុណ្ណោះ។ នេះបើតាមការចុះផ្សាយរបស់ RT។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយច្រានចោលព័ត៌មានថាអាមេរិកផ្អាកជំនួយទាំងស្រុង ប្រមុខសេតវិមាននិយាយថា យើងនៅតែផ្តល់អាវុធសំខាន់ៗប៉ុន្តែទីក្រុងវ៉ាស៊ីនក៏ត្រូវតែធានាដែរថា ខ្លួនឯងនៅមានស្តុកគ្រប់គ្រាន់ដើម្បីការពារខ្លួន។

លោកគូសបញ្ជាក់ថា «យើងកំពុងផ្តល់អាវុធ ប៉ុន្តែយើងបានផ្តល់អាវុធច្រើនណាស់មកហើយ។ តើអ្នកដឹងទេ លោក បៃដិន បានធ្វើឲ្យប្រទេសរបស់យើងទទេស្អាត ដោយសារតែផ្តល់អាវុធឲ្យពួកគេនោះ។ ដូច្នេះយើងត្រូវធានាថា យើងមានអាវុធគ្រប់គ្រាន់សម្រាប់ខ្លួនឯង។ យ៉ាងណា យើងកំពុងផ្តល់អាវុធ ហើយយើងកំពុងធ្វើការជាមួយពួកគេ និងព្យាយាមជួយពួកគេ»។

ទោះបីជាយ៉ាងណាក៏ដោយ លោកត្រាំមិនប្រាប់ទេថាតើ សហរដ្ឋអាមេរិក នឹងផ្អាកជំនួយអាវុធបែបណាឬបន្តផ្តល់ជំនួយអាវុធអ្វីទៅឲ្យទីក្រុងកៀវ។

កាលពីថ្ងៃអង្គារ​ទី​១​ខែ​កក្កដា សេតវិមានបានចេញសេចក្តីប្រកាសថា ទីក្រុងវ៉ាស៊ីនតោនបាន​បញ្ឈប់ការនាំចេញអាវុធមួយចំនួនទៅកាន់ប្រទេសអ៊ុយក្រែនហើយ ដោយលើកឡើងពីក្តីព្រួយបារម្ភអំពីកម្រិតស្តុកទុក​សព្វាវុធ​ក្នុងស្រុក និងការវាយតម្លៃឡើងវិញនៃអាទិភាពយោធា។

យោងតាមអ្នក​នាំពាក្យ​សេតវិមាន លោកស្រី Anna Kelly, ការ​សម្រេច​ចិត្ត​នេះ​ធ្វើ​ឡើង​តាម​​ការ​ពិនិត្យ​ឡើង​វិញ​របស់​ក្រសួង​ការពារ​ជាតិ ហើយ​​ផ្ដោត​សំខាន់​ «ដើម្បី​ដាក់​ផលប្រយោជន៍​អាមេរិក​ជា​ចម្បង»។

ក្រោយមកបានមួយថ្ងៃប៉ុណ្ណោះ ស្រាប់តែរុស្ស៊ីអះអាងថា សង្គ្រាមកាន់តែឆាប់ចប់ បើមហាអំណាចលោកខាងលិច ជួយអ៊ុយក្រែន កាន់តែតិច។ អ្នកនាំពាក្យវិមានក្រឹមឡាំង Dmitry Peskov និយាយថា រុស្ស៊ីសូមស្វាគមន៍ការសម្រេចចិត្តរបស់ទីក្រុងវ៉ាស៊ីនតោន ក្នុងការផ្អាកបញ្ជូនអាវុធមួយចំនួនទៅឲ្យអ៊ុយក្រែន។ ការកាត់បន្ថយនេះ នឹងជួយរុស្ស៊ីឲ្យកាន់តែខិតជិតទៅនឹងការសម្រេចគោលដៅរបស់ខ្លួនក្នុងសង្គ្រាម។ ការផ្អាកផ្តល់ជំនួយឲ្យអ៊ុយក្រែន មានន័យថា ប្រតិបត្តិការយោធាពិសេសជិតបញ្ចប់ហើយ៕

អត្ថបទ៖ សុខ សុវណ្ណ

ចុចអាន៖ ក្រោយអាមេរិក ផ្អាកជំនួយទៅអ៊ុយក្រែន រុស្ស៊ី ថា ​សង្គ្រាមជិតចប់ហើយ